‏ Proverbs 17

1Мага хандыр дойлап-даа тургаш, алгыжып-кыржыр аалга көөрде, када берген хлеб карты-даа чип оргаш, амыр-тайбың чорааны дээре ^a.
2Угаанныг чалча дээргизиниң ыят чок оглун чагырар ^b
база өнчүнү ол оолдуң акы-дуңмазы-биле үлежир.
3Мөңгүн биле алдын хайылдырар суугуга эстир ^c,
а улустуң чүректерин Дээрги-Чаяакчы шенээр ^d.
4Бак кижи бузуттуг чугаалар дыңнаар,
авыяас кижи хоралыг чугааларже кичээнгей салыр.
5Түремикти дорамчылап турар кижи ооң Чаяакчызын бак сөглээни ол ^e,
өске кижиниң түрегделин көргеш, амыраар кижи – кеземчеден чайлавас ^f.
6Кырганнарның шаңналы – үре-салгалы ^g,
а ажы-төлдүң ат-алдары – ада-иези.
7Мелегей кижиниң аксынга төлептиг чугаа эптешпес,
бүдүштүг кижиниң аксынга меге чугаа оон артык эптешпес ^h.
8Хээли берип турар кижиге хээлизи – илбилиг даш дег:
кайнаар-даа сунуп чедерге, чедиишкинниг болур ⁱ.
9Хомудалын уттуп аар кижи найыралче чүткээни ол,
а бак чаңнатканын утпас кижи эжинден чарылганы ол.
10Мелегей кижини чүс катап шанчарынга көөрде,
угаанныг кижини чаңгыс катап чемелеп каары оранчок дээштиг.
11Бузуттуг-бак кижи чүгле үймээн үндүреринче чүткүүр,
ынчангаш Дээрги-Чаяакчы каржы-дошкун төлээзин олче чорудуптар.
12Сээдең чоруу кедерээн мелегей кижиге ужуражырынга көөрде,
ажы-төлүн чидирген кыс адыгга таварышканы дээре ^j.
13Буянны бузут-биле харыылаар кижиниң аалындан бузут ыравас ^k.
14Алгыш-кырыштың эгези сугнуң чалды деже шавары дег,
ынчангаш өжээн өөскүвээнде, соксадып каг ^l.
15Бузуттуг хейни агартыры ^m, кем-буруу чок кижини шиидери ⁿ –
кайызы-даа Дээрги-Чаяакчыга бужар чүүлдер-дир.
16Мелегей кижиниң угаан садып алыр дээш, акша туткан херээ чүл?
Ооң угаап билиптер харыы бар эвес.
17Эжиң сеңээ кандыг-даа үелерде ынак болур ^o;
ха-дуңмаң айыыл-халап үезинде дузалаар дээш төрүттүнер ^p.
18Сарыыл чок кижи хол тутчуп,
өске кижи дээш дагдынар.
19Алгыш-кырышка ынак кижи бачытка ынак;
бодун өрү көрдүнер кижи буураашкынче чүткээни ол ^q.
20Мегечи чүрек буян көрбес,
авыяас дыл айыыл халдадыр.
21Мелегей ажы-төлдүг кижи муңгарал чедип алганы ол:
оглу мелегей боорга, ачазы өөрүвес-ле болгай ^r.
22Өөрүп чоруур чүрек – эки дээн эм,
а ундаргай сеткил мага-ботту харыксырадыр ^s.
23Бузуттуг кижи чөптүг шииткелди хажыдар дээш
улустан бүдүү хээли алыр ^t.
24Угаангыр көрүш – мерген угаанче,
а мелегей кижиниң көрүжү – черниң бүгү кыдыгларынче шиглей көөр.
25Мелегей оолдуг боору – ачазынга харааданчыг,
авазынга хомуданчыг ^u.
26Актыг кижини кезедири-даа,
бүдүштүг кижини чөптүг-шынныг чоруу дээш эриидээри-даа – бак херек-тир.
27Билиг чедип алган кижи кевин-херекчок чүве чугаалавас ^v;
угаанныг кижи хорадаачал эвес болур.
28Ыыттавас-ла болза, мелегей кижи безин мерген угаанныг кылдыр көстүр;
аксын хаап алыр болза – сарыылдыг кылдыр сагындырар ^w.