‏ Numbers 15

Өргүлдер дугайында немелде дүрүм-хоойлулар

1Дээрги-Чаяакчы Моисейге мынча деп чугаалаан: 2«Израиль чонга мону дамчыдып чугаала. Мээң силерге берип турарым, ээлеп чурттаарыңар черже кире бергеш, 3Дээрги-Чаяакчыга таарымчалыг чаагай чыттыг өргүлдерден салыр силер ^a. Бүрүн өрттедир өргүл ^b база өске-даа: азы онза даңгырак күүседирде салыр, азы эки тура-биле салыр ^c, азы байырлалдарыңарда салыр ^d өргүлдер кылдыр бода-даа, шээр-даа малыңарны эккээр силер.

4– 5Бир эвес өргүп турар малы хураган болза, Дээрги-Чаяакчыга ону салып турар кижи ооң-биле кады далган-тараа өргүлүн: бир гинниң дөрттүң бири хире олива үзү холаан, бир эфаның оннуң бири хире эң шынарлыг кызыл-тас далганын база өргүзүн. Бүрүн өрттедир өргүлдү азы өске-даа өргүлдү салып тура, хураган бүрүзү-биле кады бир гинниң дөрттүң бири хире арага өргүлүн база эккеп чаш.

6Бир эвес өргүп турар малы кошкар болза, ооң-биле кады далган-тараа өргүлүн: бир гинниң үштүң бири хире олива үзү холаан, бир эфаның оннуң ийизи хире эң шынарлыг кызыл-тас далганын база эккеп сал, 7ол ышкаш бир гинниң үштүң бири хире арага өргүлүн база эккеп чаш – Дээрги-Чаяакчыга таарымчалыг чаагай чыттыг өргүл ол-дур.

8Бир эвес азы бүрүн өрттедир, азы онза даңгырак күүседир, азы эп-найырал өргүлү ^e кылдыр Дээрги-Чаяакчыга буга эккеп салып турар болзуңза, 9ооң-биле кады далган-тараа өргүлүн: чартык гин хире олива үзү холаан, бир эфаның оннуң үжү хире эң шынарлыг кызыл-тас далганын база эккеп сал, 10ол ышкаш чартык гин хире арага өргүлүн эккеп чаш – Дээрги-Чаяакчыга таарымчалыг чаагай чыттыг, отка өрттедир өргүл ол-дур ^f. 11Дээрги-Чаяакчыга буганы, кошкарны, хойну, өшкүнү өргүп турар саныңарда-ла, ынчалдыр кылыңар. 12Чеже малды эккеп өргүп турар-дыр силер, оларның баш бүрүзү-биле ынчалдыр кылыңар.

13Дээрги-Чаяакчыга таарымчалыг чаагай чыттыг, отка өрттедир өргүлдү эккеп салып тура, Израильдиң үндезин чурттакчызы болур кижи бүрүзү ынчалдыр кылыр ужурлуг. 14Бир эвес силерниң араңарда түр када чурттап чоруур даштыкы кижи азы силерниң араңарда салгалдан салгал дамчып чурттап чоруур өске сөөк кижи Дээрги-Чаяакчыга таарымчалыг чаагай чыттыг өргүл салып турар болза, силерниң кылып турарыңар дег, база ынчалдыр кылыр ужурлуг. 15Израиль чон, силерге-даа, араңарда чурттап чоруур даштыкы кижиге-даа чаңгыс-ла хоойлу ^g – силерниң шупту салгалдарыңарга кезээ мөңгеде күштүг хоойлу турар ужурлуг: силер-даа, өскээртен келген кижи-даа Дээрги-Чаяакчының мурнунга ылгал чок болур. 16Силерге-даа, араңарда чурттап турар даштыкы кижиге-даа чаңгыс-ла ол хоойлу, чаңгыс-ла ол дүрүм турзун».

17Дээрги-Чаяакчы оон Моисейге мынча деп чугаалаан: 18«Израиль чонга мону дамчыдып чугаала. Силерни эдертип бар чыдарым черге чеде бергеш, 19ол черге үнген далган-тарааны чип тура ^h, Дээрги-Чаяакчыга онза өргүлден салыңар: 20тарааңарның баштайгы дүжүдүнден хаарган чуга далганны өргүңер – ону тараа шаңындан өргүл кылдыр салыңар. 21Тарааңарның баштайгы дүжүдүнден онза өргүлдү Дээрги-Чаяакчыга салгалдан салгал дамчып салыңар».

