Pro 7 | TyvTUV | STEP | Оглум, мээң сөстеримни кадагала, чагыгларымны чүрээңге шыгжап ал .

‏ Proverbs 7

1 Оглум, мээң сөстеримни кадагала, чагыгларымны чүрээңге шыгжап ал ^a.
2 Мээң чагыгларымны сагып чор – ынчан амы-тынныг артар сен ^b,
өөредиимни карааң огу дег кадагала.
3 Оларны, билзек ышкаш, салааларыңга суп ал,
чүрээңге сиилбирлеп бижип ал ^c.
4 Мерген угаанга: «Сен – мээң угбам сен» – деп,
а сарыылга: «Чоок кыс төрелим сен» – деп чугаала.
5 Өске кижи кадайындан – элзедип чугаалаар херээженден
ынчалдыр камгаланыр сен ^d.

6 Бир-ле катап бажыңымның соңгазындан бакылап,
ооң хана-карактарын өттүр көре берген мен.
7 Ынчан бир-ле угааны четпес аныяк оолду
кенен кижилер аразындан ^e, аныяк-өскен аразындан эскерип каан мен.
8 Ол бир херээженниң чурттап турар кудумчузун кежип,
ооң бажыңынче бар чыткан.
9 Хүн ажып, имиртиңней бергенде ^f;
дүн дүжүп, дүмбей караңгы апарып турда болган чүве.
10 А демги херээжен аңаа уткуй үнүп келди –
самыын-садар херээженниң хевин кеткен ^g, оптуг-кажар,
11 шуугаазынныг, дөскел чок
база бажыңынга олурар хөңнү чок херээжен болду:
12 ол бирде – кудумчуга, бирде – хоорай шөлдеринге,
бир болза – азыг бүрүзүнге улус кедээр турган ^h.
13 Ол херээжен аныяк оолду сегирип алгаш,
ошкап-чыттап, ыядыр арын чогу-биле мынча деп турду:

14 «Мен бөгүн кылыр бооп аазааным
эп-найырал өргүлүн ^{▼▼ Эп-найырал өргүлү – ол өргүл Бурган биле кижиниң эп-сеткилдиин көргүзер турган (Лев. 7:11-21 көр). Өргүл салган улус ооң соонда өргүл малының эъдиниң кезиин ап, дойлаар турган.} боттандырдым.
15 Ынчангаш сеңээ уткуй үнүп келдим,
дилеп чорааш, сени тып алдым.
16 Орун-дөжээмни хевис шывыглар болгаш
Египеттен эккелген чараш пөстер-биле шып алдым.
17 Чыдар дөжээмни мирр, алоэ, корица дээр
чаагай чыттыг үнүштер-биле айдызап алдым ^j.
18 Бээр кирип кел, эртенге чедир мага хандыр эргеленчип-чассытчыылы,
ынакшылдан ханып-таалап чыдаалы.
19 Ашаам бажыңда чок, ырак орукче үнүпкен-не болгай;
20 ол акшалыг хавын ап алган, ай ортузунга чедир ээп келбес-даа».

21 Ол херээжен хөй оптуг аргалар-биле дуурайлап,
эптиг-ээлдек чугаазы-биле көгүдүп аарга ^k,
22 – 23 аныяк оол доп-дораан ону эдерип чорупкан.
Ооң ынчаар кылганы – шарының соктурар черинче бар чыдары дег,
хүлбүстүң окка өкпе-баарын үзе аттырары аяже баары дег ^{▼▼ Бо сөстерниң утказы эки билдинмес. Өске бурунгу сөзүглелде «Мелегей кижини өөредир каасталга дег» деп бижээн.}
база куштуң амы-тынындан чарлырын билбейн, дузакче ужары дег болган ^m.

24 Ынчангаш, ажы-төлүм, ам мени дыңнаңар,
сөстеримче кичээнгейден салыңар:
25 силерниң чүрээңер ындыг херээженниң оруунче ээй тыртпазын,
ооң оруктарын изеп, азып-тенивеңер!
26 Хөй-ле улус ооң чижи болуп, өлген болгай,
дыка хөй улусту ол узуткаан болгай.
27 Ооң бажыңы – өлүглер оранынче,
өлүмнүң турар черинче аппаар орук-тур ⁿ.