Psa 138 | TyvTUV | STEP | Хөгжүм башкарыкчызынга. Давидтии. Мизмор-ыр. Дээрги-Чаяакчы, Сен мени шылгап көрген сен, эки билир сен .

‏ Psalms 138

Хөгжүм башкарыкчызынга. Давидтии. Мизмор-ыр.

1 Дээрги-Чаяакчы,
Сен мени шылгап көрген сен, эки билир сен ^a.
2 Олуруп алганымны-даа, туруп келгенимни-даа билир сен,
бодалдарымны ырактан-на билип каар сен ^b.
3 Орукка чорумда азы дыштанып чыдырымда,
мени шылгаар сен,
мээң баар оруктарым шуптузу Сеңээ билдингир ^c.
4 Сөзүмнү чугаалап четтикпээнимде-ле,
Сен ону долузу-биле билир сен, Дээрги-Чаяакчы.
5 Артымдан, мурнумдан мени бүзээледиң,
холуңну менче салып алдың.
6 Сээң билииң меңээ кайгамчык онза,
аажок бедик – ону билип аар харыым чок ^d.

7 Сээң Сүлдеңден ырап кай баар мен,
Сенден дезип кай баар мен? ^e
8 Дээрже үне бээр-даа болзумза, Сен ында сен;
алдыы оранга чыдып аар-даа болзумза, Сен база ында сен ^f.
9 Даң хаяазын чалгыннангаш,
далай ындынче ужуп чеде берзимзе безин,
10 Сээң холуң мени аңаа чедип аар,
күштүг холуң мени орта тудуп аар.
11 «Дүмбей караңгы мени чажырып аар,
хүн чырыы меңээ дүн бооп хуула бээр» деп бодаан дижик мен.
12 Ынчалзажок дүмбей караңгы безин
мени Сенден чажырып шыдавас,
дүн безин хүн ышкаш чырыдар,
дүмбей караңгы Сеңээ чырык дег болур ^g.

13 Мээң чүрээмни Сен чаяап каан сен,
иемниң хырнының иштинге
мени боттандырып тургускан сен ^h.
14 Ол хире кайгамчык тургузуум дээш ^{▼▼138:14 Өске бурунгу сөзүглелде «Кайгамчыктыың база сөгүрүүшкүнге төлептииң дээш» деп бижээн.}
Сени мактап тур мен,
Сээң ажыл-херектериң кайгамчыктыг деп
сеткилим ылап-ла медереп билип тур.
15 Кажан мени чажыт черге чаяап турда ^j,
черниң ханызынга ^{▼▼138:15 Черниң ханызынга – ие кижини черге дөмейлей көрүп турар азы баштайгы кижини довурактан чаяаганын ынча деп турар чадавас.} чогаадып тургузуп турда,
мээң бүгү эът-сөөгүм Сеңээ илдең турган.
16 Сээң карактарың мээң боттанып орарымны көрген;
меңээ доктааткан хуусаа, чаңгыс-даа хүнү үнмээнде-ле,
бүрүнү-биле Сээң номуңда бижиттинген ^l.

17 Сээң бодалдарыңны билип аарымның бергезин, Бурганым,
оларның эмге-тикчогун! ^m
18 Оларны санап шенээр болзумза,
черниң элезининден-даа хөй-дүр.
Оттуп келгеш, Сээң-биле хевээр-дир мен.

19 Бурганым, бузуттуг хейни өлүрүп каарың кай! ⁿ
А силер, өлүрүкчүлер, менден ырап чоруңар!
20 Олар Сеңээ удур кара сагыштыг чугаалар чорудуп тур;
дайзыннарың хоозун меге чүүлдер чугаалап тур.
21 Сени көөр хөңнү чок улуска мээң база хөңнүм чок.
Дээрги-Чаяакчы,
Сеңээ удурланып турар улусту көөр хөңнүм чок ^o.
22 Оларны шуут-ла көөр хөңнүм чок –
олар мээң дайзыннарым апарды.

23 Мени шылгап көр, Бурганым,
сеткил-чүрээмни билип ал ^p,
мени шенээш, дүвүрелимни билип ал.
24 Човалаңга чедирер орукта ^{▼▼138:24 Азы: «Дүрзү-бурганнарга мөгеер орукта».}
эвес-тир мен бе – көрүп көр,
мөңге орук-биле мени эдертип көр.