Num 14 | TyvTUV | STEP | Ол дүне бүгү израиль ниитилел алгы-кышкы көдүрүп турган, чон ыглап-сыктап турган.

‏ Numbers 14

Чоннуң Египетче ээп чоруксааны

(Ы. х. к. 1:26-32)

1 Ол дүне бүгү израиль ниитилел алгы-кышкы көдүрүп турган, чон ыглап-сыктап турган. 2 Шупту израильчилер, бүгү ниитилел, Моисей биле Ааронга удур хыйланып, оларга: «Египет черге өлү бээривис кай азы бо ээн кургаг ховуга өлү бээривис кай! ^a 3 Дээрги-Чаяакчы бисти ханаан черже чүге эдертип бар чыдарыл – хылыштан кырлып калзын дээш бе? Кадайларывыс, ажы-төлүвүс дайзынның олчазы болу берзин дээш бе? Египетче ээп чорупканывыс дээре эвес бе?!» – деп турганнар. 4 Улус бот-боттарынга: «Өске баштыңчыдан томуйлап алгаш, Египетче дедир чоруй бараалы» – дижип турган ^b.

5 Моисей биле Аарон бүгү израиль ниитилел көрүп турда, доңгая кээп дүшкеннер ^c. 6 А Нуннуң оглу Иисус ^d биле Иефоннийниң оглу Халев ^e – ханаан черни шинчип көрүп чораан улустуң ийизи – хептерин ора соп каапкаш ^f, 7 бүгү израиль ниитилелге мынча дээннер: «Бистиң топтап көрүп чораан черивис дыка эки чер чүве, 8 бир эвес Дээрги-Чаяакчының сеткилинге кирер болзувусса, Ол бисти демги черже чедирип, сүт биле ары чигири агып чыдар байлак черни биске бээр-дир ийин. 9 Чүгле Дээрги-Чаяакчыга удур үймээн үндүрбеңер база ол черниң чурттакчыларындан кортпаңар, чүге дээрге бис оларны аъш-чем дег сыырыптар бис: оларда ам камгалал чок болгай, а Дээрги-Чаяакчы бистиң талавыста-дыр ^g. Олардан кортпаңар!»

10 Бүгү ниитилел: «Бо ийи кижини даштар-биле соп кааптар-дыр!» – дей берген ^h. Ынчалза-даа Дээрги-Чаяакчының өндүр чырыы израиль чонга Ужуражылга майгынының кырынга чырып көстүп келген.

11 Дээрги-Чаяакчы Моисей-биле чугаалажып: «Бо чон Мени кажанга дээр херекке албазыл? Оларның аразынга эңдерик көскү демдектер көргүзеримге-даа, олар Меңээ чежеге дээр бүзүревезил? 12 Мен бо чонну, аарыг-хай халдаткаш, узуткап кааш, сенден оон-даа хөй санныг болгаш күштүг чон укталыр кылып каайн ⁱ» – дээн.

13 Моисей Дээрги-Чаяакчыга харыылаан: «Сен бо чонну египет чоннуң аразындан Бодуңнуң күчү-күжүң-биле үндүре бердиң чоп. Египетчилер ам боттандырар деп турар кеземчең дугайында дыңнап кааш, 14 ол дугайында ханаан черниң чурттакчыларынга чугаалаптар. А ол улус Сээң израильчилер аразында турарыңны, олар-биле удур-дедир көржүп алгаш, Бодуңну көргүскениңни, Сээң булудуңнуң оларның кырында турарын, Сээң оларның мурнунда: хүндүс боорга – булут чагы, дүне боорга – от чагы аразында бар чыдарыңны дыңнаан болгай, Дээрги-Чаяакчы ^j. 15 Бир эвес Сен бо чонну, чаңгыс кижини дег, узуткап каар болзуңза, ат-алдарың дугайында дыңнаан чоннар: 16 „Дээрги-Чаяакчы бээр бооп аазап, даңгыраглаан черинче бо чонну чедирип шыдавады, ынчангаш ону ээн кургаг ховуга узуткап кагды“– дижир ^k.

17 – 18 Ынчангаш Дээргиниң өндүр бедик күчү-күжү илерезин. Сээң: „Дээрги-Чаяакчы килеңнээчел эвес, элбек энерелдиг ^l, улустуң кем-буруузун, кемниг херектерин өршээп турар, ынчалза-даа буруулугларны кеземче чокка арттырбас база адаларының кем-буруузу дээш үре-салгалын үшкү болгаш дөрткү салгал чедир кезедип турар ^m“– деп чугаалааның ёзугаар болзун. 19 Өндүр улуг энерелдииң-биле бо чоннуң кем-буруузун, ону Египеттен эгелээш, маңаа чедир өршээп келгениң дег, өршээп көрем».

