‏ Psalms 37

1Мизмор-ыр. Давидтии. Сагындырыг кылдыр күүседир ^a.
2Дээрги-Чаяакчы, килеңнээниңде, мени сойгалава,
хорадааныңда, мени кезетпе ^b.
3Сээң согуннарың менче кадалган ^c,
Сээң холуң меңээ аарышкындыр дегген болгай.
4Сээң килеңиңден мага-бодумда кадык чер артпаан ^d,
бачыттарым ужун ишти-хөңнүмде оожургал чок.
5Кем-буруум бажым ашкан ^e,
аар чүък дег, олар мени базып алган.

6Сээдеңимден балыгларым ирип-чыдып, ириңнелген.
7Бүшкүйүп, бүгү бодум халая бердим,
хүннү бадыр хөлүе берген чоруп тур мен;
8ишти-хырным изип-кыпкан, мага-бодумда кадык чер чок.
9Харыксырап, кошкай бердим, ундаралым угдунмас-тыр,
хөрек-чүрээм хилинчээнден алгы-кышкым кедереп тур.
10Дээрги, күзээн чүүлүм шуптузу
Сеңээ билдингир-дир,
уё-човуурум-даа Сеңээ чажыт эвес болгай.
11Чүрээм согуу шапкыланган,
күжүм мени каапкаш барган,
карактарым оду өжүп калган.

12Айыылга таваржырымга, ынак өөрүм ырай берген –
чоок улузум ырадыр туруп алган ^f.
13Амы-тыным үзүксээннер какпа-дузаан меңээ салды;
меңээ хора күзээн улус
өлүм оштаан сөстер сөглеп, хүннү бадыр нүгүлдеп тур.
14А мен хөөкүй, дүлейлээн дег – дыңнавайн,
үнүм чок дег – аксым ашпайн турар-дыр мен ^g.
15Дыңнавастаан, харыылаптар аксы-сөзү
чок кижи ышкаш болу бердим;
16идегелим чүгле Сенде ^h, Дээрги-Чаяакчы,
Сен-не меңээ харыылаар сен, Дээрги Бурганым!

17«Дайзыннарым мени көргеш, өөрбезин,
будум тая бээр орта, мени куду көрбезин» – деп чугааладым.
18Тайып ужар чеде бердим,
аарышкым үргүлчү-ле бодалымда.
19Кем-буруумну миннип,
бачыдым дээш муңгарап тур мен ⁱ.
20А амы-тынымны үзүксээр улус күш кирип, сегереп тур,
мени чылдагаан чокка көрбес улус өзүп-көвүдеп тур.
21Мээң буянымга бузут-биле харыылаар улус ^j
буянче чүткүлүм дээш меңээ өжээргеп тур.
22Мени кагбайн көр, Дээрги-Чаяакчы,
менден ыравайн көр, Бурганым ^k.
23Дүрген меңээ дузалап кел, Дээргим, Камгалакчым!