Psa 103 | TyvTUV | STEP | Сеткилим Дээрги-Чаяакчыны алгап-йөрээзин! Дээрги-Чаяакчы, Бурганым, канчаар-даа аажок өндүр улуг сен , чайынналчак мактал-хүндү

1 Сеткилим Дээрги-Чаяакчыны алгап-йөрээзин! ^a Дээрги-Чаяакчы, Бурганым, канчаар-даа аажок өндүр улуг сен ^b,
чайынналчак мактал-хүндү – кеткен хевиң ол-дур ^c.
2 Чырык-биле, тон-биле дег, шыптынып алган сен,
дээрни, чадырның сери-шывыын дег, чада салган сен ^d.
3 Дээрниң сугларының кырынга үстүкү ордуңну тудуп алган сен ^e,
бодуңнуң чуузаңга дег, булуттарга олурупкаш,
чалгынныг хатты хөлге кылгаш, халдып турар сен ^f.
4 Хаттардан ^g – Бодуңнуң төлээлериңни,
чалбыышталган оттан ^h –
Бодуңнуң бараан болукчуларыңны кылып аар сен ^{i
,} ^{▼▼103:4 Азы: «Бодуңнуң төлээлериңни – хаттар кылып каан сен, а бараан болукчуларыңны – оттуң чалбыыштары кылып каан сен».}.

5 Сен чер-делегейни быжыг үндезинге тургузуп кагдың ^k,
ол кажан-даа божаңнавас ^l.
6 Ону дүп чок далай-биле, тон-биле дег, шуглап каан турган сен,
суг дагларны шыпкан турган.
7 Суглар Сээң чемелээн сөзүңден дезип маңнап,
Сээң диңмирээн үнүңден хоюп ыңай бооп турган ^m.
8 Дагларже үнүп, шынааларже бадып,
Сээң оларга айтып бергениң черже агып турган ^{▼▼103:8 Азы: «Сээң оларны турзун дээниң черлерге даглар бедип, шынаалар чавызап турган».}.
9 Сен сугларның ажыр акпас кызыгаарын тургузуп кагдың,
олар ам черни хөме агар дээш дедир ээп шыдавас ^o.
10 Сен дамырактарны шынааларже аксып бадырыптың;
суглар дагларның аразында агып бадып,
11 шөлдерде шупту аң-меңге суксун болду,
черлик элчигеннер суксунун хандырып ап тур.
12 Суг кыдыында дээрниң куштары чурттай берген,
будук-бүрү аразында эдип олурлар.

13 Үстүкү ордуңдан дагларны суггарып тур сен,
Сээң ажыл-херээңниң үре-түңнели-биле чер-делегей тодуп тур.
14 Мал-маганга оът-сигенни,
кижилерге болбаазырадыр үнүш-дүжүттү өстүрүп:
оларның чиир аъш-чемин черден уштуп берип тур сен ^p.
15 Кижиниң сеткил-хөңнүн хөгледир араганы ^q,
арнын кылаңнадыптар олива үзүн,
шаг-шинээн быжыглаар тарааны берип тур сен ^r.
16 Дээрги-Чаяакчының ыяштары –
Ооң олуртуп кааны Ливан пөштериниң суксуну ханып тур,
17 оларга кушкаштар уялар тудуп аар;
шивилерге аист куштар уяланыр,
18 бедик дагларга те-чуңма турумчуур ^s,
хая-даштарга сарлык-дегелер ^{▼▼103:18 Сарлык-дегелер – еврей дылда «шафан» дээр үүрмек хээкчилер (Лев. 11:5; У. ч. 30:26 көр).} хоргадаар.

19 Дээрги-Чаяакчы үени тодарадыр дээш айны чаяап каан ^u,
хүн бодунуң ажар өйүн билир кылып каан ^v.
20 Сен дүмбей караңгыны чаттылдыр салыптарыңга ^w,
дүн дүжүп кээр –
ол өйде арга-эзимниң аң-меңи чимзенип чоруур,
21 арзылаңнар олча дилеп, ырланып, Бургандан аъш-чем дилээр ^x.
22 Хүн үнүп кээрге, аң-мең ээп чанып,
үңгүрлеринге, ижээннеринге чыткылап аар ^y.
23 Кижи амытан ынчан кежээге чедир
ажылдаар дээш үнүп келгеш, орайга чедир иженир.

24 Дээрги-Чаяакчы,
Сээң ажыл-херектериңниң хөй деп чүвезин!
Бүгү чүүлдерни мерген угаанның-биле чаяап каан сен ^z,
олар чер-делегейни дола берген!
25 А бо болза өндүр делгем далай-дыр.
Мында эмге-тикчок улуг-биче далай амытаннары бар,
26 корабльдар эжиндирип турар;
мында аңаа эштип ойназын дээш
чаяап кааның левиафан ^{▼▼103:26 Левиафан – хананей мифологияда сугда чурттап турар күчүтен моос азы улу (Иов 3:8; 40:20; 41:1; Ыд. ыр. 73:13-14; Иса. 27:1 көр).} бар.

27 Ол амытаннар шупту
«Аъш-чемни чогуур үезинде бээр боор» деп ^ab, Сеңээ идегеп турар.
28 Оларга бээриңге, чыып аарлар,
холуңну ажыда сунарыңга, ачы-буян-биле пөгүп тодарлар ^ac.
29 Олардан хая көрнүр болзуңза, корга бээрлер,
амы-тынын үзүп каарыңга, чок апарып,
тывылган довураанче дедир кире бээрлер ^ad.
30 Бодуңнуң тыныжыңны
оларга тындырыптарыңга ^ae, чаяаттына бээрлер,
Сен чер-делегейни ынчалдыр чаартып турар сен.

31 Дээрги-Чаяакчының алдары кезээ мөңгеде турзун ^af.
Ол Бодунуң чаяалгалары дээш өөрүзүн.
32 Черже Ол көрүптери билек, чер сирилей бээр,
дагларга дээптери билек, олар ышталы бээр ^ag.
33 Дириг чорааш, Дээрги-Чаяакчыны алгап ырлаайн,
чурттап чорааш, Бурганымны мактап ырлаайн ^ah.
34 Мээң сөстерим Аңаа таарымчалыг болзун;
Дээрги-Чаяакчы дээш өөрүп-хөглээйн.
35 А бачыттыг улус чырык чер кырындан арлып чиде берзин,
бузуттуг улус моон соңгаар турбазын.
Сеткилим Дээрги-Чаяакчыны алгап-йөрээзин!
Аллилуйя!