Psa 142 | TyvTUV | STEP | Мизмор-ыр. Давидтии. Дээрги-Чаяакчы, мөргүлүмнү дыңна, чалынган үнүмнү кичээнгейге ал, шынчың база чөптүүң ёзугаар меңээ харыыла;

i142:12 Ыд. ыр. 53:7

‏ Psalms 142

Мизмор-ыр. Давидтии.

1 Дээрги-Чаяакчы, мөргүлүмнү дыңна,
чалынган үнүмнү кичээнгейге ал,
шынчың база чөптүүң ёзугаар меңээ харыыла;
2 мээң-биле чаргы-чаалы кылбайн көр –
Сээң мурнуңга кандыг-даа кижи актыг бооп шыдавас! ^a

3 Дайзын мени истеп-сүрүп, черге чыпшыр таптай базып,
үе-дүпте өлген улус дег, караңгыга турарын албадап тур ^b.
4 Эр соруум кошкай берди, чүрээм көжүй берди.
5 Шагда эрткен үелерни сактып ор мен ^c,
Сээң шупту ажыл-херээңни,
холдарың-биле кылган ажыл-херээңни бодап ор мен.
6 Холдарымны Сенче өрү сундум:
кургаан чер сугже дег, сеткилим Сенче чүткүп тур ^d. Сэла

7 Дүрген меңээ харыылап көр, Дээрги-Чаяакчы,
амы-тыным үстүр деп барды, менден хая көрүнмейн көр,
оон башка хөөрже кире берген улуска дөмей апаар мен ^e.
8 Эртен эрте энерелдиг харыыңны
дыңнаар аргадан бер – идегелим Сенде болгай.
Эртер оруумну айтып берем –
сеткилимниң ханызындан Сеңээ мөргүп тур мен ^f.

9 Дайзыннарымдан мени камгала, Дээрги-Чаяакчы,
чаглактаныр черим Сенде болгай.
10 Күзел-сорууңну күүседиринге өөредип каг,
чүге дээрге Бурганым-дыр сен.
Ачылыг Сүлдең мени оргу-дески черлеп аппарзын ^g.
11 Бодуңнуң адыңны бодааш ^h, мени амы-тынныг арттырып көр,
Дээрги-Чаяакчы, чөптүүң-биле мени айыыл-халаптан адырып көр.
12 Меңээ энерелдииң-биле дайзыннарымны узуткап каг ⁱ,
мени кызып-кыйган улустуң шуптузун кыргып-хыдып каг –
чүге дээрге Сээң чалчаң-дыр мен.