‏ Psalms 134

1Аллилуйя! Дээрги-Чаяакчының адын алгап-мактаңар-ла!
Дээрги-Чаяакчының чалчалары, Ону алгап-мактаңар!
2Дээрги-Чаяакчының өргээзинде,
Бурганывыстың бажыңының мурнунда турар улус ^a,
3Дээрги-Чаяакчыны буянныы дээш алгап-мактаңар!
Ооң тааланчыг адын алгап ырлаңар!
4Дээрги-Чаяакчы Иаковту Бодунга шилип алган,
Израильди Бодунуң улуг үнелиг өнчү-хөреңгизи кылдыр
шилип алган болгай ^b.

5Дээрги-Чаяакчы өндүр улуг деп,
Дээргивис бүгү бурганнардан бедип турар деп билир мен ^c.
6Дээрги-Чаяакчы күзээн-не бүгү чүүлүн
дээрлерге-даа, черге-даа,
шупту дүп чок далайларга-даа кылып турар ^d.
7Ол булуттарны черниң кыдыг-кызыгаарындан
бөлүп эккеп, чаъс чаап турда, чаңныктарны чаяап,
Бодунуң шыгжамырындан хатты үндүр хадыдып турар ^e.

8Ол Египетке бүгү дун төлдерни – кижилерниин-даа,
мал-маганныын-даа – узуткап каапкан ^f;
9Египет чоннуң аразынга кайгамчык демдектерин көргүзүп,
оларны фараон биле ооң бүгү дүжүметтеринге удурланыштыр кылган ^g.
10Дээрги-Чаяакчы хөй чоннарны базып каан,
күчүлүг хааннарны өлүрүп каан ^h.
11Амор хаан Сигонну, Васанның хааны Огту ⁱ болгаш
Ханаанның бүгү күрүнелерин узуткап кааш ^j,
12оларның черлерин Бодунуң израиль чонунга
өнчү кылдыр берипкен ^k.

13Дээрги-Чаяакчы,
Сээң адың кезээ мөңгеде артар!
Дээрги-Чаяакчы,
салгалдан салгал дамчып Сени кым-даа утпас! ^l
14Дээрги-Чаяакчы Бодунуң чонун чөптүү-биле шиидер
база Бодунуң чалчаларынче ээ көрнүр ^m.

15Өске чоннарның дүрзү-бурганнары –
алдын биле мөңгүнден бүткен, кижи холу шуткаан чүүлдер-дир ⁿ.
16Ол шуткумалдар аастарлыг-даа болза, чугаалавас;
карактарлыг-даа болза, көрбес ^o;
17олар кулактарлыг-даа болза, дыңнавас;
оларның аастарында амыдыралдың тыныжы чок ^p.
18Ындыг дүрзү-бурганнарны кылып турар,
оларынга идегээр бүгү улус
шак ол дүрзүлеринге дөмейлежи берзин ^q.

19Израиль чон, Дээрги-Чаяакчыны алгап-йөрээ!
Аароннуң салгалы, Дээрги-Чаяакчыны алгап-йөрээ!
20Левийниң аймаа, Дээрги-Чаяакчыны алгап-йөрээ!
Дээрги-Чаяакчыдан коргар улус, Ону алгап-йөрээңер! ^r
21Иерусалимде оран-савалыг Дээрги-Чаяакчы
Сионга алгаттырып-йөрээттирзин! ^s
Аллилуйя!