Psa 104 | TyvTUV | STEP | Дээрги-Чаяакчыга өөрүп четтириңер, Ооң адын адап, мактаңар, өске чоннарга Ооң ажыл-херектерин медээлеңер;

1 Дээрги-Чаяакчыга өөрүп четтириңер, Ооң адын адап, мактаңар,
өске чоннарга Ооң ажыл-херектерин медээлеңер; ^a
2 Ону алгап ырлаңар, Аңаа ырлап бериңер;
Ооң кылган бүгү кайгамчык чүүлдерин чугаалап бериңер ^b.
3 Ооң ыдыктыг ады дээш чоргаараңар;
Дээрги-Чаяакчыже чүткүп чоруур улустуң
сеткил-сагыжы өөрүп-хөглезин.
4 Күчүлүг Дээрги-Чаяакчыны эдериңер,
Ооң-биле үргүлчү кады турар дээш чүткүңер ^c.

5 – 6 Дээрги-Чаяакчының чалчазы Авраамның үре-салгалы,
Иаковтуң салгалы, Бурганның шилип алган улузу!
Ооң кылган кайгамчык чүүлдерин, Ооң көскү демдектерин,
Ооң аксындан үнген шын шииткелдерин сактып чоруңар ^d.
7 Ол дээрге бистиң Бурганывыс, Дээрги-Чаяакчы-дыр:
бүгү чер-делегейде Ооң шын шииткелдери бар ^e.

8 Ол Бодунуң берген чагыг-керээзин –
чоннуң муңгу салгалынга чедир ^f
чагаан сөзүн кезээ мөңгеде утпас ^g.
9 Ол ону Авраам-биле чаргаш,
Исаакка Бодунуң даңгыраан берген ^h.
10 Ол ону Иаковка дүрүм-хоойлу кылдыр доктааткаш,
Израильге мөңге чагыг-керээ кылдыр быжыглаан:
11 «Сеңээ өнчү кылдыр ханаан черни бээр мен» ⁱ.

12 Өгбелеривис аажок эвээш санныг, көңгүс хөй эвес турда,
олар Ханаанга өскээртен келген улус турда ^j,
13 олар бир чондан өске чонче, бир күрүнеден
өске аймактың күрүнезинче көжүп чоруп турда,
14 Бурган оларны дарлаар арганы кымга-даа бербейн,
хааннарны олар дээш чемелеп ^k:
15 «Мээң шилип алган улузумга дегбеңер,
Мээң медээчилеримге ^l багай чүве кылбаңар!» – деп турган.

16 Дээрги-Чаяакчы чер кырынче ашты бадырып ^m,
тараалыг бүгү үнүштү узуткап каан.
17 Ол Египетче бир кижини өгбелеривисти мурнай чорудупкан:
Иосифти кул кылдыр саттырыпкан ⁿ.
18 Иосифтиң буттарын кинчилер бектеп,
демир дөңгү ооң мойнун боой кызып алган –
19 Иосифтиң баш удур чугаалаан сөзү боттанмааже ^o, ындыг турган.
Дээрги-Чаяакчының сөзү Иосифти ынчалдыр шенээн.
20 Фараон Иосифти эккелдирип алган, чоннарның чагырыкчызы
ооң кинчи-бегин адыртып, хостааш ^p,
21 бодунуң ордузунуң дээргизи кылдыр база
бодунуң эдилээн бүгү байлаан
аайлап-башкарар кижи кылдыр томуйлап каан ^q.
22 Иосиф ынчан хаанның дүжүметтерин
бодунуң туралааны-биле башкарып ^{▼▼104:22 Өске бурунгу сөзүглелде «башкарып» деп эвес, а «сургап» деп сөстү бижээн.},
баштыңнарны мерген угаанга өөредип турган.

23 Израиль ынчан Египетке чедип келген ^s,
Иаков Хаамның черинге ^{▼▼104:23, 27 Хаамның чери – Египетти ынча деп турары ол, чүге дээрге Хаамның бир оглу Египеттиң үндезилекчизи кылдыр санадып турган (Э. д. 10:6-10; Ыд. ыр. 77:51; 105:22 көр).} көжүп келген турган.
24 Бурган Бодунуң чонун эңдере өстүрүп-көвүдеткеш,
ооң дайзыннарындан артык күштүг кылып каан ^u.
25 Бурган ол дайзыннарның чүректерин
Ооң чонун көөр хөңнү чок кылып каарга ^v,
олар Ооң чалчаларынга удур кара сагышты бодаар апарган.

26 Дээрги-Чаяакчы Бодунуң чалчазы Моисей биле
шилип алган кижизи Ааронну айбылап чорудупкан ^w.
27 Олар Хаамның* чериниң чурттакчыларының аразынга
Ооң сөстерин ёзугаар
көскү демдектер болгаш кайгамчык чүүлдерни көргүскен ^x.
28 Ол дүмбей караңгыны чорудуп, чер кырын караңгыладыпкан ^y,
Ооң сөзүнге кым-даа удурланып шыдаваан.
29 Дээрги-Чаяакчы дайзыннарның суун ханче хуулдуруп,
оларның балык-байлаңын кырып каапкан ^z.
30 Оларның черинге, хааннарның ордузунга безин
бөзүр-пагалар имиңейни берген ^aa.
31 Ооң чугаалаан сөзү-биле оларның черин бир кылдыр
ызырар сээктер, хүлчүктер үглей ужуп келген ^ab.
32 Дээрги-Чаяакчы чаъс орнунга долуну чагдырып,
оларның чуртунче кызаңнааштарын дүжүрген ^ac;
33 оларның виноградын, фига чимистерин дүжүр шаап,
ээлээн девискээринде ыяштарның шуптузун сыйып каапкан.
34 Дээрги-Чаяакчының чугаалаан сөзү-биле
сан-түң чок мөөң шартылаа болгаш шерги үглей ужуп келгеш ^ad,
35 оларның черинде бүгү оът-сигенни,
шөлдеринде үнген дүжүттү сыырыпкан.
36 Дээрги-Чаяакчы оларның черинде
дун төл бүрүзүн – оларның эң үнелиг эртине-байлаан –
узуткап каан ^ae.

37 Бурган израильчилерни ук черден
алдын-мөңгүннүг үндүре берген ^af,
оларның аймактарының аразында
арай деп калгып чоруур кижи чок болган.
38 Египет чон израильчилерден коргуп-сүртээн болгаш,
оларның чоруй барганы дээш өөрээн ^ag.
39 Дээрги-Чаяакчы оларга шывыг кылдыр
булутту чада салып берген;
оруун дүне от-биле чырыдып берип чораан ^ah.
40 Оларның дилээ-биле Ол матпадактар чорудуп берип,
дээрден баткан тараа-биле оларны тоттуруп турган ^ai.
41 Хаяны хаптарга, суг аттыгып үнүп,
ээн кургаг ховуга хем агып бадып эгелээн ^aj.

42 Бурган Бодунуң чалчазы Авраамга берген
ыдыктыг аазаашкынын утпайн чораан болгай ^ak.
43 Ол Бодунуң чонун, шилип алган улузун
Египеттен үндүрүп эккээрге, олар өөрүп-хөглеп турган ^al.
44 Оларга өске чоннарның чурттаан черлерин берген,
олар өске аймактарның өнчүзүн салгап алган ^am.
45 Ынчангаш Дээрги-Чаяакчының чону
Ооң айтыышкыннарын сагызын,
Ооң дүрүм-хоойлузун кадагалап арттырзын.
Аллилуйя!