‏ Psalms 32

1Чөптүг-шынныг улус, Дээрги-Чаяакчы дээш өөрүп-байырлаңар!
Бурганны алгап-мактаан сөстер
ак сагыштыг улустуң аксы-дылынга эптежир.
2Дээрги-Чаяакчыны чадаган-биле үдеп, мактаңар,
Аңаа эткир үннүг чанзы-биле үдеп, ырлап бериңер a;
3Аңаа чаа ырдан ырлап бериңер b,
аянныг, ыыткыр үдеп, ырлажыңар.
4Дээрги-Чаяакчының сөглээн сөзү арыг шын,
Ооң кандыг-даа ажыл-херээ ылап шынныг.
5Ол чөптүг чорук биле шын шииткелге ынак c;
Ооң энерели чер-делегейни бүргей алган d.
6Дээрги-Чаяакчының сөзү-биле дээрлер,
Ооң аксындан үнген тыныш-биле
дээрлерде бар бүгү чүүлдер чаяаттынган e.
7Ол далайның сугларын чаңгыс черге бөле чыып каан f,
дүп чок ээремнерни шыгжамырларже дег кылдыр
шыгжай суп каан.

8Дээрги-Чаяакчыдан бүгү чер-делегей сүртезин;
Ооң мурнунга өртемчейниң бүгү чурттакчылары
коргуп сирилезин.
9Ол чугаалаарга g, бүгү чүве тывылган,
Ол дужаарга, бүгү чүве тургустунган;
10Дээрги-Чаяакчы аймактарның бодал-сагыжын
күш чок болдуруп,
чоннарның бодалдарын буурадып турар h.
11А Дээрги-Чаяакчының шиитпири кезээ мөңгеде артар,
Ооң чүрээнге тывылган бодалдар
салгалдан салгал дамчып чурттаар i.

12Дээрги-Чаяакчы оларның Бурганы болган чон,
Ооң өнчү кылдыр шилип алганы аймак амыр-чыргалдыг j.
13Дээрги-Чаяакчы дээрлерден ээккеш көрүп,
кижи төрелгетенни хайгаарап турар k;
14Ол Бодунуң саадап орар дүжүлгезинден
черде чурттаан бүгү улусче көрүп орар l.
15Ол улустуң шуптузунуң чүректерин чаяап берген,
оларның бүгү ажыл-херектерин өттүр көрүп турар.

16Хаан кижиге аг-шерииниң хөйү камгалал болбас,
тулган мөге кижини улуг күш-шыдалы камгалавас m.
17Тиилелге чедип алыр дизе, дайынчы аътка кордаан херээ чок,
ол бодунуң кончуг улуг күжү-биле ээзин камгалап шыдавас n.
18Дээрги-Чаяакчыдан коргар, Ооң энерелинге идегээр улусту
Ол карактап-кадагалаар o.
19Ол улусту өлүмден камгалаар,
аш үезинде оларны ашкарып-чемгерер p.

20Бис Дээрги-Чаяакчыга
сеткиливис ханызындан идегээр бис;
Ол – биске дузалаар, бистиң дозуг-камгалалывыс болур q;
21Бурган дээш, чүрээвис өөрүүр,
Ооң ыдыктыг адынга ынаныр болгай бис.
22Дээрги-Чаяакчы, Сеңээ канчаар идегээривис дег,
энерелиң бисти ынчаар кадагалазын!
Copyright information for TyvTUV