Psa 21 | TyvTUV | STEP | Хөгжүм башкарыкчызынга. «Даң хаяазының ивизи» деп аялга үдээр. Мизмор-ыр. Давидтии.

1 Хөгжүм башкарыкчызынга. «Даң хаяазының ивизи» деп аялга үдээр. Мизмор-ыр. Давидтии.
2 Мээң Бурганым! Мээң Бурганым! Чүү дээш мени кааптың? ^a
Сен мени камгалаарын көңгүс бодавайн тур сен,
мээң дуза дилээн кыйгымдан ырак-тыр сен ^b.
3 Бурганым! Хүндүс Сени кыйгырып тур мен –
а Сен харыы бербейн тур сен;
дүне база оожургал чок болу бердим ^c.
4 А Сен – Ыдыктыг Чагырыкчы сен,
израиль чон Сени мактап турар.
5 Ада-өгбелеривис Сеңээ идегеп, ынанып чорааннар,
а Сен оларны кадагалап келдиң.
6 Олар Сени кыйгырып турганнар –
камгалалды ап-даа келгеннер ^d;
Сеңээ ынанып чорааннар, идегели хоозун болбаан.

7 А мен – кижи эвес, курт-тур мен ^e,
улуска бак сөгледип, чонга дора көрдүрүп чор мен ^f.
8 – 9 Көрүп турар бүгү улус мени
аксы-биле дузап, баштарын чайып:
«Ол кижи Дээрги-Чаяакчыга ынанып турду.
Ынчангаш ол Дээрги-Чаяакчыга эргим болза,
Ол аңаа болчуп, камгалазын ^g» – деп кочулап турду ^h.

10 А Сен – мени хырын иштинден ужулгаш,
меңээ айыыл чок болур кылдыр
иемниң хоюнга салып каан Бурган сен ⁱ.
11 Төрүттүнүп кээримге-ле, мени Сеңээ тураскаадып берипкен,
иемден төрүттүнгенимден-не Сен – мээң Бурганым сен.
12 Менден ыравайн көр –
айыыл-халап чоокшулап кел чыдыр,
а меңээ дуза кадар кижи чок-тур ^j.

13 Хөй дайзыннар мени бүзээледи,
Васанның күштүг бугалары дег, үглеп келди ^k;
14 олар менче, олчазын үзе-чаза соп,
ырланган арзылаң дег, диштерин шаарартып тур.
15 Сеткил-сагыжым суг дег ага берди ^l,
шупту сөөктерим кадырылды;
чүрээм чук дег чымчай бергеш, иштимге кээп эсти берди.
16 Өрттедип турар дой саваның суу дег,
күш-шыдалым соглуп кагды, өгүмге дылым чыпшына берди,
Сен мени, өлүп калзын дээш, довуракче октаптың.
17 Бак хейлер мени ыттар дег бүзээлеп ^m,
мөөңү-биле үглеп келген, хол-будумну үзе-чаза соп каапкан ^{▼▼21:17 «Үзе-чаза соп каапкан» деп сөстерниң утказы эки билдинмес. Өске бурунгу сөзүглелдерде: «Хүлүп-шарып каапканнар», «Өттүр шанчып кааннар», «Арзылаңныы дег» деп бижээн.}.
18 Дөрт сөөк кижи апардым,
а дайзыннарым менче кайгап, топтап көрүп тур ^o.
19 Хептеримни аразында үлежип ап,
хөйлеңим алыр дээш үлүг тыртып турлар ^p.

20 А Сен, Дээрги-Чаяакчы, менден ыравайн көр,
мээң күчүм-дүр сен, дузалаар дээш далажып көр!
21 Амы-тынымны хылыштан камгала,
дың чаңгыс тынымны ол ыттардан камгала ^q;
22 арзылаң аксындан ^r, үзер бугалар мыйыстарындан
мени чайлат, меңээ харыылап көр.

23 Сээң адыңны ха-дуңма чонумга медээлээр мен,
чыыш мурнунга Сени алгап-мактаар мен ^s.
24 Дээрги-Чаяакчыдан коргар улус, Ону алгап-мактаңар! ^t
Иаковтуң бүгү салгалы, Ону алдаржыдыңар,
Израильдиң бүгү чону, Оон коргуңар!
25 Дээрги-Чаяакчы түрегдээн кижини тоовайн барбаан,
ооң дилээн херексевейн барбаан, оон хая көрүнмээн,
а кажан ол Бодун кый дээрге, дыңнап каан.
26 Эңмежок чоннуң чыыжынга
Сени мактаан сөстерим Сенден кээр ^u;
Сенден коргар улус мурнунга
Сеңээ берген даңгырактарым күүседир мен ^v.
27 Түрегдээн күжүрлер аштанып-чемненип, тотсун,
Дээрги-Чаяакчыже чүткээн улус Ону алгап-мактазын;
силерниң чүректериңер турбайн,
кезээ мөңгеде согар болзун!

28 Дээрги-Чаяакчыны сактып келгеш,
чер-делегейниң кыдыгларында
чурттаан улус Олче эглип кээр,
Ооң мурнунга бүгү аймак-чоннар кээп, мөгеер ^w;
29 чүге дээрге чагырга – Ооңуу-дур ^x,
чоннарның Чагырыкчызы – Ол-дур.
30 Чер-делегейде күш-шыдалдыг бүгү улус
ылаптыы-биле Аңаа мөгеер;
довурак-доозун бооп хуулуп бар чыдар, өлүр тынныг бүгү улус
Ооң мурнунга сөгүрүүр.
31 Келир салгалдар Дээргиге бараан болур,
Ооң дугайында салгалдан салгал дамчып медээлээр ^y.
32 Олар келир үеде төрүттүнер улуска
Дээрги-Чаяакчының чөптүүн,
Ооң кылган ажыл-херектерин чугаалап бээр ^z.