Num 21 | TyvTUV | STEP | Негевте Арадтың хананей хааны израиль чоннуң Афаримче баар орук-биле бар чыдарын дыңнап кааш, оларга удур тулчуп үнгеш, элээн каш кижини тудуп алгаш барган .

‏ Numbers 21

Хананей чон-биле тулчуушкун

1 Негевте Арадтың хананей хааны израиль чоннуң Афаримче баар орук-биле бар чыдарын дыңнап кааш, оларга удур тулчуп үнгеш, элээн каш кижини тудуп алгаш барган ^a. 2 Израиль чон Дээрги-Чаяакчыга: «Бо чонну бистиң холувуска хүлээдип бээр болзуңза, оларның хоорайларын Сеңээ тураскаадып, бүрүнү-биле узуткап каар бис ^b» – деп даңгыраглаан ^c. 3 Дээрги-Чаяакчы израиль чонну дыңнап кааш, хананейлерни ооң холунга хүлээдип берген. Израильчилер оларны-даа, оларның хоорайларын-даа бүрүнү-биле узуткап кааш, ол черге Хорма ^{▼▼ Хорма – «Бүрүнү-биле узуткаан» дээн уткалыг ат (Башт. 1:17 көр).} деп ат тывыскан.

Чес чылан

4 Израильчилер Ор дагдан Кызыл далайже баар орук-биле эдом черни оюп чорупканнар ^e. Орук ара улустуң шыдамыы чидип, 5 Бурган биле Моисейже: «Бисти Египеттен чүге үндүрүп эккелдиңер, ээн кургаг ховуга өлзүн дээш бе? Мында аъш-чем-даа, суг-даа чок-тур, а бо ческинчиг аъш-чем хөңнүвүске дээпти» – деп хыйланып эгелээн ^f.

6 Дээрги-Чаяакчы ынчан чонче хоранныг чыланнар салыптарга, олар улусту шап туруп бээрге, хөй израильчилер өлүп хораан. 7 Чон Моисейге чедип келгеш: «Дээрги-Чаяакчыга болгаш сеңээ удур чүве чугаалап, бачыт үүлгеттивис. Ол чыланнарны бистен ырадыр кылдыр Дээрги-Чаяакчыга мөргүп көрем» – дээн.

8 Моисей чон дээш мөргүл кылырга, Дээрги-Чаяакчы аңаа: «Бодуңга чылан дүрзүзүнден кылып алгаш, ону тук сывынга бедидир быжыглап ал. Чыланга шактырган кижи бүрүзү ынаар көрүпкеш, амылыг артар» – дээн. 9 Моисей чес чылан дүрзүзү кылып алгаш, ону тук сывынга бедидир быжыглап каан. Чылан кижини шапкан болза, ол кижи чес чыланче көрүпкеш, амылыг артып каап турган ^g.

Моавче орук

10 Израиль чон ол черден көжүп үнгеш, Овот деп черге доктааган ^h. 11 Овоттан көжүп үнгеш, Ийе-Аварим деп черге – Моавтан чөөн чүкче углай чыдар ээн кургаг ховуга доктааган ⁱ. 12 Оортан көжүп үнгеш, Заред деп шынаага доктааган ^j. 13 А оортан көжүп үнгеш, ээн кургаг ховуга, амор черниң девискээринден үндүр агып чыдар Арнон хемниң эриинге доктааган ^k, а Арнон Моавтың кызыгаары болур ^l, ол хем моав биле амор черлерниң аразында чыдар чүве-дир. 14 Ынчангаш «Дээрги-Чаяакчының дайын-чааларының номунда» 15 Суфтуң девискээринде Вагеб хоорай, Арнон шынаалары болгаш Моавтың кызыгаарында Ар хоорайга ^m чедир аккан суглар дугайында бижээн.

16 Израиль чон оортан Беэрже ^{▼▼ Беэр – «кудук» дээн уткалыг сөс.} көжүп үнген – ол чер дээрге Дээрги-Чаяакчының Моисейге: «Чонну чыывыт, оларга сугдан берейн» – деп турган кудуу болган. 17 Израиль чон ынчан бо ырны ырлап берген:

«Сууң долу-ла болзун, кудук!
Кудукту алгап ырлаңар.
18 Нояннарның казып кааны,
чоннуң баштыңчыларының даянгыыштары
болгаш мергелери-биле казып кааны кудук-тур сен!»

