Num 26 | TyvTUV | STEP | Шак ол айыыл-халап эрте берген соонда, Дээрги-Чаяакчы Моисейге база Аароннуң оглу Элеазар бараалгакчыга:

‏ Numbers 26

Израиль чоннуң ийиги чизе-бүрүткели

1 Шак ол айыыл-халап эрте берген соонда, Дээрги-Чаяакчы Моисейге база Аароннуң оглу Элеазар бараалгакчыга: 2 «Бүгү израиль ниитилелдиң санаашкынын кылып калыңар, чээрби хардан өрү назылыг, Израильде шериг албаны эрттирип шыдаар шупту эр улусту төрел бөлүктер барымдаалап санаңар» – деп чугаалаан ^a.

3 Моисей биле Элеазар бараалгакчы ол үеде Моавтың ховуларынга, Иордан хемниң кыдыынга, Иерихоннуң дужунга турлагжып турган израиль чонга: 4 «Дээрги-Чаяакчының Моисейге дужааганын ёзугаар чээрби хардан өрү назылыг шупту эр улусту санаңар» – деп чугаалаан. Египет черден үнүп келген израиль чоннуң сан-даңзызы бо-дур.

5 Израильдиң улуг оглу Рувимниң үре-салгалы болгаш олардан укталган төрел бөлүктер бо-дур ^b: Энохтан – энох төрел бөлүк, Фаллудан – фаллу төрел бөлүк, 6 Хецрондан – хецрон төрел бөлүк, Хармиден – харми төрел бөлүк ^c. 7 Рувимден укталган төрел бөлүктер ол-дур. Оларның ниити саны 43 730 эр кижи болган ^d.

8 Фаллунуң бир оглун Элиав дээр турган. 9 А Немуил, Дафан болгаш Авирон олар Элиавтың оолдары турган. Дафан биле Авирон дээрге израиль ниитилелден шилиттинген, Моисей биле Ааронга удур үймээн үндүрүп, Дээрги-Чаяакчыга удур тура халаан Корахка болгаш ооң талалакчыларынга каттышкан улус ол чүве-дир ^e. 10 Ынчан чер, аксын аазадыпкан дег, оларны болгаш Корахты ажырыпкан, оларның хамык талалакчылары база өлүп калган, от 250 кижини чипкен ^f; олар ынчан израиль чонга сагындырыышкын болу берген турган. 11 Ынчалза-даа Корахтың оолдары өлбейн барган чүве-дир ^g.

12 Симеоннуң үре-салгалы болгаш олардан укталган төрел бөлүктер бо-дур ^h: Немуилден – немуил төрел бөлүк, Яминден – ямин төрел бөлүк; Яхинден – яхин төрел бөлүк, 13 Зерахтан – зерах төрел бөлүк, Саулдан – саул төрел бөлүк. 14 Симеоннуң аймаанда төрел бөлүктер ол-дур. Оларның ниити саны 22 200 эр кижи болган ⁱ.

15 Гадтың үре-салгалы болгаш олардан укталган төрел бөлүктер бо-дур ^j: Цефондан – цефон төрел бөлүк, Хаггиден – хагги төрел бөлүк, Шуниден – шуни төрел бөлүк, 16 Озниден – озни төрел бөлүк, Эриден – эри төрел бөлүк, 17 Ародтан – арод төрел бөлүк, Арелиден – арели төрел бөлүк. 18 Гадтың үре-салгалындан укталган төрел бөлүктер ол-дур. Оларның ниити саны 40 500 эр кижи болган ^k.

19 – 20 Иуданың үре-салгалы болгаш олардан укталган төрел бөлүктер бо-дур (ооң Ир биле Онан деп ийи оглу база турган, ынчалза-даа олар ханаан черге өлүп калганнар): Шеладан – шела төрел бөлүк, Фарестен – фарес төрел бөлүк, Зерахтан – зерах төрел бөлүк ^l. 21 Фарестиң төрел бөлүктери бо-дур: Хецрондан – хецрон төрел бөлүк, Хамулдан – хамул төрел бөлүк. 22 Иудадан укталган төрел бөлүктер ол-дур. Оларның ниити саны 76 500 эр кижи болган ^m.

