Psalms 6
1Хөгжүм башкарыкчызынга. Шеминит деп аян-биле a үдээр. Мизмор-ыр. Давидтии.2Дээрги-Чаяакчы, килеңнээн хүнүңде мени сойгалава,
кылыктанган хүнүңде мени кезетпе! b
3Дээрги-Чаяакчы, харыксырай бердим, ынчангаш менче ээ көрүн;
Дээрги-Чаяакчы, ишти-хөңнүм дойлуп тур, ынчангаш мени экиртип каг.
4Сеткилим аажок хөлзеп тур,
чежеге дээр манадыр сен, Дээрги-Чаяакчы?! c
5Дээрги-Чаяакчы, эглип келгеш, мени камгала.
Энерелдииң-биле мени адырып хоста.
6Чевегге чыткаш, Сени бодаар кижи турбас;
өлүглер оранынга Сени кым-даа мактавас d.
7Ыглап-сыктааш, могай бердим:
дүнениң-не орун-дөжээм өл-шык болур,
караам чажындан чыдыным шыгый бээр.
8Шупту дайзыннарым балазындан
карактарым шоозу өжүп, кударалдан карактарым соглуп тур e.
9Бузут үүлгедикчилери, шупту менден ырай бериңер f,
Дээрги-Чаяакчы мээң ыы-сыымны дыңнап каан-дыр.
10Дээрги-Чаяакчы тейлээн сөзүм дыңнап каапкан –
мөргүлүмнү Ол хүлээп алыр.
11Дайзыннарым дөгерези аажок дүвүреп, ады баксыразын,
аткаарлап, кончуг дүрген бак атка кирзин g.
Copyright information for
TyvTUV