Psalms 29
1 Өргээни чаартып турда, ырлаан мизмор-ыр. Давидтии.2Дээрги-Чаяакчы, Сени кымдан арттыр алгап-мактаар мен –
Сен мени көдүрүп аппаргаш, дайзыннарымга
мээң айыыл-халавым дээш өөрүп-байырлаар арга бербедиң a.
3Дээрги-Чаяакчы, Бурганым!
Сенден дуза дилеп турдум,
мени ынчан сегиткен сен.
4Дээрги-Чаяакчы! Сен мээң амы-тынымны
өлүглер оранындан үндүр тыртып эккелдиң,
хөөрже кире бербезин дээш, дириг арттырып кагдың b.
5Дээрги-Чаяакчыга бердинген улус,
Ону алгап ырлаңар, Ооң ыдыктыг адын алдаржыдыңар.
6Ооң килеңи хензиг өйде кыптыгар c,
а эки көөрү – амы-тынны хайырлаар:
кежээ ыглап-сыктазымза-даа,
даарта эртен өөрүп-байырлаар мен d.
7Сагыш човаар чүвем чок тургаш:
«Кажан кезээде тендиш дивес мен» – деп чугаалап чордум e.
8Дээрги-Чаяакчы, Сен менче ээ көрнүп,
мени быжыг даг дег кылып кагдың.
А менден өскээр көрнү бээриңге, коргуп турдум.
9Дээрги-Чаяакчы, ынчан Сенден диледим,
Дээргим сеңээ мөргүдүм:
10«Өлү бээримге, ажыы чүл?
Хөөрже кире бээримге, эки чүү боор?
Өлген сөөк Сени канчап алдаржыдарыл?
Алыс шыныңны канчап херечилээрил? f
11Дээрги-Чаяакчы, мени дыңнап, ээ көрүнем!
Дээрги-Чаяакчы, меңээ дузаң көргүзем!»
12Ыы-сыымны өөрүшкүже хуулдуруптуң,
качыгдалым хевин уштуп,
хөглээшкинниң хевин меңээ кедириптиң g –
13сеткил-чүрээм олчаан Сени алдаржыдып,
черле ыыт чок барбас болзун.
Дээрги-Чаяакчы, Бурганым,
Сени мөңге шагда алдаржыдайн!
Copyright information for
TyvTUV