Phili 3 | TyvTUV | STEP | Ха-дуңма, түңнелинде чугаалаарым болза, Дээрги-Чаяакчы-биле харылзааңар ужун өөрүп-байырлаңар! Силерге чаңгыс-ла ол чүүлдү катап-катап бижиири меңээ берге эвес, а ону дыңнаары силерни айыылдан кадагалаар.

‏ Philippians 3

Христосту дамчыштыр кээр агартыышкын

1 Ха-дуңма, түңнелинде чугаалаарым болза, Дээрги-Чаяакчы-биле харылзааңар ужун өөрүп-байырлаңар! ^a Силерге чаңгыс-ла ол чүүлдү катап-катап бижиири меңээ берге эвес, а ону дыңнаары силерни айыылдан кадагалаар.

2 Бузут үүлгедикчилеринден кичээниңер! Мага-ботту кезип демдектээрин суртаалдап чоруурлардан кичээниңер! Ол ыттардан кичээниңер! ^b 3 Чүге дээрге ылап-ла кыртыжап демдектеткен улус – бис-тир бис ^c, Сүлдени дамчыштыр Бурганга бараан болган, Христос Иисус-биле мактанып шыдаар база мага-ботка кылган ёзулалдарга ынанмас улус-тур бис. 4 Шынап, ындыг ёзулалдарга бодум ынанып боор турдум. Менден аңгы кандыг-бир кижи оларга ынаныр барымдааларын хөй деп бодаар болза, мээңии оон-даа хөй ^d. 5 Төрүттүнгеш, сес хонганымда, кыртыжап демдектеттим ^e, израиль чондан, Вениаминниң аймаандан үнген ук-ызыгуурлуг мен ^f. Еврей ада-иеден төрүттүнген еврей боорда, ыдыктыг хоойлуга хамаарылгамны ап көөр болза, фарисей мен ^g. 6 Христиан ниитилелди эң чүткүлдүүм-биле истеп-сүрүп келдим ^h, ыдыктыг хоойлуну бүгү чүүлдерге хамаарыштыр бүрүнү-биле сагып келдим ⁱ.

7 Ынчалза-даа ынчан чедиишкиним деп санап чораан чүүлүмнү ам Христостуң ачызында хей хоозун деп санап тур мен. 8 Ол туржук, мээң Дээргим Христос Иисусту билип алырының өндүрүнге деңнээрге ^j, өске бүгү чүүл шуут херек чок деп санап тур мен. Иисусту бодааш, өске бүгү чүүлдү өдек дег үндүр октапкан мен. Чүгле Христос-биле харылзаам бар болзун, 9 чүгле Ооң-биле бүрүн катчып алыйн! Ыдыктыг хоойлуну дамчып кээр агартыышкынны эвес, а Христоска бүзүрээринден дөстелир, бүзүрел дамчыштыр Бургандан кээр агартыышкынны чедип алыйн! ^k 10 Мээң күзээн-не чүүлүм бо-дур: Христосту билип алыры, Ону өлүглер аразындан катап диргизипкен күштү билип алыры, Ооң көрген хилинчээн үлежип ^l, Ооң өлгени ышкаш өлүрү ^m. 11 Ынчаар кылгаш, канчап-чооп-даа болза өлүглер аразындан катап дирлиишкинни чедип алырымга идегээрим ол-дур.

Бурганның шаңналын чедип алыры-биле чүткүдүңер

12 Ол сорулгамны чедип ап, болбаазыраңгай апардым дивейн-дир мен ⁿ, ынчалза-даа Христос Иисустуң мени Бодунче хаара туткан сорулгазын чедип аар дээш, бар шаам-биле чүткүп чор мен. 13 Ха-дуңма, бодумну ол бүгүге четкен мен деп бодавадым, а чүгле соомда калган бүгү чүүлдү уттупкаш, мурнумда турар чүүлге чедери-биле чүткүп чор мен.

14 Христос Иисусту дамчыштыр алзын дээш, Бурганның мени кыйгырганы өрү шаңналче – бурунгаар чүткүп чор мен ^o. 15 Бис, угаан-сарыылы четчип, бышкан улус ^p, дөгере ындыг бодалдыг болзувусса эки. А кандыг-бир айтырыгже көрүжүңер бистиинден аңгы болза, Бурган ону база силерге тодарадып бээр. 16 Ындыг-даа болза, чүнү билип алган болдур бис, ооң аайы-биле улаштыр амыдырап көрээлиңер.

17 Ха-дуңма, мээң үлегеримни эдериңер ^q. Ол ышкаш силерге тодарадып бергенивис шын үлегерниң аайы-биле амыдырай берген өске улусче кичээнгей салып көрүңер. 18 Мооң мурнунда силерге чугаалап турган чүвемни, караам чажын төп, катаптап тур мен: хөй-ле улус Христостуң белдир-ыяшка өлүмүнүң дайзыннары дег амыдырап чорлар. 19 Оларның салым-чолу – өлүм-чидим ^r, оларның бурганы – хырын, олар боттарын бужартаткан чүүлдерни макталга төлептиг деп санап турар. Оларның байгы бодалдары чүгле бо делегейниң ажыл-херээнче угланган ^s. 20 А бистиң төрээн чуртувус – дээрлерде ^t. Камгалакчывыс, Дээрги Иисус Христостуң оортан кээрин манап турар бис ^u. 21 Ол Бодунуң бүгү чүүлдү чагырып шыдаан күчү-күжүн ажыглап, чаржынчыг мага-боттарывысты өскертипкеш ^v, Бодунуң өндүр-чаагай апарган мага-бодунга дөмей кылыптар ^w.