‏ Psalms 118

א(алеф)

1Бодунуң эртер оруктарынга кем-буруу үүлгетпес ^a, Дээрги-Чаяакчының хоойлузун сагып чоруур улус амыр-чыргалдыг!
2Ооң доктаалдарын кадагалап,
бүгү чүлдү-чүрээ-биле Олче чүткүп чоруур улус амыр-чыргалдыг!
3Ооң оруктары-биле чорааш, олар бузут үүлгетпес ^b.
4Сээң чагыгларыңны быжыы-биле кадагалаарын дужааган сен.
5Мээң оруктарым Сээң дүрүмнериңни сагыырынче угланган болзун!
6Ынчан мен Сээң шупту айтыышкыннарыңче
ылавылап көргеш, бак атка кирбес мен ^c;
7Сээң чөптүг шиитпирлериңни шинчилеп,
шынныг чүрээм-биле Сени мактаар мен;
8Сээң дүрүмнериңни кадагалаар мен –
мени шуут кагбайн көр! ^d

ב

(бет) 9Аныяк оол бодунуң оруун бачыттан канчап арыглап аарыл? ^e
Сээң сөзүңнү кадагалап чорааш!
10Бүгү чүлдү-чүрээм-биле Сенче чүткүп чор мен ^f,
Сээң айтыышкыннарыңны күүседиринден чайлаар арга меңээ бербе.
11Сеңээ удур бачыт үүлгетпес дээш,
Сээң сөзүңнү чүрээмде шыгжап чор мен ^g.
12Дээрги-Чаяакчы, Сеңээ алдар!
Бодуңнуң дүрүмнериңге мени өөредип каг ^h,
13Сээң аксыңдан үнген шупту шиитпирлерни
бодумнуң аксы-сөзүм-биле медээлээр мен ⁱ.
14Сээң доктаалдарыңның айтып берген оруун эдерип,
эртине-байлактың кандыызынга-даа дег, өөрүп чор мен ^j.
15Сээң чагыгларың дугайында бодап,
оруктарыңче топтап көөр-дүр мен ^k.
16Сээң дүрүмнериң дээш өөрүп-хөглеп чор мен,
сөзүңнү утпас мен!

ג

(гимел) 17Бодуңнуң чалчаңга ачы-буяндан көргүс,
ынчан дириг артып, сөзүңнү кадагалаар мен.
18Мээң карактарымны ажыдып бер –
Сээң хоойлуңдан тыптыр кайгамчык чүүлдерни көрүп алыйн.
19Чер-делегейде түр када турумчуп алган кижи-дир мен ^l,
Бодуңнуң айтыышкыннарыңны менден чажырбайн көр.
20Сеткил-сагыжым Сээң шиитпирлериңни үргүлчү күзеп,
оларже доктаадыр аргажок чүткүп чоруур ^m.
21Адыыргак улусту чемелээр сен,
Сээң айтыышкыннарыңдан өскээр барган улус каргаттырар ⁿ.
22Дора көрүүшкүн биле бак атты менден ап каавыт –
Сээң доктаалдарыңны кадагалап чоруур болгай мен.
23Чагырыкчылар меңээ удур сүлчээ кылып тур ^o,
а Сээң чалчаң мен дүрүмнериңни хандыр бодап олур мен.
24Сээң доктаалдарың – өөрүшкүм-дүр,
дүрүмнериң – сүмелекчилерим-дир.

ד

(далет) 25Довуракка хөмдүрүп каар деп бардым,
Бодуңнуң сөзүң ёзугаар мени диргизип көр.
26Мээң-биле чүү болганын Сеңээ чугааладым,
а Сен меңээ харыыладың – ам меңээ дүрүмнериң өөредип каг.
27Чагыгларың оруун угаап билип аар аргадан бер,
ынчан Сээң кайгамчык чүүлдериң дугайында
хандыр боданыр мен.
28Сеткил-сагыжым ундаралдан эстип чидер деп тур ^p,
Бодуңнуң сөзүң ёзугаар мени быжыктыр.
29Мегениң оруундан мени чайлат,
хоойлуң-биле менче ээ көрүн.
30Шынның оруун шилип алган мен,
Сээң шиитпирлериң-биле чөпшээрежип чоруур мен.
31Дээрги-Чаяакчы, Сээң доктаалдарыңдан
салдынмайн халбактаныр мен –
адымны баксыратпайн көр!
32Сен мээң чүрээмге делгемнерни ажыдып бээриңге,
айтыышкыннарың оруу-биле дүрген маңнаптар мен.

