Psa 17 | TyvTUV | STEP | Хөгжүм башкарыкчызынга. Дээрги-Чаяакчы Бодунуң чалчазы Давидти ооң хамык дайзыннарының болгаш Саулдуң холундан адырып каарга, Давидтиң Дээрги-Чаяакчыга ырлаан ырының сөстери бо-дур. Ол мынча дээн:

1 Хөгжүм башкарыкчызынга. Дээрги-Чаяакчы Бодунуң чалчазы Давидти ооң хамык дайзыннарының болгаш Саулдуң холундан адырып каарга, Давидтиң Дээрги-Чаяакчыга ырлаан ырының сөстери бо-дур. Ол мынча дээн:
2 Дээрги-Чаяакчы, мээң күчү-күжүм сен, Сеңээ ынак-тыр мен! ^a
3 Дээрги-Чаяакчы – мээң быжыг шивээм, хоргадалым, камгалалым.
Мээң Бурганым – чалым-хаям ^b. Ол – дозуг-камгалалым ^c,
мени камгалап турар күчү-күш, мээң чаглаам.
4 Макталга төлептиг Дээрги-Чаяакчыдан ^d
дуза дилеп кый деп, дайзыннарымдан камгалалды алыр мен.

5 Өлүмнүң четкилери мени ораап алган,
өлүмнүг айыыл эккээр суглар мени сүртеткен ^e;
6 алдыы оранның кинчилери мени бектеп алган,
өлүмнүң дузаа мурнумда салдынган ^f.
7 Кызагдалга алыскаш,
Дээрги-Чаяакчыдан дуза дилеп кый дидим,
мээң Бурганымдан дуза дилеп алгырдым.
Ол Бодунуң өргээзинден мээң үнүмнү дыңнап кагды,
дилег-кыйгым Ооң мурнунга чеде берди ^g.

8 Чер шимчеп, сирилээн,
даглар дөжээнге чедир божаңнаан –
Дээрги-Чаяакчының килеңинден сирилеш дээн ^h.
9 Ол килеңнээрге, думчуундан – ыш,
аксындан – өрттендир чиир чалынныг от
аттыгып үнүп, изиг көстер кызаңайндыр хып турган ⁱ.
10 Ол кудай-дээрни ээктир тырткаш, дүжүп келген ^j,
кара булут кырынга буттарын салып алган ^k.
11 Дээрги-Чаяакчы херувимни ^{▼▼17:11 Мында херувимни дайынчы аът-хөлге кылдыр көргүскен азы Дээрги-Чаяакчыны херувим сөөрткен чуузада олурар кылдыр көргүскен.} мунупкаш,
хатты чалгын кылгаш, кылыйтыр ужуп чорупкан ^m.
12 Ол дүмбей караңгыны шугланып,
дээрде чаъстыг кара булуттарже чаштып кире берген ⁿ.
13 Дээрги-Чаяакчының мурнунга чырык чайынналып,
долу биле чаңныктарын чашкан булуттар көжүп турган ^o.
14 Дээрги-Чаяакчы кудай-дээрге диңмиттиг диңмирээн –
Дээди Өрүкүнүң үнү, долу биле чаңныктар чажып, чыжыраан ^p.
15 Ол согуннарын салып ^q,
дайзыннарын тарай сывырыпкан,
эмгежок чаңныктарын дүжүрүп, оларны девидедипкен ^r.
16 Дээрги-Чаяакчы,
Сээң түрлүг үнүңден, Сээң эзиннээн тыныжыңдан
далай-суглар дүвү көстүп, сыыгап ^s,
өртемчей өзээнге чедир ажыттынып келген.

17 Бурган бедик дээрден ээккеш, мени сегирип алгаш,
терең ээрем суглардан ушта тыртып каан ^t;
18 Ол мени күчү-күштүг дайзындан,
күш-шыдалы менден ажыг өжээтеннерден камгалап каан ^u.
19 Дайзыннарым менче айыыл-халапка алысканым хүнде халдап келген,
а Дээрги-Чаяакчы меңээ чөленгииш болган.
20 Ол мени шөлээн черже үндүрүп, камгалап каан ^v –
чүге дээрге мен Ооң сеткилинге кирген болган мен.

