Psalms 27
Давидтии.
1Дээрги-Чаяакчы, Сенден дуза дилеп кый деп тур мен!Чөленгииш-хаям, харыы сөс чок артпайн көрем a.
Меңээ харыы бербезиңзе,
хөөрже кирген кижилер дег болу бээр мен b.
2Сенден бодум дилег кылып,
Сээң өргээңде эң ыдыктыг черже холум сунуп, мөгейдим c:
мөргүл кылган үнүм дыңнап көрем.
3Бузуттуг болгаш кара сагыштыг улус-биле кады;
өскелер-биле эп-найыралдыг чугаалажып тура,
чүректеринге бузут шыгжаар улус-биле кады d
мени кезетпейн көр e.
4Ындыг улуска оларның кылган ажыл-херектерин,
бузуттуг үүлгедиглерин ёзугаар кеземчеден онааштыр;
оларны холу-биле кылган ажыл-херектери дээш
чогууру-биле кезедип көр.
5Олар Дээрги-Чаяакчының ажыл-чорудулгазын,
Ооң холу-биле кылган ажыл-херектерин билип албаан-дыр f.
Ынчангаш Дээрги-Чаяакчы оларны үреп бускаш,
катап тудуп тургуспас.
6Дээрги-Чаяакчыга алдар!
Ол мээң мөргүл кылган үнүмнү дыңнап кагды!
7Дээрги-Чаяакчы – мээң күчү-күжүм-дүр,
мээң дозуг-камгалалым-дыр g,
мээң чүрээм Аңаа идегеп чораан.
Ол меңээ дузалады-даа –
чүрээм ол дээш өөрүп-байырлап тур h,
мен Ону алгап ырлап алдаржыдар мен.
8Дээрги-Чаяакчы – Бодунуң чонунга күчү-күш-түр,
Бодунуң шилип алган хаанынга – камгалалдың шивээзи-дир.
9Бодуңнуң чонуңну камгала,
Сеңээ хамааржыр улуска ачы-буяныңны хайырла!
Оларны кадарып эдертип
база кезээ мөңгеде кужактап көдүрүп көрем i.
Copyright information for
TyvTUV