‏ Psalms 70

(Ыд. ыр. 30:1-4)

1Дээрги-Чаяакчы, хоргадалым Сенде, адым кажан-даа баксыравазын.
2Чөптүүң ёзугаар мени хостап, камгала ^a,
кулааңны менче ээктирип, кадагала.
3Кажан-даа бол чашты бээрим хая бол;
мени камгалаарын аазаан болгай сен,
быжыг чалым-хаям, шивээм – Сен сен ^b.

4Бурганым! Бузуттуглар, бак улус,
кызагдакчылар холдарындан мени адыр ^c.
5Аныяамдан идегелим, ынаныжым ^d –
чүгле Сен сен, Дээрги-Бурган-Чаяакчы.
6Төрүттүнүп кээримден-не чөленгиижим Сенде турду;
төрээн ием хырнындан Сен-не мени ужулдуң ^e.
Үргүлчү-ле Сени алгап-мактап чор мен.
7Хөй улуска элдептиг чүүл болу бердим,
а Сен меңээ – ылап быжыг хоргадал сен.
8Аксы-дылым Сени алдаржыдар сөстерден бүткен,
хүннү бадыр Сени алгап-мактаар-дыр мен ^f.

9Кырып-чөнүй бээримге, тоовайн барба;
шыдал-күжүм суларай бээрге, мени кагба.
10Меңээ удур дайзыннарым сүлчээлешти;
амы-тыным үзүксээн улус сүмележип ^g:
11«Бурган ону каапкан-дыр; истеп-сүрүп, тудуп алыылы,
аңаа болчур кижи чогул» – дижип тур ^h.

12Бурган, менден ырап чорба;
мээң Бурганым, дүрген дузалап кел.
13Меңээ удурланып турар улус бак атка кирип, читсин;
меңээ бак чүве күзээн улус ыядып, дора көрүүшкүнге бүргетсин ⁱ.
14А мен кезээде Сеңээ идегеп,
Сени мактаан сөстеримни ам-даа немээйн.
15Аксы-сөзүм хүннү бадыр
чөптүг чорууң биле камгалалыңны медээлезин –
оларны көргүскен ажыл-херектериң көвей,
сан-түңүн-даа билбес мен ^j.
16Дээрги-Бурган-Чаяакчы,
өндүр улуг ажыл-херээңниң ачызында
Сеңээ чедип кээр мен,
Сээң, чүгле Сээң чөптүүңнү медээлээр мен.

17Бурганым, чажымдан бээр сургап келдиң.
Амдыгаа дээр кайгамчыктыг ажыл-херээң чарлап чор мен.
18Буурарып, кырыыжемче мени кагба, Бурганым –
амгы база келир салгалдарга
күчү-күжүң медээлеп четтигиптейн.
19Чөптүг чорууң дээрлерге четкен дег-дир ^k, Бурганым.
Өндүр бедик ажыл-херек кылган Бурган,
Сеңээ дөмей кым-даа чогул ^l.
20Эңмежок айыыл-халапты, аар-бергени менче салып-даа тургаш,
кезээде мени катап тынгарып,
черниң ханызындан катап үндүрүп кээп турдуң ^m.
21Алдар-адымны улгаттырып,
аргалалды база катап берип тур сен.

22А мен Сени, Сээң шынныыңны
чадаган-биле алдаржыдып ырлаар мен, Бурганым.
Израильдиң ыдыктыг Бурганы,
чанзы-биле Сени алгап ырлаар мен ⁿ.
23Сени мактап тура, аксы-сөзүм амырап ырлаар,
Сээң адырып хостааның сеткил-сагыжым өөрүй бээр.
24Чөптүг чорууңну хүннү бадыр медээлээш,
аксы-дылым могап шылавас;
меңээ хора чедирерин күзээн улус ыядып човап,
бак атка кирген болгай.