‏ Psalms 30

(Ыд. ыр. 70:1-3)

1Хөгжүм башкарыкчызынга. Мизмор-ыр. Давидтии.
2Дээрги-Чаяакчы, хоргадалым Сенде,
адым кажан-даа баксыравазын,
Бодуңнуң чөптүүң ёзугаар мени камгалап көр a.
3Кулааңны менче ээктир, меңээ болчуп, дүрген чедип кел,
быжыг чалым-хаям, хоргадаар шивээм бооп, мени камгала b.
4Чалым-хаям, шивээм-дир сен,
Бодуңнуң адың алдаржызын дээш мени эдертип, башкар.
5Мээң шивээм болгай сен –
дайзыннарымның меңээ бүдүү
салып каан какпазындан мени чайлат.

6Амы-тынымны Сээң холуңга хүлээдип тур мен c
Сен мени хостап турар болгай сен,
алыс шынныг Дээрги-Бурган-Чаяакчы.
7Хоозун меге дүрзүлерге мөгеер улуска хөңнүм чок d,
а бодум Дээрги-Чаяакчыга идегээр мен.
8Сээң энерелиң дээш өөрүп-хөглээр мен –
Сен мээң айыыл-халавымны көрүп кагдың,
аар-бергеге алысканымны билип кааптың,
9дайзынымның холунче мени киирбедиң,
буттарымны шөлээн черге тургузуп кагдың e.

10Дээрги-Чаяакчы, менче ээ көрнүп көр –
кызыышкынга таварыштым,
качыгдалдан карактарым, сеткилим,
ишти-хөңнүм соглуп кагды f.
11Амыдыралым муңгаралдан,
назыным уё-човуурдан үстүп төнер четти,
кем-буруумдан
30:11 Өске бурунгу сөзүглелде «Айыыл-халаптан» деп бижээн.
күжүм төнүп, сөөктерим кургап кагды.
12Хамык дайзыннарым мени дора көөрге,
кожаларым безин мени бактап турлар,
таныш өөрүмге-даа коргунчуг амытан апардым h,
кудумчуга мени көрген улус дезип маңнажы бээр-дир.
13Улустуң чүректеринде, өлген чүве дег, уттундура бердим i,
чарык сава дег апардым.
14Хөй улустуң бак сөглээрин дыңнап шаг болдум,
долгандыр – коргуш-ла, коргуш j;
дайзыннар меңээ удур бөлүглежип,
амы-тыным үзүп каарын бодап тур.

15А мен Сеңээ идегээр мен, Дээрги-Чаяакчы,
«Бурганым сен» деп чугаалап тур мен.
16Мээң назыным хуусаазы – Сээң холуңда;
дайзыннарым холундан, истеп-сүрген улустан мени камгала k.
17Чырыткылыг арныңны Бодуңнуң чалчаңга көргүс l:
энерелдииң-биле мени камгала.
18Дээрги-Чаяакчы, Сени кыйгырдым, адым баксыравазын,
бузуттуглар харын бак атка кирзин,
өлүглер оранынче дүжүп, ыыт чок артсын.
19Чөптүг-шынныг кижиге удур туразы улгадып,
ону куду көрүп, бак чүве мегелеп чугаалаар аастардан
үн үнмес апарзын.

20Сенден коргар улуска кадагалап турарың,
кижи амытандан дезип, Сеңээ хоргадап кээр улуска
белеткеп алганың ачы-буяныңның арбын, хөйүн!
21Сен оларны Бодуңнуң шывыыңның адаанга
улустуң кара сагыжындан чажырар сен,
Бодуңнуң оран-саваңга аас-дылдан хоргададыр сен.
22Быжыглалдыг хоорай-шивээге
Бодунуң энерелин кайгамчык арга-биле
меңээ көргүскен Дээрги-Чаяакчыга алдар! m
23Хөлзеп дүвүрээш: «Сээң көрүжуңден
шөлүттүрген-дир мен» деп бодап турдум,
ынчалзажок Сенден дуза дилеп кыйгырарымга,
мөргүл кылган үнүмнү дыңнап кагдың.

24Дээрги-Чаяакчыга бердинген бүгү улус,
Аңаа ынак болуңар,
Дээрги-Чаяакчы Аңаа шынчы улусту кадагалаар n,
а туразы улуг улустуң кеземчези эриин ажар.
25Дээрги-Чаяакчыга идегээр бүгү улус,
кадыг-быжыг болуңар, чүрээңер эрес-дидим болзун o.
Copyright information for TyvTUV