Кеземчениң дөртен чылын доктаатканы

(Ы. х. к. 1:34-40)

20 Дээрги-Чаяакчы Моисейге мынча дээн: «Сээң сөзүң ёзугаар өршээп тур мен, 21 ындыг-даа болза, Бодумнуң амы-тыным-биле база Бодумнуң чер-делегейни бүргээн алдарым-биле ⁿ даңгыраглап тур мен: 22 Мээң өндүр чырыымны көрген база Египетке болгаш ээн кургаг ховуга кылып турган көскү демдектеримни көрген, Мени ам мырыңай он катап шенээн, сөзүмнү дыңнавайн турган бүгү улус 23 оларның ада-өгбезинге бээр бооп аазап, даңгыраглаан черимни көрбейн баар ^o. Мени херекке албайн турган бүгү улус ол черни көрбес. 24 А Мээң чалчам Халевти, ооң сеткил-сагыжы оларныындан аңгы болганы дээш база ооң Меңээ бүрүнү-биле чагыртканы дээш ^p, шинчип көрүп чораан черинче ам бир катап чедирер мен; ооң үре-салгалы ол черни салгап алыр ^q.

25 Амалик биле хананей чоннар шак ол шынаада чурттап турар, ынчангаш силер даарта дедир ээп, Кызыл далай баар орук-биле ээн кургаг ховуже чоруй барыңар».

26 Дээрги-Чаяакчы Моисей биле Ааронга мынча деп чугаалаан: 27 «Бо бузуттуг ниитилел чежеге дээр Менче хыйланып кээрил? Израиль чоннуң Менче хыйланган чугаа-соодун дыңнадым. 28 Оларга Дээрги-Чаяакчы мээң дараазында сөстеримни дамчыт. Бодумнуң амы-тыным-биле даңгыраглап тур мен: Мээң дугайымда дыңналдыр хомудап турганыңар дег, силер-биле база ылап-ла ынчаар кылыр мен; 29 бо ээн кургаг ховуга мөчү-сөөктериңер чыдып каар ^r – силерниң араңарда чээрби хардан өрү назылыг, санаашкын эрткен улус шупту ^s Менче хыйланып турганы дээш маңаа кырлып каар. 30 Иефоннийниң оглу Халев биле Нуннуң оглу Иисустан аңгыда, силерниң кайыңар-даа силерни чурттадып каар бооп даңгыраглап турган черимче кирбес ^t. 31 „Дайзыннарга олча-тывыш болу бээр улус-тур“деп турган ажы-төлүңерни Мен ынаар киире бээр мен, олар силерниң тоовааныңар черге чурттай бээр. 32 Силерниң мөчү-сөөгүңер бо ээн кургаг ховуга чыдып каар, 33 а ажы-төлүңер ээн кургаг ховуга дөртен чыл дургузунда көжүп тояап ^u, силер шупту бо ээн кургаг ховуга сектер бооп чыдып калбаан шааңарда, силерниң Меңээ өскерилгениңер дээш кеземче көрүп кээр. 34 Бо черни шинчип көрүп турганыңар дөртен хүннүң саны-биле бачыттарыңар дээш дөртен чыл дургузунда – бир хүн дээш-ле, бир чыл – кеземче көөр силер ^v, Мээң силерге удур болу бергеним деп чүл ол дээрзин ынчан билип аар силер.

35 Дээрги-Чаяакчы мен чугаалап тур мен: Меңээ удур сүлчээ кылган бо бузуттуг ниитилелди шак ынчаар кезедир мен – олар шупту бо ээн кургаг ховуга амызы үстүп, өлүп каар».

36 – 37 Ол черни шинчип көрзүн дээш Моисейниң айбылап чорудупкан улузу – оон ээп келгеш, демги чер дугайында бак чугаа-соот тарадып, бүгү ниитилелди Моисейге удур хыйланырынче албадапкан улус – Дээрги-Чаяакчының ыдыпканы айыыл-халапка алзып, өлүп калган. 38 Чүгле Нуннуң оглу Иисус биле Иефоннийниң оглу Халев ол черни шинчип көрүп чораан улус аразындан дириг арткан ^w.

Израильчилерниң Ханаанче кирерин шенээни

(Ы. х. к. 1:40-46)

39 Моисей ол сөстерни бүгү израиль чонга дамчыдып чугаалаарга, чон аажок муңгарай берген. 40 Даартазында эртен олар эртежик туруп келгеш: «Дээрги-Чаяакчының чугаалап турган черинче бараалы, бачыт үүлгеткенивис шын-дыр» – дижип, даглыг черже чоруур деп турган.

41 Моисей ынчан мынча дээн: «Дээрги-Чаяакчының айтыышкынын чүге тооп дыңнавайн тур силер? Ындыг чорууңар чедимче чок болур. 42 Дээрги-Чаяакчы силерниң араңарда эвес-тир, ынаар үнмеңер – оон башка дайзыннарыңар силерни чылча шаап кааптар. 43 Амалик биле хананей чоннар силерни ында манап турар болгай ^x, хылыштан кырлып каар силер, чүге дээрге Дээрги-Чаяакчыдан ойталаан-дыр силер, ынчангаш Ол силерниң талаңарга чаалашпас».

44 Ынчалза-даа израильчилер бардамнаны бергеш, даглыг черже чорупканнар; а Дээрги-Чаяакчының ыдыктыг аптаразы биле Моисей турлагга артып калган. 45 Ол дагларга чурттап турган амаликтер биле хананейлер дүжүп келгеш, израильчилерни чылча шапкаш, Хормага чедир сывыртаан ^y.