Pro 27 | TyvTUV | STEP | Даартагы хүнде болур чүве-биле мактанма – ол хүннүң чүнү эккээрин билбес-ле болгай сен .

‏ Proverbs 27

1 Даартагы хүнде болур чүве-биле мактанма – ол хүннүң чүнү эккээрин билбес-ле болгай сен ^a.
2 Сени бодуң эвес, а өске кижи;
бодуңнуң эвес, а хары кижиниң аас-сөзү мактазын.
3 Даш-даа аар, элезин-даа чиик эвес ^b,
ынчалза-даа мелегей кижиниң аажы-чаңы оон-даа аар.
4 Килең – каржы, күштүг килең – үерлээн суг дег,
ынчаарга хүннээчел кижиге удур туржуп шыдаар кижи бар бе? ^c
5 Ажыы-биле сойгалаар кижи
бүдүү ынак эжиңден дээре ^d.
6 Ынак эжиң ак сеткилдиинден сени балыглаар ^e,
а сени көөр хөңнү чок кижи мегелеп ошкаар.
7 Эмин эрттир тоткан кижи ары чигирин-даа херекке албас ^f,
а аштаан кижиге ажыг-даа чем амданныг болур.
8 Төрээн черин каапкан кижи –
уязын каапкаш барган куш дег.
9 Чагдынар болгаш айдызаар чаагай чыттыг чүүлдер чүректи өөртүр,
а эжиң чүрээниң ханызындан арга-сүме бээрге, база ындыг таптыг.
10 Бодуңнуң-даа, ачаңның-даа эш-өөрүн кагба;
айыыл таварыырга, төрелдериңче барба:
ыракта акы-дуңмаңга көөрде, чоокта кожаң дээре ^g.
11 Оглум, мерген угаанныг бооп, мээң чүрээмни өөртүп көр,
ынчан мени бак сөглээр улуска харыылаар сөстер тыпты бээр ^h.
12 Угаанныг кижи айыыл көргеш, чашты бээр,
а кенен улус олче уткуштур баргаш, кеземче алыр ⁱ.
13 Хары кижи дээш дагдынган кижиниң идик-хевин долаа кылдыр ап ал,
өске кижи кадайы дээш ^{▼▼ Өске бурунгу сөзүглелде «Өске улус дээш» деп бижээн (20:16 көр).} дагдынган кижиден долаадан ап ал ^k.
14 Эртен эрте эжин аажок ыыткыр алгап-йөрээр кижи –
каргыш салып турар кижи бооп санаттырар.
15 Хыйланчак кадай – дамдылаар ойбак-дыдык дээвиир дег ^l;
16 ону соксадыры – хатты доктаадыры дег азы үстүң адышка туттунмазы дег.
17 Демирни демир чидидер, а кижини өске кижи кажарадыр.
18 Чимистиг ыяшты ажаап турар кижи ооң чимистерин чиир ^m,
а ээзи дээш сагыш човаар кижи алдар-хүндүге чедер.
19 Арын-шырайның сугга көрүнчүктелири дег,
кижи өске кижиниң чүрээнге көстүр ^{▼▼ Азы: «Кижи бодунуң чүрээнге көстүр».}.
20 Тамы биле Өлүм ^o пөгерин билбес,
кижиниң карактары тодарын билбес ^p.
21 Кижиге мактал сөстериниң салдары –
мөңгүн биле алдынга хайылдырар суугу дег ^q.
22 Мелегей кижини тараа-биле кады согаашка суккаш,
бала-биле соктаар-даа болзуңза, мелегей чоруун арыглап шыдавас сен.

23 Шээр малыңның шуптузун бирден бирээ чокка танып ал,
кодан сүрүүңче сагыштан сал:
24 кандыг-даа байлакшыл мөңгези-биле турбас ^r,
дүжүлге безин үргүлчү салгал дамчывас болгай.
25 Оът-сиген оңар, оон чаа көк шымырарты үнүп кээр,
дагларның ийлеринде оът-сигенни кезип, чыып алыр;
26 хураганнар сеңээ хеп болур,
а анайлар – шөл садып алыр төлевир болур;
27 өшкү сүдү – сеңээ чем боорунга,
өг-бүлеңни ашкарып-чемгереринге
болгаш чалча кыстарыңны тоттур азыраарынга четчир.