‏ Proverbs 26

1Чайга – хар, а дүжүт ажаар үеге – чаъс ышкаш, мелегей кижиге алдар-хүндү таарышпас ^a.
2Бора-хөкпештиң ыңай-бээр ужары
база хараачыгайның шивеш кынныры ышкаш,
хей черге келген каргыш боттанмас ^b.
3Кымчы – аътка, чүген – элчигенге ^c,
а шыкпыыш – мелегей кижиниң ооргазынга херек ^d.
4Мелегей кижиге мелегей харыы бербе,
оон башка ол кижи ышкаш апаар сен.
5Мелегей кижиге мелегей харыыдан бер,
оон башка бодун мерген угаанныг кылдыр бодай бээр ^e.
6Мелегей кижиге сөс чедирткен кижи
боду-ла буттарын одура шапкан азы бактың дашказын ишкен кижи дег.
7Мелегей кижиниң аксында угаадыглыг чугаа –
аскак кижиниң буттарының кылажы дег.
8Мелегей кижиге алдар-хүндү көргүзери ^f –
дашты ону шывадаар чепсек-херекселге баглаары дег.
9Мелегей кижиниң аксында угаадыглыг чугаа –
эзирик кижиниң тенниг чадаң ыяштан халбактанганы дег.
10Мелегей ийикпе, азы душкан-на кижини ажылга хөлезилеп алыр кижи –
шупту улусту балыглаар ча адыгжызы дег.
11Мелегей кижи бодунуң мелегей чоруун катаптаанда,
кускузунче дедир ээп келгеш, чип аар ыт дег ^g.
12Бодун мерген угаанныг кылдыр тогдунар кижини көрген сен бе? ^h
Аңаа бодаарга, мелегей кижиге безин идегээри дээре болдур ийин ⁱ.
13Чалгаа кижи: «Орукта арзылаң тур!
Кудумчуларда араатан аң димзенип чор!» – дээр ^j.
14Чалгаа кижиниң дөжээнге аңдарлып-дүңдерлири –
эжиктиң шүнчүктерге халаңнаары дег.
15Чалгаа кижи ^k холу-биле тавакта чемни ап алза-даа,
ону аксынга чедирип чадай бээр.
16Чалгаа кижи бодун сарыылдыг чүүлдер чугаалаан чеди кижиден
мерген угаанныг деп бодаар.
17Чай кадында өске улустуң алгыш-кырыжынга киржири –
черлик ыттың кулаан шеле тыртары дег.
18– 19Өске кижини мегелепкеш: «Баштактандым ышкажыл!» – дээр кижи
тенек аарыг кижиниң оттуг болгаш өлүмнүг согуннарны октап турары дег.
20Ыяш төнерге, от өжүп каар,
а хопчу кижи чокта, алгыш-кырыш соксай бээр ^l.
21Хөмүрден – көс, ыяштан – от,
а нүгүлчү кижиниң чугаа-сөзүнден – адааннажыышкын үнер.
22Хопчу кижиниң чугаа-сөзү амданныг чем дег –
кижиниң ишти-хөңнүнүң эң ханызынче кире бээр ^m.
23Кара сагыштыг кижиниң чымчак аас-сөзү ⁿ –
даштын холуксаалыг мөңгүн-биле чайырлап каан дой сава дег ^o.
24Дайзыныңның чугаазы авыяастыг,
ооң сеткилинде кара сагыш шыгжаттынып чыдар;
25үнү чымчак-даа болза, аңаа бүзүреве,
ооң чүрээн бужар чүүл долган болдур ийин ^p;
26ооң авыяас чоруу сени көрбезин чажырып турар,
ынчалза-даа каржы-багы улус мурнунга ажыттынып кээр.
27Оңгар каскан кижи боду ынаар кээп дүжер ^q,
кижиниң өрү октаан дажы тейинге кээп дүжер.
28Мегечи кижи хомудадып турар улузун көөр хөңнү чок
база авыяас аас-дыл буураашкынны белеткеп турар.