Pro 3 | TyvTUV | STEP | Оглум, мээң өөредиимни утпа, чагыг-сүмемни чүрээңге шыгжап ал .

‏ Proverbs 3

1 Оглум, мээң өөредиимни утпа, чагыг-сүмемни чүрээңге шыгжап ал ^a.
2 Чүге дээрге олар сээң чурттаар үеңни узадыр ^b,
назы-харыңны немээр база амыр-чыргалыңны көвүдедир.
3 Шынчы чорууң биле энерелиңни кагба:
ону, каасталга ышкаш, мойнуңга астып ал ^c
база чүрээңге сиилбирлеп бижип ал ^d –
4 ынчан Бурган болгаш улус
сенче ээ көрнүр база эки кижи деп санаар.
5 Дээрги-Чаяакчыга чүрээңниң ханызындан идеге ^e,
а бодуңнуң угааныңга ынанма.
6 Кандыг-даа оруктап чоруп орзуңза, Дээрги-Чаяакчыны билип аарын кызыт,
Ол ынчан сээң орууңну дорттап бээр ^f.
7 «Мерген угаанныымны» деп бодава ^g,
Дээрги-Чаяакчыдан коргуп, бузуттан чайлап чор ^h –
8 ынчаар кылыр болзуңза,
мага-бодуң бүрүнү-биле кадыкшып, күш кире бээр.
9 Бодуңнуң өнчү-хөреңгиңден база кандыг-даа дүжүдүңнүң башкылыындан
Дээрги-Чаяакчыга берип, Ону алдаржыт ⁱ;
10 сээң тараа шыгжаар аңмаарларың сыңышпастап, дола бээр ^j,
көгээржиктериңде чаа арага эриин ажыр төктүп турар апаар ^k.

11 Оглум, Дээрги-Чаяакчының эдип-чазаар сургаалын хүлээвейн барба ^l,
Ооң чемелээшкинин халалыг диве.
12 Дээрги-Чаяакчы Бодунуң ынак кижизин,
ачазы эргим оглун дег, кеземчеге онаар болгай ^m.
13 Мерген угаанны чедип алган кижи
база сарыылдыг апарган кижи амыр-чыргалдыг.
14 Мерген угаанның ажыы мөңгүннүг болурундан канчап-даа дээре,
ооң үре-түңнели алдындан-даа үнелиг ⁿ.
15 Мерген угаан эртине даштардан-даа аар өртектиг ^o,
күзээн чүүлдериңниң кандыызы-даа ооң-биле деңнежип шыдавас.
16 Ооң оң холунда – узун назын ^p,
а солагай холунда – байлакшыл биле алдар-хүндү бар ^q.
17 Ооң оруктары тааланчыг-дыр,
ону олар шупту амыр-чыргалга чедире бээр-дир.
18 Мерген угаан ону кагбас улуска амыдыралдың ыяжы-дыр ^r,
ооң-биле чарылбас улус амыр-чыргалдыг!
19 Дээрги-Чаяакчы Бодунуң мерген угааны-биле черни үндезилеп тургускан ^s,
сарыылы-биле дээрни доктаадып тургускан ^t.
20 Ооң билии башкарарга, дүп чок далайларның суу аттыгып үнүп ^u,
булуттар чаъс-шалыңны дүжүрүп турар ^v.

21 Оглум, быжырымчалыг бодаар болгаш бодамчалыг чорукту кадагалап ал,
олар үргүлчү карааң мурнунга турзун.
22 Олар ынчан сээң сеткилиңге тынгарыышкын болгаш
мойнуңга азар каасталгаң апаар.
23 Ынчан сээң орууңга айыыл таварышпас ^w,
а будуң чүге-даа илдикпес ^x.
24 Чүден-даа кортпайн, удуп чыдып аар сен ^y,
а удаан уйгуң – тааланчыг боор.
25 Бузуттугларны манап турар, оларны хенертен таварыыр хай-халаптан
база өлүрүнден кортпа ^z.
26 Дээрги-Чаяакчы сээң талаңда болгай,
Ол сээң будуңну какпадан чайладып чоруур.

27 Бир кижиге ачы-буян көргүзер ужурлуг турган дижик сен.
Шыдаар-ла болзуңза, аңаа ону көргүзеринден ойталава ^aa.
28 Өске кижиге бээр ужурлуг чүвең бодуңда бар болза:
«Чоруй бар, катап чедип кээр сен, даарта бээр мен» – диве ^ab.
29 Сээң-биле каразыышкын чок чурттап турар кижиге удур
бак чүве бодава.
30 Сеңээ бак чүве кылбаан кижи-биле
чылдагаан чок черге чаргылдашпа.
31 Күчүлел кылып турар кижиге адааргава,
ооң оруун шилип алба ^ac.
32 Чүге дээрге кара сагыштыг кижи Дээрги-Чаяакчыга бужар бооп көстүр,
а чөптүг-шынныг улус Ооң сеткилинге кирер.
33 Бузуттуг кижиниң бажың-балгадынга Дээрги-Чаяакчының каргыжы чедер ^ad,
а эки мөзүлүг улустуң оран-савазынга Ол ачы-буян хайырлаар ^ae.
34 Ол кочуургак улусту шоодар ^af,
а томаараан улуска ээ көрүүшкүнүн хайырлаар ^ag.
35 Мерген угаанныг улус алдарга чедер,
а адыыргак мелегей улус адын баксырадыр.