‏ Psalms 106

1Дээрги-Чаяакчыга өөрүп четтириңер; Ол ачылыг-дыр, Ооң энерели кезээ шагда үстүп төнмес-тир ^a.
2– 3Дээрги-Чаяакчының камгалап кааны,
дайзынның холундан адырып кааны ^b,
өске чурттардан – чөөн болгаш барыын чүктерден,
соңгу чүктен болгаш далайдан бээр ^c –
чыып эккелгени бүгү улус ынча деп чугаалазын.

4Израильчилер ээн кургаг ховуга улчуп-тояап,
чурттакчылыг хоорайга таварышпайн чораан.
5Аштап-суксап, амы-тыны хылдың кырында чораан.
6Ынчан олар кызагдаткаш,
Дээрги-Чаяакчыдан дуза дилеп кыйгырган –
а Ол түрегделден оларны камгалап,
7чурттакчылыг хоорайга чеде берзиннер дээш,
дорт орук-биле эдертип чорупкан.
8Олар Дээрги-Чаяакчыга
Ооң энерелдии дээш, кижи төрелгетенге кылган
кайгамчык чүүлдери дээш өөрүп четтирзин!
9Ол суксаан кижини хандырган,
аштаан кижини буян-биле тоттурган болгай ^d.

10Израильчилер демирге бектедип алгаш ^e,
дүмбей караңгыга качыгдап олурганнар ^f.
11Олар Бурганның сөстерин тооп дыңнавайн барган,
Дээди Өрүкүнүң күзел-соруун хүлээп көрбээн ^g.
12Дээрги-Чаяакчы оларның тура-хөөнүн
албадалдыг ажыл-биле чаажыктырарга, могап турупканнар,
а оларга дузалажыр кижи тывылбаан ^h.
13Олар кызагдаткаш,
Дээрги-Чаяакчыдан дуза дилеп алгырган,
Ол ынчан оларны түрегделден адырып каан;
14оларны дүмбей караңгыдан үндүре бергеш,
кинчи-бегин үзе шаап каапкан.
15Олар Дээрги-Чаяакчыга Ооң энерелдии дээш,
кижи төрелгетенге кылган
кайгамчык чүүлдери дээш өөрүп четтирзин!
16Ол хүлер хаалгаларны буза шапкаш,
демир дээктерни үреп каапкан болгай ⁱ.

17Мелегей улус бачыттыг оруктары
болгаш бузуттары дээш качыгдап турган.
18Олар кандыг-даа аъш-чемни чип албастап ^j,
өлүмнүң эжиин ажыдып киреринге чоокшулап келген ^k.
19Олар кызагдаткаш, Дээрги-Чаяакчыдан дуза дилеп алгырган,
Ол ынчан оларны түрегделден адырып каан.
20Ол Бодунуң айтыышкыны-биле оларны экиртип каан,
чевегге чыдарындан камгалап каан ^l.
21Олар Дээрги-Чаяакчыга Ооң энерелдии дээш,
кижи төрелгетенге кылган
кайгамчык чүүлдери дээш өөрүп четтирзин!
22Олар өөрүп четтириишкин өргүлүн Аңаа эккеп салзын ^m,
Ооң ажыл-херектериниң дугайында ырлашпышаан медээлезин.

23Корабльдарга далайже эжиндирип үнген,
сугларның делгемнеринге ажыл-үүлезин кылып чоруткан далайжылар
24Дээрги-Чаяакчының ажыл-херектерин,
кайгамчык чүүлдерин далайга чорааш, көрүп турган.
25Ол дужаарга, күштүг шуурган хадып,
далайның чалгыгларын бедидир диргелдирип турган ⁿ.
26Далайжылар дээрже өрү үнүп,
далайның дүвүнче куду бадып турган,
оларның тура-соруу айыыл-халаптардан эстип-хайлып калган;
27эзирик улус ышкаш, ол-бо долганып, тендирээннер ^o,
оларның арга-мергежили херекчок чүве апарган.
28Олар кызагдаткаш,
Дээрги-Чаяакчыдан дуза дилеп кыйгырган,
Ол ынчан оларны түрегделден адырып каан.
29Ол дужаарга, шуурган шуут ыржымналдыр оожургап,
чалгыглар ыыт-шимээн чок барган ^p.
30Чалгыглар дагжаваска, далайжылар өөрүп-хөглей берген,
Дээрги-Чаяакчы оларны күзеп-чүткээн өртээлинге эккелген.
31Олар Дээрги-Чаяакчыга Ооң энерелдии дээш,
кижи төрелгетенге кылган
кайгамчык чүүлдери дээш өөрүп четтирзин!
32Олар Ону чоннуң чыыжынга кымдан арттыр мактазын,
баштыңнарның чөвүлелинге алдаржытсын!

33Дээрги-Чаяакчы хемнерни ээн кургаг хову кылдыр,
суг баштарын – кургаг чер кылдыр хуулдуруп турар ^q;
34үнүш-дүжүткүр черни, ында чурттаан улустуң бачыды дээш,
кужурлуг чер кылдыр хуулдуруп турар ^r.
35Ол ээн кургаг ховуну хөлче,
кадып кургаан черни – суг бажынче хуулдуруп ^s,
36аштаан улусту аңаа чурттадып каар.
Олар боттарының чурттаар хоорайын тудуп алгаш,
37шөлдерге тараазын тарып, виноград сыптарын олуртуп,
элбек дүжүттү, чимистерни ажаап, чыып алыр.
38Дээрги-Чаяакчы улуска ачы-буянын хайырлап турар,
олар аажок өзүп-көвүдээр, оларның мал-маганын Ол немеп бээр ^t.

39А олар дарлалга, айыыл-халапка,
качыгдалга бастырткаш, эвээжей бээрге,
40Дээрги-Чаяакчы ызыгууртаннарны бак ат-биле бүргээш,
орук-чирик чок ээн черге азып-тояарынче албадаптар ^u.
41А ядыы кижини түрегделден ушта тыртып ^v,
ооң өг-бүлезин, кодан хойну дег, өстүрүп-көвүдедип турар.
42Ак сагыштыг улус ону көргеш, өөрүп турар ^w,
а бузуттуглар шупту аксын хаап алыр ^x.

43Мерген угаанныг кижи бо чүүлдү чүрээнге кадагалап алзын ^y,
Дээрги-Чаяакчының энерелин бодап чорзун.