Obd | TyvTUV | STEP |

‏

Бодунуң кыска медээзинде Авдий медээчи улуургак Эдом күрүнени Бурган Бодунуң шилип алган чонунга удур ооң бачыттары дээш кезедир дээрзин баш бурунгаар чугаалап турар. Эдом Иудеядан мурнуу-чөөн талага, дыка хөй эрттинмес чалым-хаялыг даглыг черге турган. Эдомнуң найысылалы Селаның ады безин «чалым» дээн уткалыг. Дайзыннарга удур шак ол камгалалдан аңгыда, Эдом бодунуң мерген угаанныглары-биле алдаржаан турган. Үе-дүпте Эдомну израиль чоннуң өгбези болур Иаковтуң акызы Исавтың үре-салгалы ээлеп чурттай берген чүве-дир.

Бо медээни вавилон аг-шеригниң Иерусалимни бистиң эрага чедир 586 чылда үреп бусканының соонда бир-ле үеде медеглээн болгу дег. Бодунга төрел чон дээш сагыш човаар азы аңаа дузалажыр орнунга, Эдом Иудеяның эжелеттиргени дээш өжү ханып, амырап, харын-даа эжелекчиге дузалажып турган.

Эдомнуң буураан үези эки билдинмес. Бистиң эрага чедир IV векте эдом черни наватей чон чагырып алган. Рим күрүне үезинде Эдомнуң биеэги күжү биле ат-алдарындан ол черге чүгле Идумея деп ат артып калган.

‏ Obadiah

Эдом чоннуң кем-буруузу болгаш кеземчези

(Иер. 49:7-22)

1 Дээрги-Бурган-Чаяакчының Авдий медээчиже чоруткан көстүүшкүнү, Эдомнуң дугайында чугаалаан чүвези бо-дур ^a.

Дээрги-Чаяакчыдан келген медээни дыңнаан бис.
«Көдүрлүп үнгеш, Эдомга удур чаалажыылы!» – деп медээни
өске чоннарга чедирзин дээш,
айбычы кижини чоруткан турган.

2 «Дыңнап көр, Мен сени чоннар аразынга чөгенчиг чон кылып каар мен,
оларга аажок бак көрдүрер сен.
3 Турамык чорууң сени дуурайлап алган-дыр:
чалымнарда, бедик черде чурттап турар болгаш:
„Мени кым черже дүжүр октаптар боор?!“– деп чугааландың.
4 Сен, эзир куш дег, бедидир ужуп үне бээр-даа болзуңза,
уяңны сылдыстар аразынга-даа тудуп аар болзуңза,
Мен сени оортан-даа дүжүр октаптар мен – деп, Дээрги-Чаяакчы чугаалаан ^b. –

5 Хоозурап когараар деп чүвеңни!
Бир эвес сээң шөлүңче кат-чимис чыыкчылары кирип кээр болза,
олар элээн катты арттырып кагбас чүве бе?
Оорлар азы дүнеки үптекчилер сеңээ кээр болза,
олар чүгле бодунга чеже херегил, ынчаны оорлап албас бе?
6 А Исавтың үре-салгалының бүгү чүвезин үптеп-тонап,
ооң чажыт шыгжамырларын безин үжеп-чиндиири кайы хире-дир!
7 Сээң шупту эвилелчилериң сени чериңден үндүр ойладыптар,
сээң-биле эп-найыралдыг улус сени дуурайлааш, ажып тиилээр,
сээң аъш-чемиңни чип турган улус сеңээ дузак салыр.
Эдомга угаан-сарыыл артпас!»

8 Оон Дээрги-Чаяакчы мынча деп медеглээн:
«Эдомда мерген угаанныг улусту,
Исавтың даглыг чуртунда бодамчалыг улусту
Мээң шииткелим хүнүнде узуткап каар эвес ийик мен бе?
9 Теман чер ^c, сээң эрес-дидим улузуң коргуушкунга алзыр.
Исавтың даглыг чуртунга кымны-даа амылыг арттырбас.
10 Өлүрүкчү чорук кылып турарың дээш,
ха-дуңмаң болур Израильди бастып турарың дээш,
бак атка кирип, кезээ мөңгеде узуткаттырар сен.
11 Хары улус Израильдиң эртине-байлаан аппарып турда ^{d
,} ^{▼▼ Азы: «Израильдиң аг-шериин тудуп аппарып турда».},
даштыкы улус ооң эжик-хаалгазын дамчып Иерусалимче киргеш,
аңаа үлеш кылып турда ^f, сен кыдыынга көрүп турган сен,
ооң дайзыннарының бирээзи дег болган сен ^g.
12 Ха-дуңмаң айыыл-халапка таваржырга, хыың ханып, амырава!
Иудеяның чону өлүп турда, өөрүве!
Олар базындырып турда, аксың калбаңнатпа! ^h
13 Мээң чонум айыыл-халапка алзып аарга,
ооң эжик-хаалгазын дамчып кирбе!
Ол буурап каарга, ооң хай-халавынче топтап көрбе! ⁱ
Ол айыыл-халапка таваржы бээрге, ооң эт-хөреңгизинге дегбе! ^j
14 Ооң менди арткан улузун өлүрер дээш,
орук белдирлеринге кедеп, манап турба!
Ол базындырып турда, дириг арткан улузун дайзыннарга тудуп бербе!
15 Дээрги-Чаяакчының шииткелиниң хүнү
бүгү чоннарга чоокшулап келген-дир ^k:
өскелерни канчаар аажылап чораан болдур сен,
Бурган сени база ынчаар аажылаар ^l;
херектериңге дүгжүр кеземче бодуңнуң бажыңче суг кудар.
16 Килеңимниң дашказын Мээң чонумнуң ыдыктыг даамга ишкени дег ^m,
шупту өске чоннар база ону үргүлчү ижип, төндүр пактаар ⁿ,
олар оон шуут турбаан-даа ышкаш, кырлып чиде бээр».

Израильдиң эчизинде барып тиилээри

17 «А Сион даг ыдыктыг чер болур,
аңаа хоргадаан чон дириг артар ^o.
Иаковтуң үре-салгалы бодунуң өнчү черин ээлеп аар.
18 Иаковтуң үре-салгалы кыпкан от апаар,
Иосифтиң үре-салгалы чалбыыш апаар ^p,
а Исавтың үре-салгалы кургаг сиген апаргаш,
өрттеттирип, узуткаттырып аар,
олардан кым-даа дириг артпас».
Дээрги-Чаяакчының чугаалаан сөзү ол-дур.

19 Негев чурттакчылары Исавтың даглыг чуртун эжелеп аар,
Шефела чурттакчылары филистим чоннуң чуртун эжелеп аар;
олар Эфремниң черин – Самарияның чоок-кавызын эжелеп аар,
а Вениаминниң аймаа Галаад девискээрин эжелеп аар.
20 Израильдиң өскээр көжүртү берген аг-шерии
ханаан черни шуут-ла Сарептага ^q чедир эжелеп аар,
а Иерусалимниң өскээр көжүртү бергеш, Сефарадта чурттап турар чону
Негевтиң хоорайларын эжелеп аар.
21 Тиилекчи улус ^{▼▼ «Тиилекчи улус» – бо сөстерниң болгу дег өске уткалары мындыг: «Камгалакчылар» азы «Камгалал алган улус».} Сион дагга чедип келгеш,
Исавтың даглыг чуртун башкарып эгелээр.
Дээрги-Чаяакчының Чагыргазы тургустунар ^s.