Psa 105 | TyvTUV | STEP | Аллилуйя! Дээрги-Чаяакчыга өөрүп четтириңер; Ол ачылыг-дыр, Ооң энерели кезээ шагда үстүп төнмес-тир .

1 Аллилуйя! Дээрги-Чаяакчыга өөрүп четтириңер; Ол ачылыг-дыр,
Ооң энерели кезээ шагда үстүп төнмес-тир ^a.
2 Дээрги-Чаяакчының күчү-күжүн чугаалап шыдаар,
Ооң макталга төлептиг шупту ажыл-херээн
медээлеп шыдаар кижи бар бе?
3 Чөптүг чорукту сагып чоруур,
үргүлчү шын чүве кылып чоруур улус амыр-чыргалдыг ^b.

4 Дээрги-Чаяакчы, Бодуңнуң чонуңче
ээ көрнүп тура, мени бодап кел:
Бодуңнуң камгалалыңдан меңээ хайырла –
5 Сээң шилип алган улузуңнуң аас-кежиин көрүп алыйн,
Сээң чонуңнуң өөрүшкүзү-биле өөрүп-хөглээйн,
Сээң өнчүң болур чон-биле кады чоргаарланып көрейн.

6 Ада-өгбевис-даа, бис-даа бачытты үүлгеткен-дир бис,
кем-бурууну, бузутту кылган-дыр бис ^c.
7 Ада-өгбевис Египетке
Сээң кайгамчык чүүлдериңни угаап билбээн,
Сээң өндүр улуг энерелиңни уттупкан,
Кызыл далай чанынга Сеңээ удурланган ^d.
8 Ынчалза-даа Бурган Бодунуң ат-алдарын бодааш,
Бодунуң күчү-күжүн көргүзер дээш оларны камгалап каан ^e.
9 Дээрги-Чаяакчы Кызыл далайга дужаарга, далай кургап калган ^f;
Ол ада-өгбевисти терең ээремнер таварты,
кургаг черлеп дег, эрттире берген ^g;
10 оларны көөр хөңнү чок улустуң холундан камгалап,
дайзынның холундан адырып каан ^h.
11 Оларның дайзыннарын суг хөме аптарга,
чаңгызы-даа амылыг артпаан ⁱ.
12 Израильчилер Ооң сөстеринге бүзүреп,
Ону мактап ырлажы бергеннер ^j.

13 Олар үр болбайн, Ооң ажыл-херектерин уттуп ^k,
чагыгларын манап албайн барганнар;
14 ээн кургаг ховуга аажок чем чиксей бергеннер,
Бурганны аңаа шенеп турганнар ^l.
15 Ол ынчан оларның дилээн күүсеткен ^m,
ындыг-даа болза, оларже арып-дорар аарыг ыдыпкан.

16 Олар турлаанга Моисейге база
Дээрги-Чаяакчының ыдыктап кааны Ааронга адааргай бергеннер ⁿ.
17 Чер ойлуп кире бергеш, Дафанны ажырыпкан,
Авиронну бүгү талалакчылары-биле кады хөөп алган ^o.
18 Оларның бөлүүнче от өөскүп кыпкаш,
буруулуг улусту чалбыыш өрттендир чипкен ^p.

19 Израильчилер Хорив дагның чанынга бугажык дүрзүзү
шуткуп кылып алгаш, аңаа мөгейип ^q,
20 боттарының алдарлыг Бурганын
оът-сиген чиир мал дүрзүзүнге орнапканнар ^r.
21 Египетке өндүр улуг үүле-херек кылып турган Бурганны –
боттарының Камгалакчызын уттупканнар ^s.
22 Олар Хаамның черинге ^{▼▼105:22 Хаамның чери – Египетти ынча деп турары ол, чүге дээрге Хаамның бир оглу Египеттиң үндезилекчизи кылдыр санадып турган (Э. д. 10:6-10; Ыд. ыр. 77:51; 104:23 көр).} –
кайгамчык чүүлдер,
Кызыл далай чанынга – коргунчуг чүүлдер
кылып турган Бурганны уттупканнар.
23 Дээрги-Чаяакчы израильчилерни узуткаар деп барган,
ынчалза-даа Ооң шилип алганы Моисей чонга болчуп,
оларны узуткавас кылдыр, Дээрги-Чаяакчының килеңин чайладыпкан ^u.

