Num 25 | TyvTUV | STEP | Израиль чон Ситтимге турлагжып алган турда , израиль эр улус моав кыстар-биле самыын харылзаа тудуп эгелээн.

‏ Numbers 25

Израильдиң дүрзү-бурганнарга мөгейип турганы

1 Израиль чон Ситтимге турлагжып алган турда ^a, израиль эр улус моав кыстар-биле самыын харылзаа тудуп эгелээн. 2 Моав кыстар боттарының бурганнарынга өргүл салып тура, израиль эр улусту чалап аарга, олар өргүл малының эъдин чип, моав бурганнарга мөгейип эгелээннер ^b. 3 Израиль чон Фегор дагның бурганы Ваалче чайгыла бээрге, Дээрги-Чаяакчының килеңи Израильге удур кыптыга берген ^c.

4 Дээрги-Чаяакчы Моисейге: «Чоннуң шупту даргаларын эккеп алгаш, оларны чырыкта, хөйге көзүлдүр өлүргеш, мага-боттарын Дээрги-Чаяакчының мурнунга азып каг ^d. Мээң килеңим ынчан Израильден чайлай бээр» – дээн.

5 Моисей израиль баштыңчыларга: «Кижи бүрүзү бодунуң аймаанда Фегорнуң бурганынче чайгыла берген улусту өлүрүп кагзын» – дээн.

6 Моисей биле бүгү израиль чон Ужуражылга майгынынче кирер чер чанынга качыгдап ыглажып турган үеде, бир израиль кижи чедип келгеш, Моисей биле бүгү израиль ниитилел көрүп турда, бодунуң дөргүл-төрели улуска мадиан херээжен кижини эккеп көргүскен. 7 Аарон бараалгакчының оглу Элеазарның оглу Финеес ^e болган чүүлдү көрүп кааш, чон аразындан үнгеш, холунга чыдазын тудуп алгаш, 8 демги израиль эр кижиниң соондан ооң майгынынче киргеш, эр-херээжен ийи кижини каътташтыр өттүр шанчып каан ^f. Чыда херээжен кижиниң иштинче кадалы берип, олар иелээ өлүп калган. Ынчан израиль чонну кырып турган айыыл-халап соксай берген ^g. 9 А ол айыыл-халаптан шупту 24 000 кижи өлген чүве-дир.

10 Дээрги-Чаяакчы Моисейге мынча деп чугаалаан: 11 «Аарон бараалгакчының оглу Элеазарның оглу Финеес Мээң килеңимни израиль чондан чайладыпты; ол Мен дээш хүннээшкинин улус аразынга көргүстү, ынчангаш израиль чонну Бодумнуң хүннээшкиним дээш узуткавайн бардым; 12 ынчангаш мону чугаала. Мен Финеес-биле эп-найыралдың дугуржулгазын чарып тур мен ^h. 13 Ол дугуржулга дээрге аңаа болгаш ооң үре-салгалынга ⁱ кезээ мөңгеде Бурганның бараалгакчылары бооп артарының дугуржулгазы-дыр, чүге дээрге ол бодунуң Бурганы дээш хүннээчел хамаарылга көргүзүп, израиль чондан Мээң килеңимни чайладып кагды».

14 Мадиан херээжен-биле кады өлүрткен израиль эр кижи Симеоннуң аймаанда бир төрел бөлүктүң баштыңы турган, ооң ады – Салунуң оглу Зимри чүве-дир; 15 а өлүртүп каан мадиан херээженниң ады – Хазва чүве-дир; ол херээжен мадиан аймактарның бирээзиниң баштыңы Цур деп кижиниң уруу турган ^j.

16 Дээрги-Чаяакчы Моисейге мынча деп чугаалаан: 17 «Мадиан чон-биле өжээннежип, оларны узуткаңар ^k, 18 чүге дээрге олар силерниң дайзыннарыңар болу берген, сагыжы кара болгаш, силерни Фегорнуң бурганы-биле база мадиан баштың кижи уруу Хазва деп херээжен-биле дуурайлап алган улус-тур». Фегорнуң бурганынга мөгейген дээш, чонну айыыл-халап-биле кырып турган хүнде ол херээженни өлүрүп каан чүве-дир.