‏ Proverbs 2

Ачазының оглунга чагыг-сургаалы

1Оглум, мээң сөстеримни хүлээп ал база чагыгларымны чүрээңге шыгжап ал ^a;
2мерген угаанны кичээнгейлиг дыңна база
чүрээңни билиишкинче ээлдирип ал;
3билигни кый де база
угаанны кыйгырып ал;
4угаанны, мөңгүннү дег ^b, диле база
эртине-байлак шыгжаан черни дег, истеп тып ал –
5ынчан Дээрги-Чаяакчыдан коргары деп ^c чүл ол дээрзин билип каар сен база
Бурган дугайында билигни тып аар сен.
6Чүге дээрге мерген угаанны Дээрги-Чаяакчы хайырлаар ^d,
билиг биле угаан Ооң аас-сөзүн дамчып кээр болгай.

7Бурган эки мөзүлүг улуска тиилелгени белеткеп берген.
Ол – кем-буруу чок улустуң мурнунга турар камгалалы ^e.
8Ол чөптүг чоруктуң оруктарын камгалап турар
база Аңаа бердинген улустуң оруун кадагалап турар ^f.
9Ынчан сен чөптүг болгаш шынчы чорукту, эки мөзүлүг боорун ^g
база бүгү-ле буянныг оруктарның дортун билип каар сен.
10Чүге дээрге сээң чүрээңче мерген угаан сиңе бээр,
билиг – сеткилиңге тааржы бээр.
11Бодамчалыг чорук сени камгалаар;
улуг угаан – кадагалаар.

12Мерген угаан сени бузуттугларның оруундан,
шын сеткилинден чугаалавас улустан кадагалаар.
13Шак ындыг улус дүмбейниң оруктары-биле чоруур дээш,
дорт оруктан чайлай бээр.
14Ол улус дээрге бузуттуг үүлгедиглер кылгаш, өөрүүр,
бузут биле бачытка таалаар ^h,
15ыргак оруктарда боттарының изин изеп ⁱ,
бузутту эдерип чоруур улус-тур.
16А оон ыңай мерген угаан өске кижи кадайындан –
элзедип чугаалаар, ашактыг херээженден база кадагалаар ^j.
17Ол дээрге аныяандан кады чурттаан эжин каапкан,
Бурганының берген чагыын уттупкан херээжен-дир.
18Ол херээженниң бажыңы – өлүмнүң какпазы-дыр,
ооң оруу – өлүглер оранынче орук-тур ^k.
19Ооң бажыңынче кирген кижи дедир ээп келбес,
амыдыралдың оруунче катап кирбес.

20Ынчангаш эки улустуң оруун эдер,
чөптүг-шынныг улустуң изин исте.
21Эки мөзүлүг улус чер-чуртка чурттаар,
кем-буруу чок улус аңаа артып каар болгай ^l.
22А бузуттуг улусту чырык черге амылыг арттырбас,
кара сагыштыг улусту ооң кырынга узуткап кааптар ^m.