‏ Psalms 108

Хөгжүм башкарыкчызынга. Давидтии. Мизмор-ыр.

1Алгап мактап турар Бурганым, ыыт чок барба! ^a
2Бузуттуглар, нүгүлчүлер аксы-дылын менче кызаңнадып,
мээң-биле мегелеп чугаалажып турлар ^b;
3көөр хөңнү чок сөстери-биле бүзээлеп, чылдагаан чок черге
мээң-биле дайылдажып турлар ^c.
4Оларга ынак-даа болзумза, меңээ удурланып турлар,
а мен мөргүп тур мен.
5Буянымга бузут-биле ^d,
ынак сеткилимге – көөр хөөн чок чорук-биле
харыылап турлар.

6Дайзынымны бузуду дээш кезедип көрем,
удурланыкчызы аңаа удур херечилезин ^e.
7Шииткел черинге дайзыным буруудап үнзүн,
ооң мөргүлүн безин бачыт кылдыр саназын ^f.
8Ооң назы-хары кызырылзын,
өске кижи ооң эрге-дужаалын эдилезин ^g.
9Дайзынымның ажы-төлү адазы чок артсын,
алган кадайы дулгуяк апарзын ^h.
10Уруг-дарыы аал-оранының
бузундуларын каггаш, диленип, улчузун ⁱ.
11Ооң бүгү өнчү-хөреңгизин чээли кылган улус былаап алзын,
ажыл-ижиниң үре-түңнелин өске улус үптеп алзын.
12Аңаа ээ-хайыралыг кижи тывылбазын,
ажы-төлүн кээргеп көөр кижи турбазын.
13Үре-салгалының хуу-салымы – өлүм болзун;
дараазында салгалга оларның ады шуут уттундура берзин ^j.
14Дээрги-Чаяакчыга ооң ада-өгбезиниң
кем-буруузу уттундурбазын,
ооң авазының бачыт-багы өршээттирбезин ^k.
15Дээрги-Чаяакчыга
оларның бачыттары кезээде көскү болзун ^l,
чырык черден оларның дугайында
сактыышкынны Ол балап каапсын ^m.

16Чүге дээрге мээң дайзыным улуска
энерел көргүзерин уткан-дыр,
ядыы-түреңги, чүрээ ундараан кижини
өлүрерин бодап, истеп-сүрүп турган-дыр.
17Дайзыным каргыш салырынга хандыкшаан турду –
салган каргыжы дедир ээп келзин;
улуска йөрээл салырын күзеведи –
алгыш-йөрээл оон ырай берзин.
18Каргышты ол, хеп ышкаш, кедип алзын,
каргыш, суг дег, иштинче сиңип кирзин,
үс дег, эът-кежинче сиңип кирзин ⁿ.
19Каргыш ооң мага-бодун шыпкан хеви дег,
үргүлчү куржанып чоруур куру дег апарзын.
20Ол бүгүнү Дээрги-Чаяакчы меңээ удур
бак чүве чугаалап чоруур удурланыкчыларым-биле кылзын.

21А Сен Бодуңнуң адыңны бодап, меңээ буяндан көргүзем,
Дээрги-Чаяакчы, Дээргим; Сээң энерелиң ачылыг-дыр ^o.
Мени камгала, чүге дээрге
22чөгенчиг күжүр-дүр мен ^p, чүреккейим качыгдап тур.
23Хөлеге дег, чидип бар чыдыр мен ^q,
шартылаа-даа дег, сывыртадып чор мен ^r.
24Шээрленгеш, дискектерим суларады,
арып-дорааш, дөрт сөөк болдум.
25Дайзыннарым мурнунга адым баксырады,
мени көргеш, олар баштарын чайып, шоодар-дыр.

26Дээрги-Чаяакчы, Бурганым, дузалап көр,
энерелдииң-биле камгалап көр.
27Сээң холуң камгалаан деп,
Дээрги-Чаяакчы ынчаар кылган-дыр деп,
дайзыннарым билип алзын.
28Олар мени каргап турлар, а Сен – алгап-йөрээп көрем;
халдап келген улус бак атка кирзин, а Сээң чалчаң амыразын.
29Меңээ удурланыр улус бак ат-биле шыптынзын,
ыядыын хеп дег кедип алзын ^s.

30Хөй улус мурнунга Дээрги-Чаяакчыга өөрүп четтирейн,
аксы-сөзүм Ону алгап-мактазын.
31Түреңги кижини шиидип турар улустан камгалаар дээш,
Ол ооң-биле турар ^t.