Ээн кургаг ховудан олар Матаннаже чорупканнар. 19 Чон Матаннадан көжүп үнгеш, Нагалиилче, оон Нагалиилден Вамотче көжүп үнген. 20 А Вамоттан көжүп үнгеш, Моавтың оргулаажында турар, ээн кургаг ховуже көрүнген Фасги сынның эдээнде чаттылган шынааже чорупкан.

Сигон биле Ог хааннарның аштырганы

(Ы. х. к. 2:24—3:11; Башт. 11:19-22)

21 Израиль чон Сигон дээр амор хаанче төлээлекчилерин чорудуп, мындыг сөс дамчыткан: 22 «Силерниң чериңер таварты эрте бээрин биске чөпшээреп көрүңер. Силерниң шөлдериңер биле виноград тараан черлериңерни таварбас бис, кудуктарыңардан суг узуп ишпес бис, Хаан Оруу-биле чорупкаш, силерниң кызыгаарыңарны эртпээн шаавыста, ол оруктан үнмес бис ^o».

23 Ынчалза-даа Сигон хаан израиль чонга бодунуң девискээрин дамчыштыр эртерин чөпшээревээн. Ол бодунуң шупту албаты чонун чыып алгаш, израиль чон-биле тулчур дээш ээн кургаг ховуже үнгеш, Иааца деп черге олар-биле чаалашкан. 24 Израиль Сигонну хылыш-биле тиилеп кааш, ооң черин Арнон хемден Иавок хемге чедир эжелеп алгаш, аммон чоннуң чериниң бетинге доктааган, чүге дээрге ол чоннуң кызыгаары быжыг камгалалдыг турган ^p. 25 Израиль аморларның хамык хоорайларын эжелеп алгаш, оларны ээлеп чурттай берген. Израильчилер Эсевон деп найысылал хоорайны база ооң чоок-кавызында хоорайжыгаштарны эжелеп алган; 26 а Эсевон болза амор хаан Сигоннуң чурттап турган хоорайы-дыр. Сигон Моавтың биеэги хааны-биле чаалашкаш, ооң бо черин Арнонга чедир хунаап алган чүве-дир.

27 Ынчангаш чечен-мерген кижилерниң мынча дижир ужуру ол:

«Эсевонга чедип келиңер,
Сигоннуң хоорайы туттунуп, катап тургустуна берзин.
28 Эсевондан от, Сигоннуң хоорайындан чалбыыш өөскээш,
Моавтың Ар хоорайын база Арнон кыдыында Вамоттуң ээлерин
өрттендир чипти ^q.
29 Моав, ат болган сен!
Хамос бурганның чону ^r, узуткаттырып алган сен!
Хамостуң эр улузу дезе берген,
кыс улузу амор хаан Сигонга туттуруп алган.
30 А бис аморларны согуннар-биле адып, базып кагдывыс.
Эсевондан Дивонга чедир ^s хоорайларны бузуп кааптывыс,
Медева чоогунда ^t Нофа хоорайга чедир хоозураттывыс».

31 Израиль чон ынчалдыр амор черни ээлеп чурттай берген. 32 Моисей Иазер хоорайны ^u хайгыылдап көрзүн дээш улус айбылап чоруткан соонда, израильчилер ол хоорайны, ооң чоок-кавызында хоорайжыгаштарны эжелеп алгаш, аңаа чурттап турган аморларны үндүр сывырыпкан.

33 Оон израиль чон өскээр эггеш, Васанче шиглей чорупкан. Васанның хааны Ог шупту албаты чону-биле израильчилерге удур тулчуп үнгеш, Эдрея чанынга олар-биле чаалашкан ^v. 34 Дээрги-Чаяакчы Моисейге: «Ол хаандан кортпа, ону база ооң шупту албаты чону биле чуртун сээң холуңга хүлээдип бээр мен; сен ону Эсевонга чагырып турган амор хаан Сигонну ышкаш аажылаар сен» – дээн ^w.

35 Израильчилер Ог хаанны, ооң оолдарын, шупту албаты чонун узуткап кааннар, чаңгыс-даа кижи дириг арттырбааннар, а оон ооң черин эжелеп алганнар.