23 Иссахарның үре-салгалы болгаш олардан укталган төрел бөлүктер бо-дур ⁿ: Толадан – тола төрел бөлүк, Фувадан – фува төрел бөлүк, 24 Иашувтан – иашув төрел бөлүк, Шимрондан – шимрон төрел бөлүк. 25 Иссахардан укталган төрел бөлүктер ол-дур. Оларның ниити саны 64 300 эр кижи болган ^o.

26 Завулоннуң үре-салгалы болгаш олардан укталган төрел бөлүктер бо-дур ^p: Середтен – серед төрел бөлүк, Элондан – элон төрел бөлүк, Яхлеилден – яхлеил төрел бөлүк. 27 Завулондан укталган төрел бөлүктер ол-дур. Оларның ниити саны 60 500 эр кижи болган ^q.

28 Иосиф Манассия биле Эфрем деп ийи оолдуг турган ^r, оларның үре-салгалы болгаш олардан укталган төрел бөлүктер бо-дур. 29 Манассияның төрел бөлүктери бо-дур ^s: Махирден – махир төрел бөлүк, Махирниң оглу Галаадтан – галаад төрел бөлүк.

30 Галаадтың үре-салгалындан укталган өске төрел бөлүктер бо-дур: Иезерден – иезер төрел бөлүк, Хелектен – хелек төрел бөлүк, 31 Асриилден – асриил төрел бөлүк, Шехемден – шехем төрел бөлүк, 32 Шемидадан – шемида төрел бөлүк, Хеферден – хефер төрел бөлүк.

33 Хеферниң оглу Салпаад оолдары чок, а чүгле кыстарлыг кижи турган, ооң кыстарының аттары бо-дур: Махла, Ноа, Хогла, Милка болгаш Тирца ^t. 34 Манассиядан укталган төрел бөлүктер ол-дур. Оларның ниити саны 52 700 эр кижи болган ^u.

35 Эфремниң үре-салгалы болгаш олардан укталган төрел бөлүктер бо-дур ^v: Шутелахтан – шутелах төрел бөлүк, Бехерден – бехер төрел бөлүк, Тахандан – тахан төрел бөлүк. 36 А Шутелахтың оглу Арандан – аран төрел бөлүк. 37 Эфремниң үре-салгалындан укталган төрел бөлүктер ол-дур. Оларның ниити саны 32 500 эр кижи болган ^w. Иосифтиң үре-салгалындан укталган төрел бөлүктер ол-дур.

38 Вениаминниң үре-салгалы болгаш олардан укталган төрел бөлүктер бо-дур ^x: Беладан – бела төрел бөлүк, Ашбелден – ашбел төрел бөлүк, Ахирамдан – ахирам төрел бөлүк, 39 Шуфамдан – шуфам төрел бөлүк, Хуфамдан – хуфам төрел бөлүк. 40 Бела Ард биле Нееман деп ийи оолдуг турган; Ардтан – ард төрел бөлүк, Неемандан – нееман төрел бөлүк укталган. 41 Вениаминниң үре-салгалы болгаш олардан укталган төрел бөлүктер ол-дур. Оларның ниити саны 45 600 эр кижи болган ^y.

42 Данның үре-салгалы болгаш олардан укталган төрел бөлүктер бо-дур ^z: Шухамдан – шухам төрел бөлүк; Данның төрел бөлүк аайы-биле үре-салгалы ол-дур. 43 Шухамдан укталган төрел бөлүк ол-дур. Оларның ниити саны 64 400 эр кижи болган ^aa.

