Proverbs 24
1Бузуттуг улуска адааргава, олар-биле кады боорун күзеве a.2Оларның угаан-чүрээ күчүлел дугайында бодаар,
а аас-сөзү улуска бак үүлгедигни чугаалап турар b.
3Бажың-балгат мерген угаан-биле туттунар
база угаан-сарыыл-биле быжыг апаар;
4билиг барда, бажың ишти күзенчиг болгаш
үнези улуг хөреңги-биле долдунар c.
5Мерген угаанныг кижи – күштүг болур,
билиглиг кижи – күжүн немеп алыр d.
6Дайын чоруда бергеш, арга-сүмени дыңнап аар сен:
чөвүлекчилериң хөй болза, тиилелге сээңии боор e.
7Мелегей кижиге мерген угаан чедип алдынмас бедикте турар,
ол кижи чугула херектер шиитпирлээр черге аксын ажар-даа харыы чок болур.
8Бузут үүлгедирин бодап турар кижини
кара сагыштыг кижи дээр.
9Мелегей кижиниң бодалдары бачыт болур,
кочуургак кижи f улуска бужар бооп көстүр.
10Айыыл-халап хүнүнде кошкааң көргүзер болзуңза,
күжүң эвээжээни ол-дур g.
11Өлүртүр деп турар улусту камгала! h
Өлүрү чайлаш чок улусту камгалаарындан дадагалзаар сен бе?
12«Ол дугайында билбээн бис!» – деп болур сен.
Чүректерниң Шенекчизи Бурган билир i,
сеткилиңниң Хайгааракчызы бүгү чүвени билир –
кижи бүрүзүн, ажыл-херектерин барымдаалап,
Ол кезедир азы шаңнаар j.
13Оглум, ары чигирин чиирге, кандыг ийик?
Ооң чаагайы кончуг, ары өөнүң үттеринде чигир
сээң өгүңге амданныг болур k.
14Мерген угаанны чедип аары база сеткилиңге шак ындыг салдарлыг:
ону тып алган болзуңза, келир үең бар, идегелиң өжүп төнмес l.
15Чөптүг-шынныг кижиниң бажыңының чанында кедеп турар
бузуттуг хей дег болба m,
буянныг кижиниң бажың-балгадын хоозуратпа:
16чөптүг-шынныг кижи чеди-даа катап кээп ушса, дөмей-ле туруп кээр n,
а бузуттуглар кээп ужар болза, айыыл-халапка таваржыр.
17Дайзының кээп ужарга, өөрүве o;
ол моондакка тептигерге, чүрээң өөрүп-байырлавазын,
18оон башка Дээрги-Чаяакчы көрүп кааш, өөрүшкүңнү бак чүүл деп санааш,
Бодунуң килеңин дайзыныңдан чайладып аппаар p.
19Кара сагыштыг улус дээш хөлзеп, хорадава q,
бузуттуг улуска адааргава r,
20чүге дээрге кара сагыштыгларның келир үези чок
база бузуттуг улустуң чырыткызы өжүп каар s.
21Дээрги-Чаяакчыдан коргуп чор, оглум,
хаандан база коргуп чор t, өскерликчилер-биле харылзашпа.
22Чүге дээрге олардан хенертен өлүм хөме таварып кээр:
Дээрги-Чаяакчы биле хаандан кандыг айыылдар кээрин билип-даа шыдавас сен.
Мерген угаанныгларның өске сөстери
23Мерген угаанныгларның өске сөстери бо-дур.Шииткел черинге улусту ылгай көөрү – бак херек u;
24буруулуг кижиге «Актыг сен» деп турар кижини v
чоннар каргаар, аймактар көрбестей бээр.
25А сойгалап турар кижи ээ көрүүшкүннү алыр,
олче ачы-буян бадып кээр.
26Шынныг харыы –
эриннерже ошкаашкын дег.
27Бажыңың даштында ажыл-херээңни аайлап каавыт,
шөлүңде ажылдарыңны доозуп ал,
а ооң соонда бажыңыңны тудуп эгеле.
28Өске кижиге удур хоозун херечилел кылба,
аас-сөзүңден меге үнмезин w.
29«Ол кижи меңээ кандыг хамаарылгалыг болчук,
мен база аңаа шак ындыг хамаарылгалыг болуйн:
кылган херектери дээш, кеземчеден көргүзейн!» – диве x.
30Бир катап чалгаа кижиниң шөлүнүң чаны-биле,
угааны четпес ээ кижиниң виноград шөлүнүң чоогу-биле
эртип бар чыткан мен.
31Көөрүмге, чер болганда тенниг чадаң ыяш өзүп үнген,
бок үнүштер черни шыва апкан, даш херим буступ калган болду.
32Ол бүгүнү көрүп, боданып тургаш, көрген, билген чүүлүмден
мындыг түңнел үндүрдүм:
33ам-даа удуп-ноюрзап чыдар болзуңза,
ам-даа хөлестеп чыдар болзуңза,
34тояанчы дег, ядарал сенче халдап кээр,
үптекчи дег, түрегдел сенче халдап кээр y.
Copyright information for
TyvTUV