ה

(хе) 33Дээрги-Чаяакчы, дүрүмнериң оруун меңээ айтып бер,
төнчүзүнге чедир оон өскээр барбас мен.
34Мени угаан киир сурга, ынчан Сээң дүрүм-хоойлуңну сагып,
ону бүгү чүлдү-чүрээм-биле кадагалаар мен ^q.
35Айтыышкыннарың оруу-биле
мени эдерт – күзээн чүвем ол-дур.
36Мээң чүрээмни ажык-кончааже эвес ^r,
а Сээң доктаалдарыңче ээлдирип көр.
37Хоозун чүүлдер көрбес кылдыр,
карактарымны өскээр көрүндүрүп көр,
Бодуңнуң орууңга мени амы-тынныг арттырып көр.
38Чалчаң Сенден коргуп чорзун дээш,
Бодуңнуң сөзүңнүң шынныын аңаа көргүс.
39Сээң шиитпирлериң ачылыг болгай,
ынчангаш бак атка киреринден мени чайлат –
коргар чүвем ол-дур.
40Сээң чагыгларыңны күүседирин күзеп тур мен,
Бодуңнуң чөптүүң-биле мени тынгарып көр.

ו

(вав) 41Сээң энерелиң мээң-биле кады болзун, Дээрги-Чаяакчы,
Сээң сөзүң ёзугаар камгалалың меңээ келзин.
42Ынчан мени дора көрген кижиге
харыылаар аргалыг болур мен ^s –
чүге дээрге идегелим Сээң сөзүңде болгай.
43Аксы-дылымдан чүгле шынныг сөстер үнер кылдыр кылып каг –
Сээң шиитпирлериңге идегеп турар болгай мен.
44Сээң хоойлуңну кезээ шагда,
кезээ мөңгеде кадагалаар мен;
45Сээң чагыгларыңче чүткүп чораан болгаш,
хостуг-шөлээн чоруур мен;
46Сээң доктаалдарың дугайында
хааннар мурнунга ыятпайн чугаалаар мен ^t;
47ынакшааным айтыышкыннарың
өөрүшкүнү хайырлаар ^u;
48ынакшааным айтыышкыннарыңче холдарым сунар мен,
дүрүмнериң дугайында хандыр боданыр мен.

ז

(зайин) 49Бодуңнуң чалчаңга чугаалааның,
идегелди меңээ берип келген сөзүңнү бодап келем –
50Сээң сөзүң мени тынгарар болду –
түрегдээн үемде аргалалды ынчангаш ап турдум.
51Адыыргак улус мени аажок кочулап турган-даа болза ^v,
Сээң хоойлуңдан өскээр барбаан мен.
52Шаг шаанда берген шиитпирлериңни
бодап келгеш, аргалалды ап турдум, Дээрги-Чаяакчы.
53Сээң хоойлуңга чагыртпайн турар бузуттуг улус көргеш,
хөлзеп хорадаар-дыр мен ^w.
54Түр када турумчуп алганым чер-делегейге ^x
Сээң дүрүмнериң дугайында ырлап чордум.
55Дээрги-Чаяакчы, дүне када Сээң адыңны бодап,
хоойлуңну кадагалап келдим.
56Сээң чагыгларыңны кадагалап чоруур боорумга,
мээң салым-чолум ындыг болуп турар.