24 Оон израильчилер Ооң сөзүнге бүзүревейн,
күзенчиг черни тоовайн барганнар ^v.
25 Олар боттарының чадырларынга
Дээрги-Чаяакчының үнүн тооп дыңнавайн, хыйланып турганнар.
26 Ол ынчан даңгыраглап:
«Оларны ээн кургаг ховуга чок кылып каар мен,
27 оларның үре-салгалын чоннар аразынга узуткап каар мен,
өске чер-чурттарга тоо быдарадып каар мен» – деп турган ^w.

28 Олар Фегор дагның бурганы Ваалга мөгейип,
амы-тыны чок дүрзүлерге салган өргүл эъди чип ^x,
29 ажыл-херектери-биле Дээрги-Чаяакчыны килеңнедип турганнар.
Ынчан оларның аразынга айыыл-халап өөскүп үнген.
30 А Финеес киржи берип, шииткел үндүрерге,
айыыл-халап соксай берген ^y.
31 Бурган ол дээш Финеести
салгалдан салгал дамчып, кезээ мөңгеде чөптүг-шынныг кижи деп санаан ^z.

32 Израильчилер Мериваның суунуң чанынга
Бурганны хорададып алганнар ^aa,
Моисей ынчан олар дээш айыылга таварышкан:
33 олар ооң сеткил-сагыжынга килеңни оттуруптарга,
ол бодунуң аксы-сөзүн тудуп шыдавайн барган ^ab.

34 Олар Дээрги-Чаяакчының узутказын дээни чоннарны узуткавааннар ^ac,
35 харын өске чоннар улузу-биле холужуп ^ad,
оларның ёзу-чаңчылдарынга өөренип,
36 оларның дүрзү-бурганнарынга мөгейгеш, дузакка туттурганнар ^ae.
37 Олар оолдар, кыстарын буктарга өргүл кылдыр салып турганнар ^af.
38 Ханаанның дүрзү-бурганнарынга өргүл кылдыр салган
оолдар, кыстарының кем чок ханын төп,
ол черни бужартадып кааннар ^ag.
39 Кылган ажыл-херектери-биле боттарын бужартадып,
үүлгеткен херектери-биле самыыралга алзып турганнар.

40 Дээрги-Чаяакчының килеңи Бодунуң чонунче кыптыгып,
Бодунуң өнчүзү болур улустан хөңнү калып,
41 израильчилерни өске чоннар улузунуң холунга хүлээдип берген,
а демгилери оларны эдилеп эгелээн ^ah.
42 Дайзыннары дарлап-бастырга,
израильчилер оларның кадыг холунга кыстыртып алганнар ^ai.
43 Дээрги-Чаяакчы оларны хөй катап камгалаан ^aj,
а олар аңаа удур үймээн үндүрер чөрүү сагыштыг турганнар,
Ол ынчан оларны бузуттары дээш берге байдалга киирип каан.
44 Ынчалза-даа Дээрги-Чаяакчы
израильчилерниң кыйгызын дыңнап,
оларның кызагдадып алганын көрүп турган ^ak.
45 Олар-биле чарган чагыг-керээзин бодап,
Бодунуң өндүр улуг энерелинден оларны кээргеп ^al,
46 израильчилерни тудуп алгаш барган бүгү чоннарның оларга
ээ-хайыралыг болур сагыжын оттурупкан ^am.

47 Дээрги-Чаяакчы, Бурганывыс,
бисти камгалап көр;
Сээң ыдыктыг адыңны мактаар кылдыр,
Сээң мактал-хүндүң-биле чоргаарланыр кылдыр,
өске чоннар аразындан бисти бөлүп чыып көр.
48 Израильдиң Бурганынга – Дээрги-Чаяакчыга
кажан-даа, кезээ мөңгеде алдар!
Бүгү чон: «Ындыг-ла болзунам!» деп чугаалазын ^an.
Аллилуйя!