Psa 36 | TyvTUV | STEP | Давидтии. א (алеф) Бузуттуг улуска хорадап, хөлзеве, бак чүве үүлгедир улуска адааргава

(алеф) 1 Бузуттуг улуска хорадап, хөлзеве,
бак чүве үүлгедир улуска адааргава ^a –
2 олар удавайн оът-сиген дег оңуп каар,
ногаан үнүш дег кадып каар ^b.

(бет) 3 Дээрги-Чаяакчыга идеге, буяндан тары,
чериңге чурттап, мал-маганыңны доктаамал кадар.
4 Дээрги-Чаяакчы-биле харылзааң дээш таала ^c,
Ол сээң чүрээңниң күзелдерин күүседип бээр;

(гимел) 5 Дээрги-Чаяакчыга амыдыралың оруун хүлээдип,
Аңаа идеге ^d – Ол чогууру-биле кылып бээр;
6 сээң актыыңны Ол чырык дег чайнадыптар,
сээң чаргыңның шынныын Ол дал дүъш дег чырыдыптар ^e.

(далет) 7 Дээрги-Чаяакчының мурнунга хөлзеве, Аңаа ынан.
Амыдыралының оруунга чедиишкинниг болган,
кара сагыштыг бодалдарын
боттандырып чоруур кижи дээш хорадава.

(хе) 8 Килеңнээриң соксат, калчаарааже ажынма,
бузут үүлгедиринге чедир хорадава;
9 бузут үүлгедикчилери узуткадып каар болгай,
а Дээрги-Чаяакчыга ынаныр улус
чер-чуртту салгап алыр ^f.

(вав) 10 Ам бичии болгаш, бузуттуг кижи чок апаар,
ооң турган черин көөрге, ол чиде берген болур ^g.
11 А биче сеткилдиг улус чер-чуртту салгап алгаш ^h,
чаагай чоруктуң элбээнге таалаар.

(зайин) 12 Бузуттуг кижи чөптүг-шынныг кижиге удур кара сагыш бодап,
олче диштерин кыжырадыр ⁱ,
13 а Дээрги бузуттуг кижини кочулаар ^j,
чүге дээрге ооң буураар хүнү кээрин көрүп турар.

(хет) 14 Бузуттуглар хылыжын хынындан уштуп,
чаларын хере тыртып алганнар – ядыы-түреңги кижини узуткаар,
дорт орук-биле бар чыдар улусту чок кылыр деп турарлары ол.
15 Оларның хылыштары боттарының-на
чүректеринче кадалыр, чалары сыйлып каар ^k.

(тет) 16 Чөптүг-шынныг кижиде бар бичии эт-хөреңги
эңмежок бузуттуг улустуң эгээртинмес эртине-байлаандан дээре ^l;
17 бузуттугларның күчү-күжү суларап каар ^m,
а чөптүг-шынныг улусту Дээрги-Чаяакчы деткиир болгай.

(йод) 18 Дээрги-Чаяакчы кем-буруу чок улустуң
амыдыраар хүннерин билир ⁿ,
өнчүге алган чери оларга кезээ мөңгеде артып каар;
19 айыыл-халап-даа үезинде оларның идегели хоозун болбас,
олар аш-чут-даа хүннеринде тодар ^o.

(каф) 20 А бузуттуг улус узуткаттырып каар,
Дээрги-Чаяакчының дайзыннары
шөлдерде чечектер дег оңуп каарлар,
ыш дег ^p эстип чиде бээрлер ^{▼▼36:20 Еврей сөзүглелде бо шүлүктүң утказы эки билдинмес. Сөөлгү ийи домактың болгу дег өске утказы мындыг: «Өргүлге салган хойлар чаа дег эстип чиде бээрлер, ыш-биле хадый бээрлер».}.

(ламед) 21 Бузуттуг кижи чээлиге акша алгаш, дедир эгитпес,
а чөптүг-шынныг кижи өршээлдиин көргүзүп, хайырлал бээр.
22 Дээрги-Чаяакчының йөрээген улузу чер-чуртту салгап аар,
а Аңаа каргаткан улус кырдырып аар.

(мем) 23 Дээрги-Чаяакчыга кижиниң оруу тааржыр болза,
Ол ооң буттарын быжыглаар ^r;
24 ол кижи ужар деп баргаш, кээп дүшпес –
Дээрги-Чаяакчы ооң холундан тудуп аар ^s.

(нун) 25 Мен аныяк турдум, ам кырый бердим,
а чөптүг-шынныг кижиниң Бурганга кагдырыпканын,
ооң ажы-төлүнүң аъш-чем диленип турганын черле көрбедим ^t.
26 Шак ол кижи хүннү бадыр улуска өршээлдиин көргүзүп,
чээли бээр ^u; ооң салгалы алгадып-йөрээдир.

(самех) 27 Бузуттан чайла, буяндан тары ^v,
ынчан чериңни кезээ мөңгеде ээлеп чурттаар сен;
28 Дээрги-Чаяакчы чөптүг чорукка ынак.
Ол Бодунга бердинген улусту кагбас болгай ^w,
олар кезээ мөңгеде кадагалаттынып артар,
а бузуттугларның салгалы узуткаттырар ^x.

29 Чөптүг-шынныг улус чер-чуртту салгап алгаш,
ону кезээ мөңгеде ээлеп чурттаар.

(пе) 30 Чөптүг-шынныг кижиниң аксындан үнген чугаа-сөс
мерген угаанныг болур, ооң аксы-дылы шынны чугаалаар ^y.
31 Бурганның дүрүм-хоойлузу – ол кижиниң чүрээнде ^z,
ынчангаш ол тайып ушпас.

(цаде) 32 Бузуттуг кижи чөптүг-шынныг кижини
кедеп көөр, өлүрер дээш чүткүүр ^aa,
33 а Дээрги-Чаяакчы чөптүг-шынныг кижини
бузуттугнуң холунга киирбес;
ооң херээн сайгарып турда, ол буруулуг деп санатпас.

(коф) 34 Дээрги-Чаяакчыга идеге, Ооң оруун эдер,
Ол ынчан сени чер-чуртту салгазын дээш өрү көдүрер:
бузуттугларның узуткаттырып турарын көрүп каар сен ^ab.

(реш) 35 Быжыг дазылдыг, дөстелип чечектелген ыяш ышкаш
түрлүг бузуттуг бир-ле кижини көрген мен ^{▼▼36:35 Еврей сөзүглелде бо шүлүктүң утказы эки билдинмес. Өске бурунгу сөзүглелде «Мен Ливанның пөжү ышкаш турамык түрлүг бузуттуг бир-ле кижини көрген мен» деп бижээн.}.
36 А оон ооң үези эрте берген, ол ам чок –
дилээримге-даа, тывылбайн барды.

(шин) 37 Кем-буруу чок кижини хайгаарап көр,
ак сагыштыг кижиже топтап көр,
шак ол кижиниң келир үези – амыр-чаагай.
38 А кем-буруулуг улустуң шуптузун узуткап каар,
бузуттугларның келир үезин чок кылып каар ^ad.

(тав) 39 Чөптүг-шынныг улустуң камгалалы
Дээрги-Чаяакчыдан кээр ^ae,
айыыл-халап үезинде Дээрги-Чаяакчы оларның шивээзи болур;
40 Дээрги-Чаяакчы оларга дузалаар, оларны камгалаар –
бузуттуглардан камгалап, карактап-кадагалаар,
чүге дээрге олар Дээрги-Чаяакчыдан хоргадал дилеп келген ^af.