ח

(хет) 57«Дээрги-Чаяакчы, мээң хуу-салымым ^y
Сээң сөстериңни сагыырында» – деп чугаалаан мен.
58Бүгү чүлдү-чүрээм-биле Сенден ээрежип дилеп тур мен:
Бодуңнуң сөзүң ёзугаар менче ээ көрнүп көр.
59Бодумнуң оруктарым дугайында бодангаш,
буттарымны Сээң доктаалдарыңче углап келдим.
60Сээң айтыышкыннарыңны
сагыыр дээш далажып, бичии-даа саадавадым.
61Бузуттуг улустуң четки-дузаа
мени ораап-баглап алза-даа ^z, Сээң хоойлуңну утпаан мен.
62Чөптүг шиитпирлериң дээш, дүн ортузунда
Сеңээ өөрүп четтирип туруп кээр-дир мен ^aa.
63Сенден коргуп, чагыгларыңны кадагалап чоруур
кандыг-даа кижиге эш боор мен.
64Сээң энерелиң чер-делегейни бүргей алган ^ab,
мени дүрүмнериңге өөредип каап көр, Дээрги-Чаяакчы.

ט

(тет) 65Бодуңнуң сөзүң ёзугаар
чалчаңга ачы-буянны көргүскен сен, Дээрги-Чаяакчы.
66Сээң айтыышкыннарыңга бүзүрээр болгай мен –
шын билип алыышкынга база билигге мени өөредип каг.
67Базындырып аарым бетинде будалып чораан мен,
а ам Сээң сөзүңнү кадагалап чор мен.
68Буянныг-дыр сен ^ac, ажыл-херектериң-даа буянныг-дыр,
Бодуңнуң дүрүмнериңге мени өөредип каг.
69Адыыргак улус мени нүгүлдеп турар-даа болза,
бүгү чүлдү-чүрээм-биле Сээң чагыгларыңны кадагалаар мен ^ad.
70Ол улустуң чүректери чагланып, дөгейлени берген ^ae,
а мен Сээң хоойлуң дээш өөрүп чор мен.
71Базындырганым меңээ буян болду ^af,
ооң ачызында Сээң дүрүмнериңни өөренип аар мен.
72Сээң аксыңдан дыңнааным хоойлу
меңээ муң-муң алдын, мөңгүн чоостардан дээре ^ag.

י

(йод) 73Сээң холдарың мени чаяап, боттандырып каан ^ah;
ам мени угаан киирип каг – айтыышкыннарыңга өөренип аайн.
74Сенден коргар улус мени көрүп кааш,
Сээң сөзүңге идегелим дээш өөрүп-байырлаар ^ai.
75Дээрги-Чаяакчы, сээң шиитпирлериңниң чөптүүн,
мени базынганыңның шынныын билир мен.
76Сээң энерелиң Бодуңнуң сөзүң ёзугаар
чалчаң меңээ аргалал болзун.
77Мени тынгарып, өршээлиң меңээ чедип келзин,
Сээң хоойлуң мени өөртүп чоруур болгай.
78Адыыргак улустуң ады баксыразын –
оларның мени дарлап турары чөптүг эвес-тир,
а мен Сээң чагыгларың дугайында хандыр бодап чор мен.
79Сенден коргар,
Сээң доктаалдарыңны хүлээп көөр улус менче ээп келзин.
80Сээң дүрүмнериңге хамаарыштыр
чүрээм буруу чок болзун, ынчан мээң адым баксыравас ^aj.

כ

(каф) 81Сээң хайырлаарың камгалалды манааш,
сеткил-сагыжым ийлеп, Сээң сөзүңге идегеп чор мен.
82Сээң сөзүңнүң боттанырын манааш, карактарым имистелип өштү ^ak,
кажан мени аргалап кээр сен?
83Отка дырыштыр каткан көгээржик дег апардым,
ынчалзажок дүрүмнериң утпадым.
84Чалчаң мээң манаар үем ам кайы хире артканыл?
Мени истеп-сүрген улусту шиидер үең кажан кээрил? ^al
85Адыыргак улус Сээң хоойлуңга чөрүштүр
меңээ оңгарлар казып кагды ^am.
86Сээң шупту айтыышкыннарың шынныг,
а демги улустуң мени истеп-сүрүп турары
чөптүг эвес-тир – меңээ дузала!
87Мени чер кырынга узуткап каар частылар,
ынчалзажок Сээң чагыгларыңны тоовайн барбаан мен.
88Бодуңнуң энерелиң ёзугаар мени амы-тынныг арттырып көр,
ынчан Сээң аксыңдан үнген доктаалдарны кадагалаар мен.

