‏ Proverbs 4

1Ажы-төлүм, ачаңарның сургаалын дыңнаңар, угаан кирер дээш, кичээнгейлиг дыңнаңар ^a.
2Буян сиңген өөредигни силерге берип турар болгай мен,
ол өөредиимни уттуп, кагбаңар.
3Мен база адалыг чораан мен,
авамның эрге-чассыг оглу турган мен.
4Ачам мени мынча деп өөредип чораан ^b:
«Мээң сөстеримни чүрээңге кадагалап ал,
чагыг-сүмемни сагып чор,
ынчан амы-тынныг артар сен ^c.
5Мерген угаан биле билип алыышкынны чедип ал,
сеңээ чугаалаан сөстеримни утпа, олардан соора барба.
6Мерген угаанны кагба, ол ынчан сени камгалаар,
аңаа ынак апар – ол сени кадагалаар.
7Мерген угаан эң чугула болур. Мерген угаанны чедип ал.
Кандыг-даа эт-хөреңги чыып чорзуңза, угаанны база чыып ал.
8Мерген угаанны бедии-биле үнеле, ол сени өрү көдүрер,
бир эвес оон салдынмайн баар болзуңза – сени алдаржыдар ^d.
9Ол сээң бажыңга одагалыг бөрттү кедирер ^e,
онза чараш оваадайны сеңээ эккеп бээр».

10Мени дыңна, оглум, сөстеримни хүлээп ал,
ынчан сээң чурттаар чылдарың немежир ^f.
11Мерген угаанның оруун сеңээ айтып берип тур мен,
дорт орук-биле сени эдертип бар чыдыр мен.
12Бар чыдар болзуңза, кылажың кызагдавас,
маңнаар болзуңза, илдикпес сен ^g.
13Сургаалымның аайындан эртпе, оон ойталавайн, кадагала,
чүге дээрге амыдыралың ында болгай ^h.
14Бузуттуг улустуң оруун эдербе,
бак улустуң изин истеве ⁱ:
15оларның оруундан өскээр ээп чоруй баргаш, олап кылаштава,
оон чайлай бергеш, чаны-биле эрте бер.
16Бузут үүлгетпээн болза, олар удуп шыдавас;
бир-ле кижини буураашкынга чедирбээн болза, оларның уйгузу келбес ^j.
17Олар кемниг херээниң хлевин чип,
күчүлелдиң арагазын ижип турар болгай.
18Чөптүг-шынныг улустуң оруу – даңның чырык хаяазы дег,
хүн эң-не бедиинге четкиже, улам-на чырып, херелденир ^k.
19А бузуттуг улустуң оруу – дүмбей караңгы дег ^l,
олар каяа тептиге бээрин билбес.

20Оглум, мээң сөстеримни кичээнгейлиг дыңна,
чугаамче кулааңны ээктир.
21Сөстерим сеткилиңден арлып чиде бербезин,
оларны чүрээңниң ханызынга кадагалап ал.
22Чүге дээрге мээң сөстерим оларны тып алган кижиге – амы-тынны,
а ооң бүгү мага-бодунга – кадыкшылды берип турар ^m.
23Чүрээңни чүден артык камнап-кадагала,
чүге дээрге ол – амыдыралдың үнер дөзү-дүр.
24Меге сөстерни бодуңдан чайлат,
аас-сөзүңнүң авыяазын бодуңдан ырат ⁿ.
25Сээң карактарың бурунгаар чиге көрзүн,
көрүжүң чүгле мурнуңче шиглезин.
26Сээң буттарың дорт оруктап чорзун ^o,
ынчан оруктарың шуптузу айыыл чок болур.
27Оң-даа, солагай-даа талаже эгбе ^p,
будуңну бузуттан чайлат.