‏ Psalms 24

Давидтии.

א

(алеф) 1Дээрги-Чаяакчы,
сеткил-сагыжымдан Сеңээ мөргүп тур мен ^a;

ב

(бет) 2Бурганым, Сеңээ ынанып тур мен.
Адым баксыравазын, дайзыннарым мени ажып тиилевезин;

ג

(гимел) 3Сеңээ идегээр улустуң база ады баксыравазын ^b,
хей черге өскерлип турар улус харын бак атка кирзин.

ד

(далет) 4Дээрги-Чаяакчы,
оруктарың меңээ айтып бер, эртер оруктарыңга мени өөрет ^c.

ה

(хе) 5Сээң шыныңче мени эдертип, өөредип көр ^d,
мени камгалаар Бурганым болгай сен,
хүннүң-не Сеңээ идегээр-дир мен.

ז

(зайин) 6Дээрги-Чаяакчы, ээ хайыралың, энерелиң бода,
олар кезээ мөңгеде бар болгай ^e.

ח

(хет) 7Аныяк шаамның бачыттарын, кемниг херектерин сагынма ^f,
Дээрги-Чаяакчы, ачы-буянныың
болгаш энерелдииң-биле мени бода! ^g

ט

(тет) 8Дээрги-Чаяакчы ачылыг база чөптүг болгаш,
бачыттыгларга орук айтыр;

י

(йод) 9биче сеткилдиг улусту шын чурттаар кылдыр сургап,
Бодунуң оруктарынга өөредир.

כ

(каф) 10Дээрги-Чаяакчының бүгү оруктары –
Ооң чагыг-керээзи биле дүрүм-хоойлузун
сагып чоруур улуска шынчы энерел ол-дур.

ל

(ламед) 11Дээрги-Чаяакчы, Бодуңнуң ат-алдарыңны бодааш ^h,
мээң бачыдымны өршээ ⁱ – бачыдым аажок улуг болгай.

מ

(мем) 12Дээрги-Чаяакчыдан коргар кижиге
Ол кандыг орукту шилип алырын айтып бээр.

נ

(нун) 13Шак ол кижиниң амыдыралы буян көрүп эртер,
а үре-салгалы чер-чуртту салгап алыр ^j.

ס

(самех) 14Дээрги-Чаяакчыдан коргар улуска Ол арга-сүмезин бээр,
оларга Бодунуң чагыг-керээзин ажыдар.

ע

(айин) 15Мээң карактарым кезээде Дээрги-Чаяакчыже көрүп турар ^k,
Ол мээң буттарымны какпа-дузактан адырып турар болгай.

פ

(пе) 16Көрүжүңнү менче углап, менче ээ көрнүп көр,
чааскаанзырап, базындырып чор мен.

צ

(цаде) 17Чүрээмниң качыгдалы немежип тур,
айыыл-халавымдан мени адырып көр;
18хинчектенип, харыксыраанымны көрүп көр,
бүгү бачыттарымны өршээ.

ר

(реш) 19Дайзыннарымче көрүп көр – оларның көвүдээнин,
мени көөр хөңнү чок улустуң каржы-дошкунун!

ש

(шин) 20Амы-тынымны кадагалап, айыылдан адыр.
Бак атка кирбес болуйн – хоргадалым Сенде болгай.

ת

(тав) 21Эки мөзүм биле чөптүүм мени кадагалазын –
ынаныжым Сенде болгай.

22Бурганым, шупту айыыл-халаптардан
Израильди адырып хоста! ^l