ל

(ламед) 89Дээрги-Чаяакчы, Сээң сөзүң дээрлерде кезээ мөңгеде тургустунган ^an.
90Сээң шынчы чорууң салгалдан салгал дамчып артып каар.
Сен чер-делегейниң үндезинин салып каарыңга,
ол турбушаан хевээр-дир ^ao.
91Дээр биле чер
Сээң шиитпириң ёзугаар амга чедир туруп турар ^ap,
бүгү чүве Сеңээ бараан бооп турар болгай.
92Сээң хоойлуң мени өөртүп чорбаан болза,
базындырыышкындан өлүп каар турган мен.
93Чагыгларыңны кажан-даа утпас мен –
олар-биле мени тынгарып турар сен.
94Сээңии мен, камгалап көр –
Сээң чагыгларыңче чүткүп чоруур болгай мен.
95Бузуттуг улус мени узуткаар дээш кедеп турду,
а мен Сээң доктаалдарыңны топтап көрүп турдум.
96Кандыг-даа болбаазыраңгай чүүл кызыгаарлыг дээрзин көрүп турдум,
а Сээң айтыышкының хемчээл билбес делгем-дир.

מ

(мем) 97Сээң хоойлуңга ынаамны чүү дээр!
Ооң дугайында хүнзедир хандыр боданыр-дыр мен.
98Сээң айтыышкының мени дайзыннарымдан
мерген угаанныг кижи кылып кагды ^aq –
ол үргүлчү мээң-биле кады болгай.
99Сээң доктаалдарың дугайында хандыр бодап чоруур болгаш,
мен шупту башкыларымдан угаанныг болу бердим.
100Сээң чагыгларыңны сагып чоруур болгаш,
кырганнардан шыырак билиглиг мен ^ar.
101Сээң сөзүңнү кадагалаар дээш,
кандыг-даа бак орукче буттарымны баспайн чоруур мен ^as.
102Сээң шиитпирлериңден өскээр барбас мен –
Сен мени өөредип турар болгай сен.
103Сээң сөстериңниң дылымга амданныын –
олар аксымга ары чигиринден-даа чаагай-дыр ^at.
104Сээң чагыгларың ачызында угаан кирдим,
ынчангаш мегениң кандыг-даа оруунга хөңнүм чок.

נ

(нун) 105Сээң сөзүң – мээң оруумга чырыткы-дыр,
мээң кокпам чырыдар чырык-тыр ^au.
106Мен Сээң чөптүг шиитпирлериңни
кадагалаар бооп даңгыраглаан мен ^av –
аазаан сөзүмнү күүседир мен.
107Дыка-ла базындырып келдим, Дээрги-Чаяакчы,
Бодуңнуң сөзүң ёзугаар мени тынгарып каг.
108Мээң аксымдан үнген мөргүлдү хүлээп ап көр,
Дээрги-Чаяакчы, Бодуңнуң шиитпирлериңге мени өөредип каг.
109Амы-тыным үргүлчү айыыл адаанда,
ынчалзажок Сээң хоойлуңну утпаан мен.
110Бузуттуг улус меңээ дузак салып каан ^aw,
ынчалзажок Сээң чагыгларыңдан өскээр барбадым.
111Сээң доктаалдарың кезээ мөңгеде мээң өнчүм болду ^ax,
олар – мээң чүрээмниң өөрүшкүзү болгай ^ay.
112Чүрээмни Сээң дүрүмнериңни күүседир кылдыр
кезээ мөңгеде, бүрүнү-биле ээлдирип алдым.

ס

(самех) 113Сеңээ бүрүнү-биле бердинмээн улуска хөңнүм чок,
а Сээң хоойлуңга ынак мен.
114Сен – мээң чаштыр черим ^az, дозуг-камгалалым сен ^ba;
Сээң сөзүңге идегээр мен.
115Менден ырап чоруңар, бак хейлер! ^bb
Бурганымның айтыышкыннарын кадагалаайн.
116Тынгарлыр кылдыр, Бодуңнуң сөзүң ёзугаар мени детки,
идегелим хоозун куруг болбазын;
117камгалал алыр кылдыр, меңээ дузала,
Сээң дүрүмнериң үргүлчү кичээнгейим төвүнде.
118Сээң дүрүмнериңден ойталаар бүгү улусту херекке албас сен,
чүге дээрге оларның оп-мегези – Сеңээ удур өскерликчи чорук-тур.
119Чер-делегейниң бүгү бузуттуг улузун
паштың кагы кылдыр санаар сен,
ынчангаш Сээң доктаалдарыңга ынак мен.
120Сенден сүртээш, мага-бодум сирилеп тур ^bc,
шииткелдериңден база коргар-дыр мен.

