‏ Proverbs 16

1Кижиниң чүрээнде янзы-бүрү бодалдар бар, а ооң аас-сөзүнден үнер шиитпир Дээрги-Чаяакчыдан кээр a.
2Кижи бодунуң оруктарын дөгерезин кем-буруу чок деп санаар,
ынчалза-даа сеткилдерни Дээрги-Чаяакчы шенээр b.
3Дээрги-Чаяакчыга ажыл-херектериңни дагзып бер c,
ынчан сээң бодалдарың боттаны бээр.
4Дээрги-Чаяакчы бүгү чүүлдерни оларның боттарының салым-чолу дээш чаяаган;
бузуттуг кижи безин айыыл-халап хүнү дээш чаяаттынган d.
5Адыыргак кижи Дээрги-Чаяакчыга бужар чүүл болур e,
ол кеземчеден канчап-даа чайлап шыдавас f.
6Шынчы болгаш энерелдиг болуру – кижиниң бузудун арыглаар g;
Дээрги-Чаяакчыдан коргары – айыылды чайладыр.
7Дээрги-Чаяакчыга кижиниң оруктары тааржыр болза,
ону дайзыннары-биле безин эптештирип каар h.
8Чөптүг чорук чок чорааш, элбек орулгалыг боорунга көөрде,
чөптүг чорук-биле кады чорааш, хөй эвес олчалыг боору дээре i.
9Кижиниң чүрээ оруун боду бодап алыр,
ынчалза-даа ооң базымнарын Дээрги-Чаяакчы башкарар j.
10Хаанның аксында – өттүр билир сөстер;
ооң үндүрген шииткелинде меге турбас k.
11Мегелевес деңзи тавактары Дээрги-Чаяакчыдан кээр,
хапка суккан деңзи шойлары база Оон кээр l.
12Бачыттыг үүлгедиглер хааннарга бужар чүүл болур,
дүжүлге чөптүг чоруктуң ачызында тендиш дивес m.
13Шынны сөглээр кижи хааннарга таарымчалыг,
олар алыс шынны чугаалаар улуска ынак n.
14Хаанның килеңи – өлүмнүң медээчизи дег o;
мерген угаанныг кижи ону чайладып шыдаар.
15Хаанның чырык көрүжүнде – амыдырал бар,
ооң эки көөрү – кааң өйде чаъс эккелген булут-ла p.
16Алдын эвес, мерген угаан чедип аары канчап-даа дээре,
мөңгүн эвес, сарыыл чедип аарын шилиири черле дээре q.
17Эки мөзүлүг улустуң оруу – бузуттан чайлаары;
шын оруундан соора барбас кижи амы-тынын кадагалап алыр.
18Буураашкынны – адыыргаары,
а аштырыышкынны – улуг тура мурнаар r.
19Адыыргак улус-биле олча үлежиринге көөрде,
ядыы улус-биле биче сеткилдиг чурттап чорааны дээре.
20Бодамчалыг чурттап чоруур кижи – чаагай чорукту чедип алыр s;
Дээрги-Чаяакчыга идегээр кижи – амыр-чыргалга чедер t.
21Мерген угаанныг кижи улуска сарыылдыг диртир,
аас-сөстүң аянныы бүзүренчиг боорун күштелдирер.
22Угаанныг боору – амыдырал хайырлаар суг бажы u,
а мелегей кижиниң кеземчези
Азы: «Өөредии».
– сээдеңи.
23Мерген угаанныг кижиниң угааны ооң сөзүн сарыыл киирер
база чугаа-сөзүн бүзүренчиг болдурар.
24Буянныг сөстер – ары чигири дег:
кижиниң сеткил-сагыжын тааладыр-даа, ишти-хөңнүн экиртир-даа w.
25Бир-ле орук улуска дорт ышкаш сагындырар-даа болза,
адак соонда өлүмге чедире бээр x.
26Ажылчын кижиниң аштааны ону ажылдадыр,
ооң чем чиксээри аңаа дыш бербес y.
27Дүржок кижи бузут бодап тып турда амыр-ла –
ооң аас-сөзү өрттендир чиир от дег z.
28Кара сагыштыг кижи алгыш-кырыш өөскүдер,
хопчу кижи эжишкилерни чара кирер aa.
29Күш дөгээр кижи эжин дуурайлаар
база бак орукче киир тыртар ab.
30Хыйыртап көөр кижиниң сагыжы кара;
аксын тыртыйтыр кижиниң үүлгедип турар херектери бак.
31Буурул баш – алдарлыг оваадай,
ону чөптүг-шынныг амыдырааш, чедип алыр ac.
32Килеңнээчел эвес кижи күчүлүг маадырдан дээре,
бодун туттунуп билир кижи хоорайлар эжелекчизинден дээре ad.
33Шиитпир үндүрүксээр улус төлге даштары-биле үлүг тыртар ae,
ынчалза-даа шиитпир бүрүзү Дээрги-Чаяакчыдан кээр.
Copyright information for TyvTUV