Частырыг болуп үүлгеттинген бачыттар дээш өргүл дугайында

22«Бир эвес Дээрги-Чаяакчының Моисейге чугаалаан хамык айтыышкыннарының кайы-бирээзин частырыг болуп күүсетпейн барзыңарза ⁱ, чүү боорул? 23А Дээрги-Чаяакчы ол айтыышкыннарны Моисейни дамчыштыр силерге берген, олар Дээрги-Чаяакчының берген хүнүнден эгелээш, салгалдан салгал дамчып күштүг болгай. 24Кандыг-бир айтыышкын ниитилелдиң чедир көрбээни-биле частырыг болуп күүсеттинмээн болза ^j, бүгү ниитилел бир бугажыкты Дээрги-Чаяакчыга таарымчалыг чаагай чыттыг бүрүн өрттедир өргүл кылдыр эккеп салзын, ооң-биле кады далган-тараа өргүлүн болгаш арага өргүлүн салзын база бачыт дээш өргүл кылдыр бир дүктүгүр хунаны салзын.

25 Бурганның бараалгакчызы бүгү израиль ниитилелди арыглап каарга, олар өршээттирер, чүге дээрге частырыг болган-дыр, а олар Дээрги-Чаяакчыга өрттедир өргүлдү эккеп салган-дыр база боттарының частырыы дээш Дээрги-Чаяакчының мурнунга бачыт дээш өргүлдү эккеп салган-дыр. 26Бүгү израиль ниитилел база оларның аразында чурттап турар даштыкы кижи өршээттирер, чүге дээрге бүгү чон бачытты частырыг болуп үүлгеткен-дир.

27А бир эвес чүгле чаңгыс кижи частырыг болуп бачыт үүлгеткен болза, ол кижи бир харлыг өшкүнү бачыт дээш өргүл кылдыр эккеп салзын ^k. 28Дээрги-Чаяакчының мурнунга частырыг болуп бачыт үүлгеткен кижини бараалгакчы арыглап каар – ол кижи арыглаттына бээр база өршээттирер. 29Кандыг-бир кижи частырыг болуп бир чүве үүлгедир болза, израиль чоннуң аразынга төрүттүнген кижиге-даа, силерниң араңарда чурттап турар даштыкы кижиге-даа хамаарыштыр силерге чаңгыс хоойлу турзун ^l.

30А бир эвес үндезин чурттакчылар аразындан азы өскээртен келген улус аразындан кандыг-бир кижи кара өжегээр бачыт үүлгедир болза ^m, ол кижи Дээрги-Чаяакчыны дорамчылап турар-дыр, ону чонунуң аразынга амылыг арттырбас ужурлуг. 31Ол кижи Дээрги-Чаяакчының сөзүн тооваан-дыр база Ооң айтыышкынын үрээн-дир; ону амылыг арттырбас ужурлуг, ол кижи буруузун боду чүктезин».

Амыр-дыш хүнүн сагываан кижи дугайында

32Израиль чон ээн кургаг ховуга турда, улус амыр-дыш хүнүнде ыяш чыып турган кижи эскерип каан ⁿ. 33Ооң ыяш чыып турганын эскерип каан улус ону Моисей биле Ааронга база бүгү ниитилелге эккелген. 34Ол кижи-биле чүнү канчаары тодараттынмаан болгаш, ону хоругдап каан ^o.

35Дээрги-Чаяакчы Моисейге: «Ол кижи өлүр ужурлуг ^p, ону бүгү ниитилел турлаг даштынга даштар-биле соп каапсын» – дээн ^q. 36Бүгү чон демги кижини турлагдан ырады бергеш, даштар-биле соп каапкан; Дээрги-Чаяакчының Моисейге дужааганын ёзугаар ол өлүп калган.

Дүрүм-хоойлу дугайында сагындырыг

37Дээрги-Чаяакчы Моисейге мынча деп чугаалаан: 38«Израиль чонга мону дамчыдып чугаала. Олар салгалдан салгал дамчып боттарының хептериниң кыдыгларынга салбактардан кылып ап чорзун ^r база ол салбактарже көк өңнүг удазыннардан киир өрүп ап чорзун. 39Удазыннар салбактарга чорзун, а силер оларже көргеш, Дээрги-Чаяакчының шупту айтыышкыннарын сактып, оларны күүседип чоруур силер база силерни самыыралче киир тыртып турар чүрээңер биле карааңарны эдербейн баар силер. 40Ынчан силер Мээң шупту айтыышкыннарымны сактып, күүседиңер, Бурганыңар дээш ыдыктыг болуңар ^s. 41Мен дээрге силерни египет черден силерге Бурган болур дээш үндүре берген Дээрги-Чаяакчы Бурганыңар-дыр мен. Мен – Бурганыңар Дээрги-Чаяакчы-дыр мен ^t».