Num 13 | TyvTUV | STEP | Израиль чон ооң соонда Асироттан көжүп үнгеш, Фаран ховузунга турлагжып алган .

‏ Numbers 13

Хайгыылчыларның Ханаанче чорааш келгени

(Ы. х. к. 1:19-25)

1 Израиль чон ооң соонда Асироттан көжүп үнгеш, Фаран ховузунга турлагжып алган ^a. 2 Дээрги-Чаяакчы Моисейге: 3 «Мээң израиль чонга берип турарым ханаан черни шинчип көрзүн дээш элээн каш кижиден айбылап чорудувут. Оларның ада-өгбезиниң аймак бүрүзүнден-не бир кижи кылдыр ^b, баштың улустан чорудар силер» – деп чугаалаан.

4 Моисей Дээрги-Чаяакчының дужаалын ёзугаар израиль чоннуң баштыңнарындан тургустунган бөлүк улусту Фаран ховузундан Ханаанче чорудупкан ^c. 5 Оларның аттары бо-дур:

Рувимниң аймаандан – Заккурнуң оглу Шаммуй;

6 Симеоннуң аймаандан – Хорийниң оглу Сафат;

7 Иуданың аймаандан – Иефоннийниң оглу Халев ^d;

8 Иссахарның аймаандан – Иосифтиң оглу Игал;

9 Эфремниң аймаандан – Нуннуң оглу Осия;

10 Вениаминниң аймаандан – Рафунуң оглу Фалтий;

11 Завулоннуң аймаандан – Содийниң оглу Гаддиил;

12 Иосифтиң оглу Манассияның аймаандан – Сусийниң оглу Гаддий;

13 Данның аймаандан – Гемаллийниң оглу Аммиил;

14 Асирниң аймаандан – Михаилдиң оглу Сефур;

15 Неффалимниң аймаандан – Вофсийниң оглу Нахбий;

16 Гадтың аймаандан – Махийниң оглу Геуил.

17 Ханаан черни шинчип көрзүн дээш, Моисейниң айбылап чорудупкан улузу ол-дур. Моисей Нуннуң оглу Осияны Иисус ^{▼▼ Осия – «камгалаар» дээн уткалыг, Иисус – «Дээрги-Чаяакчы камгалаар» дээн уткалыг.} деп адап алган ^f.

18 Моисей оларны Ханаанны шинчип көрзүн дээш чорудуп тура: «Негев деп ээн кургаг ховуну таварып эртиңер, дагларже үнүңер; 19 ол черниң кандыызын топтап көрүңер, ында кандыг чон чурттап турарын, ооң күштүүн азы кошкаан, эвээжин азы хөйүн көрүп билип алыңар; 20 ол улустуң чурттап турар чериниң кандыызын: эки азы багайын, оларның чурттап турар хоорайларының кандыызын: чоннуң быжыглаттынмаан турлагларда азы быжыглалдыг шивээлерде чурттап турарын көрүп билип алыңар; 21 ол черниң дүжүткүрүн азы дүжүткүр эвезин, ында ыяштар бар азы чогун көрүп билип алыңар. Дидим болуңар, ол черниң чимистерин бээр эккелиңер» – деп чагаан. (А ол үе дээрге виноградтың баштай бышкан чимистерин чыыр үе турган.)

22 Олар хайгыыл кылып чорупкаш, мурнуу чүкте ээн кургаг Цин ховузундан эгелээш, соңгу чүкте Лево-Хамат чоогунда Реховка чедир черлерни шинчип көргеннер. 23 Негевти таварып эрткеш, Хевронга чеде бергеннер. Ол хоорайга Энактың үре-салгалы ^{▼▼ Энак деп сөс «моюн» дээн уткалыг. «Энактың үре-салгалы» дээрге узун моюннуг азы кайгамчык улуг мага-боттуг улусту ойзу адааны ол бооп чадавас (Ы. х. к. 1:28; 2:10; 9:2; Иис. 11:21-22 көр).}: Ахиман, Шешай болгаш Талмай чурттап турган ^h. (Хевронну Египетте Цоан хоорайдан ⁱ чеди чыл мурнай туткан чүве-дир.) 24 Хайгыылчылар ооң соонда Эшкол ^{▼▼ Эшкол – «виноград салбаа» дээн уткалыг ат.} деп шынаага чедип келгеш, бир салбак каттыг виноград будуун сыптан кезип алганнар ^k – ону ийи кижи мергеге аскаш, көдүрүп чораан, аңаа немей гранат биле фига чимистери ап алганнар. 25 Ол черни израильчилер Эшкол деп адап алган, чүге дээрге оон виноград салбаа кезип алган чүве-дир.

26 Хайгыылчылар ол черни шинчип көрүп алгаш, дөртен хонук эрткенде, ээп келгеннер. 27 Олар Моисей биле Ааронга база бүгү израиль ниитилелге Фаран ховузунга, Кадес деп черге чедип келгеш, оларга харыы тудуп чугаалааш, чедип чорааны черниң чимистерин көргүскеннер. 28 Хайгыылчылар Моисейге мынча деп чугаалап турганнар: «Сээң бисти айбылап чорудупканың черге четкеш келдивис. Шынап-ла, сүт биле ары чигири агып чыдар байлак чер болду, ооң чимистери бо-дур. 29 Ынчалза-даа ол черде чурттап турар чон күштүг-дүр, ооң хоорайлары быжыглалдыг болгаш аажок улуг-дур; Энактың үре-салгалын база аңаа көрдүвүс. 30 Амалик чон ^l ол черниң мурнуу талазында, хет, иевус болгаш амор чоннар – дагларда, а хананей чон далай чанында база Иордан хемниң кыдыын дургаар чурттап турар болду».

31 А Халев Моисейниң мурнунга чонну оожургадып: «Баргаш, ол черни эжелеп аалы, оларны тиилеп шыдаар бис» – деп турган ^m.

32 Ынчалзажок ооң-биле кады хайгыылдап чораан кижилер: «Ол улуска удур тулчуп шыдавас бис, олар бистен күштүг-дүр!» – дижир болган ⁿ. 33 Олар израиль чоннуң аразынга шинчип көрүп чорааны чер дугайында бак чугаа-соот тарадып: «Топтап көөр дээш таварып эрткенивис чер дээрге ында чурттаан улустуң бажын чип турар чер-дир ^o; аңаа көргенивис шупту улус бедик-чаагай чорду; 34 Энактың үре-салгалы болур, кончуг улуг-шыырак уктуг, боттары база кайгамчык улуг улусту ^p аңаа көрдүвүс, оларның мурнунга бодувусту шартылаага деңней көөр чордувус, олар бисче база шартылааже дег ^q кылдыр көрүп турду» – деп турганнар.