Num 34 | TyvTUV | STEP | Дээрги-Чаяакчы Моисейге мынча деп чугаалаан:

‏ Numbers 34

Ханаан черниң кызыгаарлары

(Иез. 47:13-21)

1 Дээрги-Чаяакчы Моисейге мынча деп чугаалаан: 2 «Израиль чонга мону дужаап чугаала. Ханаан черже кире бээриңерге, силерге ээлээр кылдыр хувааттынган черниң кызыгаарлары бо-дур.

3 Ооң мурнуу талазы Цин ховузундан ыңай, Эдомнуң кызыгаарын дургаар шөйлүр, силерниң мурнуу кызыгаарыңар Дус далайның мурнуу кыдыындан эгелээш, барыын чүкче шөйлүр ^a. 4 Ол кызыгаар мурнуу чүкке Акравим деп бедик черже шиглей шөйүлгеш, Цин ховузун таварып эрткеш, Кадес-Варниге чедер, оортан Гацар-Аддарга четкеш, Ацмонну таварып эртер. 5 Ацмондан ыңай кызыгаар Египет-биле кызыгаарда турар хемче шиглей шөйүлгеш, далайга чедер.

6 Барыын талакы кызыгаарыңар Улуг далай эрии болур.

7 Соңгу талакы кызыгаарыңарны Улуг далайдан Ор дагга ^b чедир демдектеңер, 8 а Ор дагдан Лево-Хаматка чедир демдектеңер ^c; кызыгаарның бурунгаар үне берген чери Цедадка чедер. 9 Оортан кызыгаар Цифронче шөйүлгеш, Гацар-Энанга чедер. Силерниң соңгу кызыгаарыңар ол-дур.

10 Чөөн кызыгаарыңарны Гацар-Энандан эгелеп алгаш, Шефамга чедир демдектеңер. 11 Чөөн кызыгаар Шефамдан Ривлаже ^d Аинниң чөөн талазындан шөйүлгеш, Киннерет хөлдүң ^{▼▼ Киннерет хөл – ол ышкаш Геннисарет хөл азы Галилея хөлү деп адап турар.} чөөн талакы эриктеринге чедер. 12 Ооң соонда Иордан хемниң кыдыын дургаар баткаш, Дус далайга чедер. Силерниң чериңерниң бүгү талалардан кызыгаарлары ол-дур ^f».

13 Моисей израиль чонга: «Дээрги-Чаяакчының тос аймакка база Манассияның аймааның чартыынга бээр кылдыр дужаап каан чери бо-дур, силер ону төлге даштары октааш, үлежип аар силер. 14 Чүге дээрге Рувимниң болгаш Гадтың аймактары төрел бөлүктер аайы-биле база Манассияның аймааның өске чартыы хувааглыг черлерин ап алган-дыр. 15 Ол ийи аймак база Манассияның аймааның ол чартыы боттарының хувааглыг черлерин Иорданның чөөн талазынга, Иерихоннуң дужунга ап алган болгай» – деп айтып-чагаан.

Черни үлеп-хуваар улустуң аттары

16 Дээрги-Чаяакчы Моисейге мынча деп чугаалаан: 17 «Черни силерге үлеп-хуваар улус бо-дур: Элеазар бараалгакчы биле Нуннуң оглу Иисус ^g. 18 Олар-биле кады черни хуваар кылдыр бир аймактан-на бир баштың кижиден ап алыңар. 19 Ол баштыңнарның аттары бо-дур:

Иуданың аймаандан – Иефоннийниң оглу Халев ^h;

20 Симеоннуң аймаандан – Аммиудтуң оглу Самуил;

21 Вениаминниң аймаандан – Кислоннуң оглу Элидад;

22 Данның аймаандан – Иоглийниң оглу Буккий;

23 Иосифтиң оглу Манассияның аймаандан – Эфодтуң оглу Ханниил;

24 Иосифтиң оглу Эфремниң аймаандан – Шифтанның оглу Кемуил;

25 Завулоннуң аймаандан – Фарнактың оглу Элицафан;

26 Иссахарның аймаандан – Азанның оглу Фалтиил;

27 Асирниң аймаандан – Шеломиниң оглу Ахиуд;

28 Неффалимниң аймаандан – Аммиудтуң оглу Педаил».

29 Ханаан черни израиль чонга үлеп-хуваар кылдыр Дээрги-Чаяакчының дужаал берген улузу ол-дур.