‏ Proverbs 9

Мерген угаанның болгаш мелегей чоруктуң кыйгырыглары

1Мерген угаан бажыңын туткаш, чеди адагашты тургузуп алган.
2Эът-чемин, чаагай амданныг арагазын белеткеп ^a,
столунга делгей салып алган.
3– 4Бодунуң чалчаларын хоорайның улуска көскү черлеринден:
«Кенен улус, меңээ кире дүжүңер!» –
деп кыйгырзын дээш ^b айбылап чорудупкан.
Угаан кирбээн улуска ол мынча деп турар:

5«Бээр келиңер, мээң аъш-чемимни чооглаңар,
чаагай амданныг арагамны ижиңер! ^c
6Кенен чоруктан адырлыңар, ынчан амы-тынныг артар силер,
угаанның оруу-биле чоруур силер.
7Кочуургак кижини эдип-чазаар болзуңза, сени бак сөглеп кааптар,
бузуттуг кижини чемелээр болзуңза, сени бакка бораар.
8Кочуургак кижини чемелеве, оон башка сени көөр хөңнү чок апаар;
харын мерген угаанныг кижини чемеле – ол сеңээ ынак апаар ^d.
9Мерген угаанныг кижини чагып-сурга – ол оон-даа мерген угаанныг апаар,
чөптүг-шынныг кижини өөрет – ол оон-даа хөй билиглиг апаар ^e.
10Дээрги-Чаяакчыдан коргары – мерген угаанның үнер дөзү ол-дур ^f,
ыдыктыг Бурганны билип аары – сарыыл ол-дур!
11Мээң – Мерген угаанның – ачымда
амыдыралың хуусаазы немежир, назының узаар ^g.
12Мерген угаанныг болзуңза, бодуңга ажыктыг,
а кочуургак болзуңза, бодуңнуң шоруң-дур».

13Мелегей чорук – бардам, шуугаазынныг,
билир чүвези чок херээжен дег ^h.
14Ол бажыңының эжииниң чанында сандайга,
бүгү хоорайга көскү кылдыр олуруп алгаш,
15– 16чаны-биле эртип-дүшкен, бодунуң оруу-биле бар чыдар шупту улусту:
«Кенен улус, меңээ кире дүжүңер!» – деп кыйгырып турар:
Угаан кирбээн улуска ол мынча деп турар:
17«Оорлап алган сугну ижерге – амданныг ⁱ,
чажырып алган хлебти чиирге – таптыг! ^j»

18А дыңнап турар улус ол херээжен оларны
өлүг сүнезиннер аразынче кый деп турарын-даа,
ооң аалчылары алдыы оранның ханызында барган дээрзин-даа билбес.