‏ Psalms 102

Давидтии.

1Сеткилим Дээрги-Чаяакчыны алгап-йөрээзин ^a,
бүгү ишти-хөңнүм Ооң ыдыктыг адын алгап-йөрээзин!
2Сеткилим Дээрги-Чаяакчыны алгап-йөрээзин,
Ооң хайырлаан хамык ачы-буянын утпазын!
3Ол мээң шупту кем-буруумну өршээр,
хамык аарыымны экиртир ^b;
4амы-тынымны өлүмден адырар,
энерел болгаш ээ-хайыралы-биле мени бүргээр ^c;
5амыдыралымны ачы-буян-биле долдурар;
эзирнии дег, чалыы назыным чаартынып, эглип кээр ^d.

6Дээрги-Чаяакчы бүгү базындырган улуска
чөптүг чорук биле шын шииткелди көргүзер.
7Ол Бодунуң оруктарын Моисейге,
ажыл-херектерин – израиль чонга көргүскен.
8Дээрги-Чаяакчы килеңнээчел эвес,
кээргээчел, ээ көрнүүчел база элбек энерелдиг ^e;
9Ол бисти үзүк-соксаал чок буруудатпас,
кезээ мөңгеде хорадавас ^f.
10Ол биске кем-буруувус ёзугаар хамаарылга көргүспеди,
бисти бачыттарывыс ёзугаар кезетпеди ^g.
11Чүге дээрге дээрниң черден бедии дег,
Ооң энерели Оон коргар улуска өндүр бедик ^h;
12чөөн чүктүң барыын чүктен ырак турары дег,
бузуттарывысты Ол бистен ырадып каапты ⁱ;
13ачазының оолдарынга ээ-хайыралыы дег ^j,
Дээрги-Чаяакчы Оон коргар улуска ээ-хайыралыг.

14Ол бистиң чүден бүткенивисти билир,
довурактан тывылганывысты бодап чоруур ^k.
15Кижиниң назыны оът-сиген дег: шөлде чечек дег частып кээр ^l,
16а салгын-хат эстедир хадып эртерге, ол чиде бээр,
ооң турган чери ону ам танывайн баар ^m.
17А Дээрги-Чаяакчының энерели Оон коргар улуска
үе-дүптен эгелээш, кезээ мөңгеде артып каар ⁿ;
18Ооң чагыг-керээзин сагып, айтыышкыннарын күүседирин
утпайн чоруур улустуң үре-салгалынга Ол чөптүүн көргүзер ^o.
19Дээрги-Чаяакчы Бодунуң дүжүлгезин
дээрлерде тургузуп алган ^p,
Ооң чагыргазы бүгү чүүлдү башкарып турар.
20Дээрги-Чаяакчының төлээлери –
Ооң сөзүн сагып, айтыышкынын тооп дыңнаар
күш-шыдалдыг дайынчылар, Ону алгап-йөрээңер! ^q
21Дээрги-Чаяакчының шупту аг-шерии –
Ооң күзел-соруун күүседип турар чалчалар, Ону алгап-йөрээңер!
22Дээрги-Чаяакчының хамык чаяалгазы
Аңаа чагырткан бүгү черлерге Ону алгап-йөрээңер!
Сеткилим Дээрги-Чаяакчыны алгап-йөрээзин!