21 Дээрги-Чаяакчы чөптүүм дээш меңээ ачы-буян көргүскен,
холдарым арыы дээш мени шаңнаан ^w.
22 Мен Дээрги-Чаяакчының
оруктарындан соора барбаан мен,
Бурганымның мурнунга бузутче чайгылбаан мен;
23 Ооң бүгү айтыышкыннарын эдерип чоруур мен,
Ооң дүрүм-хоойлуларындан ойталаваан мен.
24 Мен Ооң мурнунга кем-буруу чок мен,
бачыт үүлгетпес дээш кичээнип чор мен ^x;
25 Дээрги-Чаяакчы мээң чөптүүм көргеш,
Ооң мурнунга холдарымның арыын көргеш, мени шаңнаан.

26 Сеңээ шынчы улуска Сен база шынчы сен,
ак сеткилдиг кижиге ак сеткилдиг сен;
27 арыг улуска арыг сен, а бузуттуг улуска хамаарылгаң багай;
28 биче сеткилдиг улусту камгалап турар сен,
а адыыргак улусту куду көрүп турар сен ^y.

29 Дээрги-Чаяакчы, чырыткымны кыпсып турар сен ^z,
дүмбей өттүр меңээ чырыдып турар сен,
Бурганым Дээрги-Чаяакчы.
30 Сээң ачыңда аг-шеригни базып каар мен,
Бурганым ачызында шивээлер ханаларын ажа халыыр мен.

31 Бурган! – Ооң оруу болбаазыраңгай ^aa,
Дээрги-Чаяакчының сөзү арыг шынчы ^ab;
Оон хоргадал алган бүгү улуска Ол – дозуг-камгалал ^ac.
32 Дээрги-Чаяакчыдан өске, Бурган кымыл ^ad;
Бурганывыстан өске, чалым-хая бар бе?

33 Бурган күш-шыдалды мээң шыңганнарымга сиңирип,
ак орукту меңээ айтып берип турар;
34 буттарымны сыынныы дег кылып,
мени бедиктерже үндүрүп турар ^ae;
35 холдарымны чаа-дайынга өөредип турар,
хүлер чаны хере тыртыптар күштүг мен ^af.

36 Сен меңээ Бодуңнуң дозуг-камгалалыңны тутсуп берген сен,
ушпазын дээш, мени холуң-биле туткан сен,
Сээң деткимчең мени өндүр улуг кижи кылып турар.
37 Сен мээң оруумдан доктар-моондакты чайладып,
балдырларымны сирилевес быжыг кылып каан сен.
38 Дайзыннарымны истеп-сүргеш, чыпшыр чедер мен ^ag,
оларны узуткап кагбаан шаамда, дедир эгбес мен.
39 Оларны чыттыр шаварымга, олчаан туруп шыдавастар –
буттарым адаанга калырлар.
40 Сен дайын чорудар күш-шыдалды шыңганнарымга сиңирдиң,
менче халдап келгеннерни мээң буттарым адаанга салып тур сен.
41 Дайзыннарымның ооргазын меңээ көргүзүп, дезеринче албадаптың ^ah,
өжээтеннеримни узуткап кагдым.
42 Олар алгырып турду, ынчалза-даа камгалакчызы чок-тур;
Дээрги-Чаяакчыдан дуза дилээрге, оларга харыы бербес-тир ^ai.
43 Оларны, хатка бөөлдеткен довурак дег,
тарадыр эстедиптер мен,
кудумчуда малгаш дег, таптай базып кааптар мен! ^aj

44 Сен мени чонумнуң үймээнинден камгаладың,
аймак-чоннарның бажынга олуртуп кагдың;
безин билбес турганым чон ам меңээ бараан болуп турар ^ak;
45 олар мээң дугайымда дыңнап кааш, дораан-на чагыртты,
өске чер чурттуглар меңээ чашпаалап турар ^al.
46 Өске черлер улузунуң сузу бастынып,
шивээлеринден сириңейнип үнүп турду ^am.

47 Дээрги-Чаяакчы дириг! Мээң чөленгииш-хаямга алдар!
Мени камгалап турар Бурган кымдан-даа арттыр мактатсын!
48 Ол – мен дээш өжээн негээр,
чоннарны меңээ чагыртып турар ^an,
49 дайзыннарымдан мени камгалап турар Бурган-дыр.
Мени Сен меңээ удурланган улустан бедидир көдүрүп,
каржы-дошкун кижиден камгалап турар сен.

50 Ол дээш, Сени өске чоннар мурнунга
алдаржыдар мен, Дээрги-Чаяакчы,
Сээң адыңны алгап ырлаар мен ^ao.
51 Дээрги-Чаяакчы шилип алган хаанынга
өндүр улуг тиилелгелерни шаңнап турар ^ap,
Ол Давидке болгаш ооң үре-салгалынга
кезээ мөңгеде энерелдиг! ^aq