‏ Psalms 101

1Харыксырай бергеш, Дээрги-Чаяакчының мурнунга бодунуң хомудалын чугаалап турар түрегдээн кижиниң мөргүлү ^a.
2Дээрги-Чаяакчы, мөргүлүмнү дыңна,
дуза дилээн кыйгым Сеңээ четсин.
3Айыыл-халап хүнүнде менден хая көрүнме,
кулааңны менче ээктир, кыйгырган хүнүмде дүрген харыыла.

4Амыдыралым ыш дег эстип читти ^b,
сөөктерим одагда оттуг кезек дег өрттенип калды ^c.
5Чүрээм оът-сиген дег саза бастырып, кадып калды ^d,
аъш-чем чиир безин хөңнүм чок апарды ^e.
6Човууртап тур мен, сөөктерим эът-кежимге чыпшына берди.
7Ээн куруг черлерде куш-биле дөмей апардым,
бузундуларда чурттаан үгү дег болу бердим ^f.
8Уйгум келбестеп, сери кырында
чааскаанзыргай бора-хөкпеш дег орар-дыр мен.
9Дайзыннарым хүннү бадыр мени бак сөглээр-дир,
мени кочулаан улус мээң адым-биле карганыр-дыр ^g.
10Хүлдү аъш-чем кылдыр чип,
суксунумга карак чажын холуп келдим ^h.

11Сээң килеңнеп хорадааныңдан ынчалдыр болганы ол –
Сен мени өрү көдүргеш, дүжүр октаптың.
12Назыным хөлеге дег чидип бар чыдыр ⁱ,
оът-сиген ышкаш када бердим.

13А Сен, Дээрги-Чаяакчы,
дүжүлгеңге кезээ мөңгеде саадаар сен ^j,
улус Сени салгалдан салгал дамчып сактып чоруур ^k.
14Сен туруп келгеш ^l, Сионга ээ-хайыралың көргүзер сен –
ону өршээр үе келген-дир, ындыг үе-шаг ол-дур ^m.
15Сээң чалчаларыңга Сионнуң даштары эргим болгай,
ооң довураа дээш безин хараадап турарлар болгай ⁿ.
16Ол үеде бүгү чоннар Дээрги-Чаяакчының адын,
чер-делегейниң шупту хааннары алдарлыг Сени аажок хүндүлээр-дир ^o.
17Дээрги-Чаяакчы Сионну катап тургузар,
Ооң өндүр чырыы чайынналып көстүп кээр ^p.
18Чаржынчыг түреңги улустуң мөргүлүн Ол хүлээп аар,
оларның чалынганын тоовайн барбас.

19Ол бүгүнүң дугайында улус келир салгалга бижип, арттырып каар ^q,
ынчан Дээрги-Чаяакчының чаяап каар чону Ону алгап-мактаар.
20Чүге дээрге Дээрги-Чаяакчы
Бодунуң ыдыктыг кудайындан черже көрген,
дээрлерден черже хайгаарап көрген ^r.
21Ол хоругдаткан кижиниң човуурун дыңнап каарын,
өлүр четкен улусту хостаарын күзээн ^s.
22– 23Ынчан чоннар биле күрүнелер
Дээрги-Чаяакчыга бараан болур дээш шупту чыглып кээп,
Сионга Дээрги-Чаяакчының адын алгаар,
Иерусалимге Ону мактаар ^t.

24Ол мээң күжүмнү орук ара төндүрдү, назынымны кыскалатты.
25Мен ынчан: «Бурганым, назыным орту чедип чорда,
мени алгаш барба» – дидим.

А Сен мөңге чурттаар сен ^u.
26Үе-дүпте чер-делегейни үндезилеп тургустуң ^v,
дээрлер база Сээң холуңнуң чаяалгазы.
27Чер биле дээр чиде-даа бээрге, Сен артып каар сен,
олар шупту хеп ышкаш элеп каар ^w;
оларны Сен тон ышкаш солуп кааптарыңга,
солуттунуп, чиде бээрлер ^x.
28А Сен биеэги хевээр сен, Сээң назының төнчү чок ^y.
29Сээң чалчаларыңның ажы-төлү
бо черге амыдырап артар, оларның үре-салгалы
Сээң хайгааралың адаанга бут кырынга быжыг турар ^z.