Num 27 | TyvTUV | STEP | Салпаад деп кижи (ол дээрге Хеферниң оглу, Хефер Махирниң оглу, Махир Манассияның оглу, Манассия Иосифтиң оглу чүве-дир) беш кыстыг турган. Оларның аттары: Махла, Ноа, Хогла, Милка болгаш Тирца .

‏ Numbers 27

Салпаадтың кыстарының алыр үлүү

(Сан. 36:1-12)

1 Салпаад деп кижи (ол дээрге Хеферниң оглу, Хефер Махирниң оглу, Махир Манассияның оглу, Манассия Иосифтиң оглу чүве-дир) беш кыстыг турган. Оларның аттары: Махла, Ноа, Хогла, Милка болгаш Тирца ^a. 2 Ол беш кыс Ужуражылга майгынынга чедип келгеш, Моисей биле Элеазар бараалгакчының база баштыңнар биле бүгү израиль ниитилелдиң мурнунга туруп алгаш: 3 «Бистиң ачавыс ээн кургаг ховуга өлүп калган. Ол Дээрги-Чаяакчыга удур сүлчээ кылып чыглып келген улустуң – Корахтың талалакчыларының санынче кирбээн ^b, а бодунуң бачыдының ужун өлү берген кижи. А ол черле оолдуг бооп көрбээн. 4 Оолдуг болбаан-на дээш ачавыстың ады чүге ооң төрел бөлүүнден казыттынып чиде бээр ужурлугул? Ооң ха-дуңмазының ээлээн черлериниң аразынга биске база хувааглыг черден бериңерем» – дээннер ^c.

5 Моисей оларның херээн Дээрги-Чаяакчыга дыңнадырга, 6 Ол Моисейге мынча дээн: 7 «Салпаадтың кыстары шынын чугаалап турлар, ачазының ха-дуңмазының ээлээн черлериниң аразынга база хувааглыг черден үзүп, ооң уругларынга ээлээр өнчү кылдыр дамчыдып бер. 8 Израиль чонга мону чугаала. Бир эвес оолдуг болбаан кандыг-бир кижи өлүп калган болза, ооң хувааглыг черин уруунга дамчыдып бериңер; 9 а ол кижиниң уруу база чок болза, хувааглыг черин ооң кады төрээн ха-дуңмазынга дамчыдып бериңер; 10 ооң кады төрээн ха-дуңмазы база чок болза, хувааглыг черин ооң ачазының ха-дуңмазынга дамчыдып бериңер; 11 а бир эвес ол кижиниң ачазының ха-дуңмазы чок болза, хувааглыг черин ооң төрел бөлүүнден чоок төрели кижиге – ук черни салгап аар кылдыр – дамчыдып бериңер ^d». Дээрги-Чаяакчының Моисейге дужааганын ёзугаар ол бүгү израиль чонга доктаадып каан дүрүм-хоойлу болган.

Моисейниң соон салгаан чаа баштыңчы

12 Дээрги-Чаяакчы Моисейге мынча дээн: «Бо турар Аварим сынче үне бергеш, Мээң израиль чонга берип турарым черже көрүп көр ^e. 13 Ол черни көрүп алгаш, акың Аарон ышкаш, өгбелериңниң соондан өске оранче чоруй баар сен ^f. 14 Чүге дээрге силер Цин ховузунга израиль чон алгыш-кырыш үндүрүп турда, Мээң сөзүмге удурланып, суг чанынга чон мурнунга Мээң ыдыктыымны хүндүлевээн болгай силер». (Ол дээрге Цин ховузунда Кадес деп черде Мериваның суу чүве-дир.) ^g

15 Моисей Дээрги-Чаяакчыга мынча деп чугаалаан: 16 «Бүгү амылыг чүүлдү тынгарып турар Дээрги-Бурган-Чаяакчы ^h, бо ниитилелдиң бажынга бир кижиден шилип салып каап көрем. 17 Ол баштыңчы кижи оларны эдертип чорзун, дайын-чаа үезинде оларны баштазын, ынчан Дээрги-Чаяакчының чону кадарчы чок хойлар ышкаш болбас ⁱ».

18 Дээрги-Чаяакчы Моисейге харыылаан: «Нуннуң оглу Иисусту ^j – эрес-дидим ^{▼▼ «Эрес-дидим» деп сөстерниң болгу дег өске утказы мындыг: «Бурганның Сүлдезинге бүргеткен».} кижини – кыйгыртып алгаш, бодуңнуң холуңну аңаа дегзип каг; 19 ону Элеазар бараалгакчының база бүгү ниитилелдиң мурнунга тургускаш, олар көрүп турда, аңаа чонну баштаар даалгадан бер ^l; 20 бүгү израиль ниитилел ону тооп дыңнаар кылдыр ^m, бодуңнуң эрге-чагыргаңны ооң-биле үлеш. 21 Иисус шиитпир үндүрерде, Элеазар бараалгакчының мурнунга туруп алзын, демгизи ынчан урим ^{▼▼ Урим – Дээрги-Чаяакчының күзел-соруун тодарадырда, Бурганның бараалгакчыларының ажыглап турган херексели (Хост. 28:30 көр).} дузазы-биле Дээрги-Чаяакчының шиитпирин айтырып, ажыдып берзин. Иисус болгаш бүгү израиль чон чүнү-даа кылырда, Элеазарның сөзүн ёзугаар кылзын».

22 Моисей Дээрги-Чаяакчының аңаа дужааганын ёзугаар кылып, Иисусту кыйгыртып алгаш, Элеазар бараалгакчы биле бүгү чоннуң мурнунга тургускаш, 23 бодунуң холдарын аңаа дээскеш, чонну баштаар даалганы берген. Бүгү чүве Дээрги-Чаяакчының Моисейни дамчыштыр чугаалаанын ёзугаар күүсеттинген.