ע

(айин) 121Мен шынчы база чөптүг чорукту боттандырып келдим,
бастып чоруур улустуң холунга мени арттырбайн көр.
122Чалчаң мен дээш дагдынып көр ^bd –
бүгү чүве меңээ ачылыг болзун, адыыргак улус мени базынмазын.
123Сээң камгалалың биле чөптүг сөзүңнү манааш,
карактарым имистелип өжер четти ^be.
124Чалчаң меңээ энерелдиг хамаарылгаң көргүзүп,
дүрүмнериңге мени өөредип каг.
125Чалчаң болур мени угаан киир сурга,
Сээң доктаалдарыңны билип алыйн.
126Дээрги-Чаяакчының хөделип үнер үези келген-дир –
улус Сээң хоойлуңну үреп каан болгай.
127А мен Сээң айтыышкыннарыңга
холумак чок арыг алдындан артык ынак мен ^bf.
128Ынчангаш Сээң шупту чагыгларыңны
шынныг кылдыр хүлээп көөр мен,
кандыг-даа меге орукка хөңнүм чок.

פ

(пе) 129Сээң доктаалдарың кайгамчык онза,
ынчангаш оларны кадагалап чор мен.
130Сээң сөстериңниң илерээшкини улусту чырыдар,
кенен кижилерни угаан киирер ^bg.
131Сээң айтыышкыннарыңны манаарым аажок болгаш,
аксым ажыдып, сөстериңни суг дег ижип тур мен ^bh.
132Көрүжүңнү менче углап, ээ көрнүп көр –
Сээң адыңга ынак улусче
ынчаар ээ көрнүрүн шиитпирлээн болгай сен.
133Мээң базымнарымны Бодуңнуң сөзүң-биле быжыктыр,
кандыг-даа бузутка мени башкартпа.
134Кижилерниң базымчазындан мени адыр –
ынчан Сээң чагыгларыңны кадагалаар мен;
135Чырыткылыг арныңны Бодуңнуң чалчаңга көргүс ^bi,
дүрүмнериңге мени өөредип каг.
136Сээң хоойлуңну кадагалавас улус бар боорга,
караам чажы суг дег агып тур ^bj.

צ

(цаде) 137Чөптүг сен, Дээрги-Чаяакчы, Сээң шиитпирлериң шынныг.
138Сээң айтып-чагаан доктаалдарың шуут чөптүг, шуут шынныг.
139Дайзыннарым Сээң сөстериңни уттупкан боорга,
сеткилимде килеңим хайнып-хөлзеп тур.
140Сээң сөзүң дыка арыг ^bk, чалчаң аңаа ынак.
141Бичии ынай, куду көрдүрген кижи мен,
ынчалзажок чагыгларың утпайн чор мен.
142Сээң чөптүүң – мөңге турар чөптүг чорук-тур,
Сээң хоойлуң – шынныг-дыр ^bl.
143Айыыл-халап биле түрегдел мени сүрүп келди,
а Сээң айтыышкыннарың – өөрүшкүм-дүр.
144Сээң доктаалдарың кезээ мөңгеде чөптүг бооп артар,
амы-тынныг артсын дээш, мени угаан киир сурга!

ק

(коф) 145Бүгү чүлдү-чүрээм-биле мөргүп, Сени кыйгырдым,
харыылап көр, Дээрги-Чаяакчы, Сээң дүрүмнериңни сагыыр мен.
146Сени кый деп тур мен, камгалап көр,
ынчан Сээң доктаалдарыңны кадагалаар мен.
147Даң атпаанда-ла тургаш, кыйгырып тур мен ^bm,
Сээң сөстериңге идегедим.
148Сээң сөзүңнү хандыр бодаар дээш,
чер кыры чырываанда оттуп кээр мен.
149Энерелдииң-биле мээң үнүмнү дыңна,
Дээрги-Чаяакчы, шиитпириң ёзугаар мени тынгар.
150Кара сагыштыг улус халдап келди;
олар Сээң хоойлуңдан ырай бергеннер-дир.
151А Сен меңээ чоок-тур сен, Дээрги-Чаяакчы ^bn,
Сээң шупту айтыышкыннарың шынныг-дыр.
152Шагдан тура Сээң доктаалдарың дугайында,
оларны кезээ мөңгеде күштүг
кылып кааның дугайында билип алган мен.

