Pro 8 | TyvTUV | STEP | Мерген угаан кыйгырып турар эвес бе? Сарыылдың үнү дыңналып турар эвес бе?

‏ Proverbs 8

Мерген угаанның өртемчейге ужур-утказы

1 Мерген угаан кыйгырып турар эвес бе? ^a Сарыылдың үнү дыңналып турар эвес бе?
2 Мерген угаан орук чанында тей бажында –
оруктарның белдиринде туруп алган-дыр.
3 Ол хоорайже кирер эжик аксында,
хаалга чанында кыйгырып тур:
4 «Улус-чон, силерни кый деп тур мен,
кижи төрелгетенни кыйгырып тур мен!
5 Кенен улус, сагынгыр бооп көрүңер ^b,
а мелегей улус – угаан кирип алыңар.
6 Дыңнаңар, мээң чугаалаар чүвем чугула,
аксымдан алыс шынныг чугаа үнер;
7 мээң дылым алыс шынны сөглээр,
а бузуттуг, бужар сөстү аксы-дылым кажан-даа этпес.
8 Мээң шупту чугааларым чөптүг,
оларда кара сагыштыг-даа, меге-даа чүве чок;
9 олар дөгере угаанныг кижиге тодаргай,
билиг чедип алган улуска билдингир.
10 Мээң сургаалымны – мөңгүнден,
а билиимни – арыг алдындан бедик үнелеңер ^c.
11 Мерген угаан эртине даштардан каас-чараш болгай,
күзеп чорууруңар бүгү чүве ооң-биле деңнежип шыдавас ^d.

12 Мен дээрге Мерген угаан-дыр мен,
кажараашкын-биле кады турар мен,
билиг биле бодамчалыг чорукту чедип ап тур мен.
13 Дээрги-Чаяакчыдан коргары ^e – бузутту көөр хөңнү чогу-дур ^f.
Бодун өрү көрдүнер, адыыргаар чорукту,
бузуттуг орукту база мегечи аас-сөстү ^g көөр хөңнүм чок.
14 Менде – арга-сүме бар, менде – чедиишкин бар,
мен – угаан-дыр мен, күш база мээң таламда ^h.
15 Мээң ачымда хааннар хааннап,
чагырыкчылар чөптүг чорукту доктаадып турар,
16 мээң ачымда чагырыкчылар, нояннар
болгаш черниң бүгү баштыңчылары ^{▼▼ Өске бурунгу сөзүглелде «Бүгү чөптүг-шынныг баштыңчылар» деп бижээн.} чагырып турар.
17 Меңээ ынак улуска мен база ынак мен ^j,
мени дилеп турар улус – тып алыр ^k.
18 Байлакшыл-даа, алдар-хүндү-даа мээң-биле кады ^l,
төнчү билбес эртине-байлак болгаш чөптүг чорук база.
19 Мээң эккээр үре-түңнелим арыг алдындан дээре,
мээң дүжүдүм – арыг мөңгүнден үнелиг ^m.
20 Чөптүг чоруктуң оруу-биле,
шынчы чоруктуң изи-биле бар чыдар мен:
21 меңээ ынак улусту эктин ажыр шаңнаар мен,
оран-савазын эртине-байлак-биле чык долдурар мен.

22 Дээрги-Чаяакчының чаяап кылган бүгү-ле чүүлдериниң мурнунда,
үе-дүпте-ле Ооң оруунуң эң эгези бооп турган мен ⁿ.
23 Мен хамык үе-шагның эгезинде, үе-дүпте-ле,
чер-делегейниң боттанырының бетинде-ле тывылган мен.
24 Дүп чок далай болгаш элбек суглуг суг баштары чок турда-ла, төрүттүнген мен;
25 дагларны-даа, тейлерни-даа тургуспаан турда, төрүттүнген мен ^o.
26 Дээрги-Чаяакчы ол өйде черниң делгемнерин-даа,
черниң довурак-доозунунуң баштайгы доозунчугажын-даа чаяаваан турган.
27 Кажан Ол дээрлерни тургузуп турда, мен аңаа турган мен ^p;
кажан далайның кырынга дээрлер биле черни аңгылаар төгерикти шыйып турда;
28 кажан дээрге булуттарны быжыглап турда ^q,
дүп чок далайның агып үнген дөстерин быжыглап турда;
29 кажан далайны суглар ашпас кылдыр,
ооң хемчээлин доктаадып турда ^r
база черни тудуп турар үндезиннерни доктаадып турда ^s –
30 мен Ооң чанынга тудугжу ^{▼▼ Азы: «Кижизиткен чаш төлү» азы «Кижизидикчи».} бооп турган мен,
хүннүң-не өөрүшкү-маңнай бооп,
Ооң мурнунга үргүлчү өөрүп-хөглеп турган мен –
31 Ооң чер-делегейи дээш өөрүп-хөглеп,
кижи төрелгетен дээш өөрүп-байырлап турган мен.

32 А ам мени дыңнаңар, ажы-төлүм:
мээң изим базар улус амыр-чыргалдыг! ^u
33 Сургаалымны дыңнаңар, ынчан мерген угаанныг апаар силер,
ону хүлээвейн барбаңар.
34 Мени дыңнап турар, мээң эргиним чанынга үргүлчү манап турар,
эжиимден караан салбас кижи амыр-чыргалдыг!
35 Мени тып алган кижи – амы-тынны тып алган-дыр ^v
база Дээрги-Чаяакчының ээ көрүүшкүнүн чедип алган-дыр ^w.
36 А меңээ удурланыр кижи бодун боду чок кылып турар:
мени көөр хөңнү чок болуру дээрге-ле өлүмге ынак болуру-дур».