‏ Psalms 76

1Хөгжүм башкарыкчызынга. Идифунга ^a. Асафтыы. Мизмор-ыр.
2Бурганче үнүм чедирип, кыйгырар мен;
Бурганга үнүм четсин, Ол мени дыңнап кагзын.
3Айыыл-халап келген хүнде Дээргиже чүткүп тур мен ^b,
дүннү өттүр холдарымны Олче сунгаш, бадырбас мен,
сеткилим аргалалдан ойталап тур!
4Бурганны сактып ора, улуг тынып, човууртаар мен,
бодап-бодап орарымга, сагыш-сеткил харыксыраар. Сэла

5Карактарым шийдирбейн тур сен,
канчаар-даа аажок бергедээштиң, үнүм безин үнмейн тур.
6Эрте-бурунгу үелерни,
эрткен-барган чылдарны-даа бодап ор мен ^c,
7дүнелерде бадыра бээр ырларымны сактып тур мен,
бодалдарым дойлуп, сеткилим харыы дилеп, айтырып тур:
8«Таанда-ла Дээрги бистен кезээ мөңгеде ойталаан бе,
моон соңгаар ээ көрүнмес бе?
9Таанда-ла Ооң энерели кажан-даа эглип келбес бе,
Ооң сөзү салгалдан салгал дамчып дыңналбас бе?
10Таанда-ла Бурган ээ-хайыралдыын уттупкан бе,
килеңнеп тура, өршээл көргүзерин соксаткан бе?» Сэла
11«Дээди Өрүкүнүң холу ачы-дуза чедирбестээн-дир! –
аарышкы-човалаңым ында-дыр» деп бодандым.

12Дээрги-Чаяакчының ажыл-херектерин сактып кээр мен,
үе-дүптен бээр кылып турар кайгамчык чүүлдерин сактып кээр мен ^d.
13Сээң хамык ажыл-үүлеңни хандыр бодап,
Сээң кылган ажыл-херектериң дугайында боданыр мен.

14Бурганым, Сээң орууң ыдыктыг-дыр!
Бурганым ышкаш өндүр улуг бурган бар бе? ^e
15Кайгамчык чүүлдер кылып турар Бурган-дыр сен,
улус-чоннар аразынга күчү-күжүң көргүскен сен;
16Иаков биле Иосифтиң салгалын –
Бодуңнуң чонуңну күжүң-биле камгалаан сен. Сэла

17Суглар Сени көрген болгай, Бурганым,
олар Сени көргеш, девидей берген, дүп чок далайлар сирилей берген ^f.
18Булуттардан чаъс суу куттулуп,
дээрлерден дааш-шимээн дыңналып, Сээң согуннарың ужугуп турган ^g.
19Сээң диңмирээшкиниң үнү дээрлерге дагжап,
кызаңнааштар өртемчейни чырыдып,
чер сирилеп, серт кыннып турган ^h.
20Сээң эрткен орууң – далайда, Сээң кокпаң – терең сугларда,
Сээң истериңни кижи көрбээн ⁱ.
21Бодуңнуң чонуңну Моисейниң база Аароннуң холу-биле,
кодан мал дег, сүрүп аппар чыткан сен ^j.