Phile | TyvTUV

‏

Павел бо чагааны Римге хоругдадып турган үезинде бижээн (Эфесчилерге, Филипчилерге болгаш Колосчуларга чагааларны көр).

Римге тургаш, Павел Онисим дээр дургун кул кижи-биле таныжып алган. Павелден Буянныг Медээни дыңнааш, Онисим Христоска бүзүрей берген. Павел кадыг-дошкун кеземче айыылы бар-даа болза, Онисим бодунуң ээзи Филимонче эглир ужурлуг деп шиитпирлээн. Онисимниң ээзи Филимон дээрге Колоссы хоорайның чоок-кавызы чурттуг христиан кижи турган, а Павел ооң-биле таныш чүве-дир.

Ынчангаш Павел Филимондан Онисимни өршээрин база аңаа чоок кижизинге дег хамаарылгалыг болурун дилеп турар. Павел Онисимни Римче эгидип аар күзелдиг, ынчалза-даа ынчаар кыл деп дужаавайн, а чымчаа-биле дилеп турар.

‏ Philemon

Байыр чедириишкини

1 Христос Иисуска бүзүрээни дээш хоругдаттырган ^a Павелден база бүзүрээн дуңмам Тимофейден ^b байыр.

Чаңгыс ажыл-херек кылып турарывыс ханы ынак эживис Филимон сеңээ, 2 ол ышкаш Христоска бүзүрээн кыс эживис Апфияга, туруштуг демисекчивис Архиппке ^c база сээң бажыңыңда чыглып турар христиан ниитилелге бижидим.

3 Бурган Адавыс болгаш Дээрги Иисус Христостан келген авырал биле амыр-тайбың силерге доктаазын!

Филимоннуң бүзүрээни болгаш ынакшылы

4 Мөргүл кылган санымда-ла, сени сактып, Бурганымга үргүлчү өөрүп четтирер-дир мен ^d. 5 Сээң Дээрги Иисуска бүзүрээниң болгаш Бурганның бүгү улузунга ынакшылың дугайында дамчыыр чугаалар меңээ чедип тур. 6 Христостуң биске бергени бүгү ачы-буянны билип алганың ачызында бодуңнуң бүзүрелиңни улам идепкейлиг илередириң дээш, мөргүп тур мен ^e. 7 Дуңмам Филимон, сээң ынакшылың меңээ улуг өөрүшкү болгаш аргалалды эккелди, чүге дээрге сээң ачыңда Бурганның улузунуң чүректери сорук кире бергенин дыңнадым.

Павелдиң Онисим дээш дилээ

8 Шак ол чылдагаан-биле хүлээлгеңни күүсет деп, Христостуң адындан дидими-биле негээр эргем бар-даа болза ^f, 9 мен сени дужаай бербейн, ооң орнунга, ынакшылымга ооргалангаш, күштүү-биле дилеп тур мен. Мен, Павел ирей, а ам Христос Иисустуң ады дээш хоругдаттырган кижи, 10 хоругдал адаанга ооң адазы болганым ^g, Христосту дамчыштыр харылзаалыг оглум Онисимче ^h ээ көрнүрүңнү дилеп тур мен. 11 Мооң мурнунда ол сеңээ шуут ажыы чок-даа турду ыйнаан, а ам чүгле сеңээ эвес, меңээ база ажыктыг кижи-дир ^{▼▼ «Ажыктыг кижи» – Онисим деп ат грек дылда «ажыктыг» дээн уткалыг.}.

12 Мен ону сенче дедир эгидерим ол, а ону чорудуптарымга, мээң чүрээм база ооң-биле кады чорупкан дег-дир. 13 Буянныг Медээ ужун хоругдал адаанда олурумда, сээң орнуңга меңээ дузалашсын дээш, мен ону чанымга дыка-ла арттырып алыксадым. 14 Ынчалза-даа сээң чөпшээрелиң чокка чүнү-даа кылыр хөңнүм чок болду. Сээң кылып турар бүгү буяның хүлээлге ёзугаар эвес, а сээң тура-сорууң аайы-биле илерээн болуру күзенчиг-дир.

15 Бодуңнуң кулуңну ооң соонда кезээ мөңгеде дедир эгидип аарың дээш, Онисим сенден кезек өйде чарлы берген бооп чадавас. 16 Ам ону кулуң эвес кылдыр, а оон артык – ханы ынак дуңмаң кылдыр хүлээп алыр-дыр сен ^j. Ол меңээ дыка эргим-дир, ынчалза-даа сеңээ ол, анаа кижи-даа дег, Дээрги-Чаяакчыга башкарткан дуңмаң-даа дег, оон-даа артык эргим апаар. 17 Ынчангаш мени чаңгыс ажыл кылган эжиң кылдыр санаар болзуңза, мени канчаар хүлээп аарың дег, ону ынчаар хүлээп ап көр. 18 Ол сени кандыг-бир чүве ужун хомудадыпкан азы сеңээ өрелени берген болза, ол түңнү мээң адым дужунга бижип каг. 19 Бодумнуң холум-биле бижип олур мен ^k: мен, Павел, ооң өрезин төлээр мен. (Сен база бодуңнуң амыдыралың-биле меңээ өрелииңни сагындыргаш-даа чоор деп мен.)

20 Ынчангаш, дуңмай, Дээрги Христос дээш, меңээ ачы-дузадан көргүзүп, мени ооң-биле сорук киирип көр. 21 Мени дыңнаар боор деп идегээш, сеңээ бижип олур мен. Херек кырында мээң бижээн чүвемден-даа хөйнү кылып каарыңны билир мен.

22 Ол ышкаш меңээ аалчылар өрээлин белеткеп каап көр. Чүге дээрге Бурган сээң мөргүлдериңерге харыылап, мени удавас хостап салыптарга, силерге чеде бээримге идегеп тур мен.

Түңнел байыр чедириишкиннери

23 Христос Иисуска бүзүрээни дээш, мен ышкаш хоругдаттырган Эпафрас ^l сеңээ байыр чедирип тур, 24 а ол ышкаш мээң чаңгыс ажыл-херек кылып турар эштерим Марк, Аристарх ^m, Димас болгаш Лука ⁿ олар база.

25 Дээрги Иисус Христостуң авыралы силерниң сагыш-сеткилиңерге доктаазын ^{▼▼ Өске бурунгу сөзүглелдерде бо шүлүк «аминь» деп сөс-биле төнген.}.