‏ Psalms 54

1Хөгжүм башкарыкчызынга. Хылдыг хөгжүм херекселдери үдээр. Маскил-ыр. Давидтии.
2Бурганым, мөргүлүмнү дыңна,
чаннып дилээн үнүмден чашты бербе.
3– 4Мени дыңнап, харыыдан бер.
Дайзынның үнүн дыңнааш, бузуттуг хейге кызагдаткаш,
хей-аъдым кудулап, качыгдалдан уё-човуурум төп тур мен.
Олар шупту меңээ хора чедирип, килеңнеп база өжээргеп турлар ^a.

5Хөрээмейде чүрээм күжүр сарыннай-дыр,
өлүм-чидимден коргуушкун хөме ап тур;
6коргуп-сүртээн сеткилимге алзывыткаш, аймап калдым.
7Ынчангаш мен мынча дидим:
«Көге-буга ышкаш чалгын-чүглүг болурум кай,
ужуп үнгеш, оожум черге хонуп алза.
8Талыгырже ырай бергеш, ээн черге турумчуп алза ^b. Сэла
9Шак-ла ынчан чайык-чаъстан, шуурган-хаттан
шалып-дүрген чаштып-хоруй бээр ийик мен!»

10Дээрги-Чаяакчы, дайзыннарымны чок кылып,
чугаа-дылын холуп-буда.
Хоорайда мен чүгле алгыш-кырыш биле
күчүлелди көрүп тур мен ^c.
11Хоорайның ханаларын дүне-хүндүс эргий кезип,
хилинчекти, бузут-бакты нептереткеш туруптулар.
12Хоорайны хай-халап дола берген, кудумчулар, шөлдеринден
оп-меге, кара сагыш ыравастаан.

13Мени бактап турар кижи – дайзыным эвес-тир,
ындыг болза, шыдашкай мен;
мени куду көрүп турар кижи – өжээтеним эвес-тир,
ол турган болза, чашты бээр ийик мен.
14А ол дээрге сен-дир сен –
сеткилимниң чамдыы болган, эргим, эң чоок эжим;
15аравыста ижин кара чок чугаалажып,
мөөң чоннуң аразынга Бурганның өргээзинче ^d
кады барып турган эжим – сен-дир сен!

16Дээрги-Чаяакчы дайзыннарымче –
аал-оранын-даа, сеткилин-даа
кара сагыш ээлээн өжээтеннеримче өлүмнү салыпсын,
оларны диригге-ле алдыы оранче киирипсин! ^e
17Бурганымны кыйгырар мен –
Дээрги-Чаяакчы мени камгалаар.
18Кежээликтей, эртен, дүъште ыглап-сыктап,
дилег кылып кыйгырар мен: үнүмнү Ол дыңнап кааптар;
19менче халдаан дайзыннарым дескиндир эңдерик-тир –
Дээрги-Чаяакчы мени олардан адырып,
сагыш амыр арттырып каар.
20Дүжүлгеге үе-дүптен бээр саадаан Бурган
мени дыңнап каапкаш ^f, дайзыннарны бакка сугар. Сэла
Олар – черле экижип өскерилбес, Бургандан кортпас,
21эптиг-демниг кады чораан улузунче халдай бээр ^g,
эвилел туткан аксы-сөзүн үрээр улус-тур.
22Чугаа-сөзү үстен чымчак ^h,
чүректерин чаа-дайын ээлээн улус ол-дур;
аксы-сөзү өремеден хоюг,
алыс боттары хылыш ышкаш айыылдыг улус ол-дур.

23Дээрги-Чаяакчыга үүрге-чүъгүң хүлээдип бер ⁱ,
Ол сени деткиир деп бил. Чөптүг-шынныг кижини
Ол кажан-даа тайып ушпас кылып каар.
24О Бурганым, дайзыннарымны өлүм-чидимниң тамызынче дүжүр окта ^j:
өлүрүкчү, сагыжы кара хейлер ^k
өйлүг назын чартыы чедир чурттавазын ^l.
А мен Сеңээ идегээр мен!