44 Асирниң үре-салгалы болгаш олардан укталган төрел бөлүктер бо-дур ^ab: Имнадан – имна төрел бөлүк, Ишвадан – ишва төрел бөлүк, Бриядан – брия төрел бөлүк. 45 Бриядан укталган өске төрел бөлүктер бо-дур: Хеверден – хевер төрел бөлүк, Малхиилден – малхиил төрел бөлүк. 46 Асирниң Серах деп аттыг уруу база турган. 47 Асирниң үре-салгалындан укталган төрел бөлүктер ол-дур. Оларның ниити саны 53 400 эр кижи болган ^ac.

48 Неффалимниң үре-салгалы болгаш олардан укталган төрел бөлүктер бо-дур ^ad: Яхцеилден – яхцеил төрел бөлүк, Гуниден – гуни төрел бөлүк, 49 Иецерден – иецер төрел бөлүк, Шиллемден – шиллем төрел бөлүк. 50 Неффалимниң үре-салгалындан укталган төрел бөлүктер ол-дур. Оларның ниити саны 45 400 эр кижи болган ^ae.

51 Ынчалдыр түңнеп кээрге, израиль чоннуң ниити саны 601 730 эр кижи болган ^af.

52 Дээрги-Чаяакчы Моисейге мынча деп чугаалаан: 53 «Бо аймактарга черни, санаашкынны эрткен кижилер санын барымдаалап, үлүглей хуваар ужурлуг ^ag. 54 Хөй санныг аймак хувааглыг черниң улуг кезээн, а эвээш санныг аймак – эвээш кезээн алзын ^ah. Аймак бүрүзүнге хувааглыг черни, ооң санаашкынны эрткен улузунуң санын барымдаалап, бээр ужурлуг. 55 Төлге даштары октааш, кымның каяа чурттаарын тодарадыр ужурлуг, улус ада-өгбелеринден укталган аймактарының адын эдилээн хувааглыг черлерни алзын. 56 Хөй санныг-даа, эвээш санныг-даа аймакка черни төлге даштары октааш, үлүглей хуваар ужурлуг».

Левиттерниң санаашкыны

(Хост. 6:16-25; 1 Чыл. 6:1-3, 16-30)

57 Төрел бөлүктер аайы-биле левиттерде санаашкын эрткен улус бо-дур: Гирсондан – гирсон төрел бөлүк, Кохаттан – кохат төрел бөлүк, Мерариден – мерари төрел бөлүк. 58 Левийден укталган өске төрел бөлүктер бо-дур: ливни төрел бөлүк, хеврон төрел бөлүк, махли төрел бөлүк, муши төрел бөлүк, корах төрел бөлүк.

А Амрам Кохаттан укталган турган. 59 Амрамның кадайының адын Иохаведа дээр чүве-дир, ол херээжен Левийниң уруу, Египетке Левийниң аймаанга төрүттүнген кижи турган. Иохаведа бодунуң ашаа Амрамга Ааронну, Моисейни болгаш ол ийи оолдуң угбазы Мариамны божуп берген.

60 Аарон болза Надав, Авиуд, Элеазар болгаш Ифамар оларның ачазы турган ^ai. 61 Надав биле Авиуд Дээрги-Чаяакчының мурнунга Ооң таарымчалыг деп көрбээни от салгаш, өлүп калган ^aj.

62 Левиттерниң ниити саны – бир айдан өрү назылыг – 23 000 эр кижи болган ^ak. Оларны израиль чон-биле катай санаваан, чүге дээрге израиль чоннуң аразынга оларга хувааглыг чер бербээн турган.

63 Моисей биле Элеазар бараалгакчының санап каан улузу ол-дур. Израиль чон Моавтың ховуларынга, Иордан хемниң кыдыынга, Иерихоннуң дужунга турлагжып турда, олар санаашкынны кылып чоруткан. 64 Ол улустуң аразында Моисей биле Аарон бараалгакчы израиль чонну Синай ховузунга санап турда, чизе-даңзыже кирген улустуң чаңгызы-даа чок болган. 65 Чүге дээрге Дээрги-Чаяакчы ынчангы салгалдың улузу ээн кургаг ховуга өлүп каарын чугаалаан. Олардан чүгле Иефоннийниң оглу Халев биле Нуннуң оглу Иисус дириг арткан ^al.