‏ Psalms 93

1Өжээн негекчизи ^a Бурган, Дээрги-Чаяакчы, өжээн негекчизи Бурган, чырып көстүп келем! ^b
2Чер-делегейниң Шииткекчизи, туруп келем ^c,
улуургак улуска чогуур кеземчени онааштырып көрем.
3Дээрги-Чаяакчы, чежеге дээр
бузуттуг улус өөрүп-байырлаарыл, чежеге дээр?! ^d
4Олар бардам сөстер эдип, аажок турлар,
бузут үүлгедикчилери шупту мактанып турлар;
5Сээң чонуңну бастып турлар,
Дээрги-Чаяакчы,
Сээң өнчүң болур улусту дарлап турлар ^e.
6Дулгуяк херээженни база өскээртен келген кижини өлүрүп,
өскүс-чавыс улусту чок кылып турлар ^f.
7«Дээрги-Чаяакчы көрбес-тир ийин,
Израильдиң Бурганы билбес-тир ийин» – дижирлер-дир ^g.

8Чон аразында бүдүүлүк улус, угаан кириңер!
Мелегей улус, кажан орталаныр силер?!
9Бисти кулактыг кылып каан Бурган дыңнавас деп бе,
карак чаяап берген Бурган көрбес деп бе? ^h
10– 11Чоннарны эдип-чазап турар Бурган
оларга яла онааштырбас деп бе?
Кижи амытанны билиглерге өөредип турар Дээрги-Чаяакчы
улустуң бодалдарын билир, олар – хей-бус дээрзин билир! ⁱ.

12Дээрги-Чаяакчы, Сээң эдип-чазап турарың,
дүрүм-хоойлуңга өөредип турарың кижи амыр-чыргалдыг ^j.
13Бузуттуг хейге оңгар кастынгыжеге чедир,
Сен ол кижиге айыыл-халап үезинде
сагыш амыр боорун хайырлаар деп турар-дыр сен.
14Дээрги-Чаяакчы Бодунуң чонундан ойталавас,
Бодунуң өнчүзү болур улусту каапкаш барбас! ^k
15Шииткел база катап чөптүг чорукка үндезилеттинер,
мөзүзү эки бүгү улус ону эдерер.

16Кым мен дээш бак сагыштыг улуска удур туржурул?
Кым меңээ болчуп, бузут үүлгедикчилеринге удур туржурул?
17Дээрги-Чаяакчы меңээ дузалаваан болза,
алдыы оранның шыпшыңынче бада бээр чыгыы турган мен ^l.
18«Будум тендиш деп тур!» – деп турган үемде,
Сээң энерелиң меңээ чөленгииш бооп турду, Дээрги-Чаяакчы.
19Ишти-хөңнүмде дүвүрел көвүдээн тудум,
Сээң аргалалың сеткилимни сергедип чор.

20Дүрүм-хоойлуну ажыглап, улуска бак чүве кылып,
оларны узуткап чоруур чагырыкчылар
Сээң-биле чаңгыс эп-сеткилдиг болур бе?
21Олар бөлүглешкеш, чөптүг-шынныг кижиже халдап,
кем-буруу чок улусту өлүрүп шиидип турар-дыр ^m.
22Ынчалзажок Дээрги-Чаяакчы – мээң быжыг шивээм,
Бурганым – мээң хоргадаар хаям ⁿ.
23Ол бузуттугларга кем-буруузу дээш кеземче көргүзер,
оларны багы дээш узуткап каар.
Дээрги-Чаяакчы – Бурганывыс оларны чок кылып каар.