ר

(реш) 153Базындырган мени көргеш, камгалап көр,
чүге дээрге Сээң хоойлуңну утпайн келдим.
154Мээң чаргымны шиитпирлежип, меңээ болуш ^bo,
Бодуңнуң сөзүң ёзугаар мени амы-тынныг арттырып көр.
155Дүрүмнериңни күүседир чүткүл бузуттуг улуста чок болгаш,
Сээң камгалалың олардан ыракта.
156Сээң өршээлиң өндүр улуг болгай, Дээрги-Чаяакчы ^bp,
Бодуңнуң шиитпириң ёзугаар мени тынгар.
157Мени истеп-сүрген дайзыннар хөй-дүр ^bq,
ынчалзажок Сээң доктаалдарыңдан ойталаваан мен.
158Сенден ойталаан улус көргеш,
олар Сээң сөзүңнү кадагалавас боорга, бужарзынарым аажок ^br.
159Сээң чагыгларыңга ынаамны көр даан, Дээрги-Чаяакчы,
Бодуңнуң энерелдииң-биле мени тынгарып каг.
160Сээң сөзүңнүң алыс ужур-утказы шынныг-дыр ^bs,
Сээң кандыг-даа чөптүг шиитпириң кезээде мөңгеде доктааттынган.

ש

(шин) 161Чагырыкчылар мени чылдагаан чок черге истеп-сүрүп тур ^bt,
ынчалзажок мээң чүрээм чүгле Сээң сөзүңден сүрээдээр.
162Аажок хөй олча-ажык алган кижи дег ^bu,
Сээң сөзүңге өөрүп тур мен ^bv.
163Мегени көөр хөңнүм чок, оон ческинер мен,
а Сээң хоойлуңга ынак мен.
164Чөптүг шиитпирлериң дээш
Сени хүнде чеди катап алгап-мактаар мен.
165Сээң хоойлуңга ынак улуска
өндүр улуг-чаагай чорук доктаар, оларга чүү-даа чүве моондак болбас.
166Сээң хайырлаарың камгалалга идегеп турдум ^bw, Дээрги-Чаяакчы,
айтыышкыннарыңны күүседип келдим.
167Сеткил-сагыжым Сээң доктаалдарыңны
кадагалап келди, оларга аажок ынак мен.
168Сээң чагыгларың биле доктаалдарыңны
кадагалап келдим, мээң шупту оруктарым
Сеңээ көскү болгай ^bx.

ת

(тав) 169Мээң кыйгым Сеңээ четсин, Бодуңнуң сөзүң ёзугаар мени
угаан киирип көр, Дээрги-Чаяакчы.
170Мээң чалынган үнүм Сеңээ дыңналзын,
Бодуңнуң аазаашкының ёзугаар мени камгалап көр.
171Бодуңнуң дүрүмнериңге мени өөреткениң дээш,
аксы-дылым мактал сөзүн сөглээр.
172Шупту айтыышкыннарың чөптүг боорга,
мээң дылым Сээң сөзүңнү алгап ырлаар.
173Сээң холуң меңээ дузалазын –
күүседир дээш, чагыгларыңны шилип алган болгай мен.
174Сээң хайырлаар камгалалыңны
күштүү-биле күзеп чор мен, Дээрги-Чаяакчы,
Сээң хоойлуң – өөрүшкүм-дүр.
175Сени алдаржытсын дээш, мени амы-тынныг арттырып каг,
Сээң шын шиитпирлериң меңээ дузалазын.
176Аза бергеш, читкен хой дег апардым ^by,
Бодуңнуң чалчаңны дилеп тып ал –
айтыышкыннарың утпаан болгай мен.