Phili 2 | TyvTUV | STEP | Ынчангаш Христоска башкарткан амыдырал силерни канчаар-даа сорук киирер болза, Ооң ынакшылы силерге кандыг-даа аргалалды хайырлаар болза, Сүлде-биле кандыг-даа харылзаалыг болзуңарза, кандыг-даа энерел болгаш кээргээр сеткил силерде бар болза,

‏ Philippians 2

Христостуң үлегери-биле биче сеткилдиг болуңар

1 Ынчангаш Христоска башкарткан амыдырал силерни канчаар-даа сорук киирер болза, Ооң ынакшылы силерге кандыг-даа аргалалды хайырлаар болза, Сүлде-биле кандыг-даа харылзаалыг болзуңарза, кандыг-даа энерел болгаш кээргээр сеткил силерде бар болза, 2 мени мынчалдыр бүрүн аас-кежиктиг кылып каар силер: чаңгыс бодалдыг, чаңгыс ынакшылдыг болуңар ^a, сеткил-сагыжыңар эвин кадып, чаңгыс эчис сорулгалыг болуңар ^b. 3 Чүгле кандыг-даа чүвени бот тогдунгаш база адыыргааш ^c, кылбайн көрүңер. Харын томаарып, куду көрдүнгеш, өскелерни боттарыңардан өрү көрүңер ^d. 4 Силерниң кижи бүрүзү чүгле бодунуң эвес, а өскелерниң эрге-ажыының дугайында сагыш човаар ужурлуг ^e.

5 Бот-боттарыңар дугайында Христос Иисустуң бодаары дег бодап чоруңар.

6 Ол алыс бүдүжү-биле Бурган-даа чораан болза ^f,
Бодунуң Бурган-биле дең байдалындан салдынмайн туттунарын кыспаан.
7 Ооң орнунга Ол эки туразы-биле
Бодунда бар турган бүгү туруш-байдалдан ойталааш,
чалчаның бүдүжүн хүлээп ап ^g, кижи болу бергеш,
кижинии дег хевир-шырайлыг чедип келген ^h.
8 Христос Бурганга дыңнангырын көргүзүп ⁱ,
өлүмнү, белдир-ыяшка өлүмнү безин, хүлээп ап,
Бодун ындыг куду деңнелче бадырган!
9 Ооң ужурунда Бурган Ону эң бедик туруш-байдалче көдүргеш,
өске кандыг-даа ат-дужаалдардан артык ат-дужаалды тывыскан ^j.
10 Ынчангаш Иисустуң адынга хүндүлел кылдыр
дээрде, черде болгаш алдыы оранда дискек бүрүзү сөгүрүп олурар ^k,
11 Бурган Аданы алдаржыдары-биле Иисус Христос – Дээрги деп
дыл бүрүзү хүлээп көөр.

Камгалалыңар болбаазырадып, чайынналдыр чырыңар

12 Ынчангаш, ханы ынак эш-өөрүм, чүгле араңарга турган үемде эвес, харын оон-даа чугула – мен чок турумда, меңээ дыңнангыр болуп келгениңер дег, боттарыңарның камгалалыңарны Бурганга бүрүн хүндүткел-биле болбаазырадырын уламчылаңар-ла. 13 Чүге дээрге Бурган Боду силерниң араңарга Ооң соругдаан сорулгазынче чүткүүрүн-даа, ону күүседирин-даа боттандырып турар ^l.

14 Шупту чүвени хыйланмайн база кырышпайн кылыңар. 15 Ынчан бо үениң бачыттыг, самыыраан улузунуң аразында чурттап турар-даа болзуңарза, Бурганның бузутка борашпаан ажы-төлү дег, кем-буруу чок, арыг боор силер ^m. Оларның аразынга, октаргайда сылдыстар дег, чайынналдыр чырыыр силер ⁿ. 16 Мөңге амыдырал бээр медээден салдынмайн туттунуңар ^{▼▼ Азы: «Мөңге амыдырал дугайында медээни оларга чедириңер».}. Силерниң ынчаар кылганыңар ачызында, мээң бо чарышка киришкеним база үндүрген күжениим хилис барбаан-дыр деп ^p, Христостуң ээп кээр хүнүнде амыраар ийик мен. 17 Силерниң бүзүрелиңер – Бурганга салган өргүлүм дег; ам аңаа немей амы-тынымны өргүл кылдыр салыр апаар-даа болзумза ^q, ынчан безин өөрүп, ол өөрүшкүмнү силер-биле үлежир мен. 18 Ооң ужурунда силер база өөрүп-байырлаңар, мээң-биле өөрүшкүңер үлежиңер!

Павелдиң айбычылары Тимофей биле Эпафродит

19 Дээрги Иисустуң күзел-соруу ындыг болза, удавас Тимофейни ^r силерже чорудуптарымга идегеп тур мен ^s. Силерниң дугайыңарда ооң эккээр медээлери сеткилимни өөртүптер боор. 20 Силер дээш, ынчалдыр ёзулуг сагыш човаар, сеткил-хөңнүмнү үлежип чоруур өске ындыг кижи менде чок. 21 Чүге дээрге өске арткан улус Иисус Христоска күзенчиг чүүл дээш эвес, а чүгле боттарының эрге-ажыы дээш сагыш човаар-дыр ^t. 22 А Тимофейниң ажыл-херекке шылгаттынганын, мээң-биле кады, адазы биле оглу ышкаш ^u, Буянныг Медээге бараан болуп келгенин билир силер. 23 Ынчангаш, мээң херектерим кандыг байдалдыын билген дораан-на, ону силерже чорудуптарымга идегеп тур мен. 24 Дээрги-Чаяакчы-ла ону күзээр болза, силерге бодум база удавас чеде бээримге ыяк бүзүрээр мен.

25 Ол ышкаш мээң хереглелдеримче сагыш салзын дээш чорутканыңар эргелиг эживис, мээң ажыл-үүлемни эгин кожа кылчып, кады дайылдажып чоруур дуңмам Эпафродитти ^v силерже дедир чорударын эргежок чугула кылдыр көрдүм. 26 Чүге дээрге ол силерни дыка көрүксеп турар база ооң аараанының дугайында медээ силерге чеде берген дээрге, муңгарап турар. 27 Ол, шынап-ла, аажок аарааш, өлүр чазып турду, ынчалза-даа мээң муңгаралымга оон-даа улуг муңгарал немешпезин дээш, Бурган ону кээргеди (чүгле ону эвес, а мени база). 28 Ону көргеш, аажок өөрүүрүңерни билир мен, мээң муңгаралымны ол-ла харын чавырып тур. Ынчангаш ону силерже чорудар дээн күзелим күштелип кел чор. 29 Дээрги-Чаяакчыга башкарткаш, ону улуг өөрүшкү-биле уткуп хүлээп алыңар ^w база ындыг улусту кедергей хүндүлеп чоруңар ^x. 30 Чүге дээрге ол Христостуң ажыл-херээ дээш өлүр чазып, силерниң меңээ чедирип шыдаваан дузаңарны көргүзүп чедирип, меңээ бараан болур дээш, амы-тынын артынга каап чорду.