‏ Psalms 68

1Хөгжүм башкарыкчызынга. «Лилия чечээ» деп аялга үдээр ^a. Давидтии.
2Бурганым, мени камгала –
суг аксы-думчуум долар четти ^b.
3Ханы тулаага дүжүп өлдүм-не, тептиниптер хире чүү-даа чогул.
Ханы сугже дүжүп кирдим-не, агым суг мени алгаш бадыпты ^c.
4Дуза дилеп кыйгыргаш, туруптум – аксы-боскум кургай берди;
Бурганымны манап чадааш, карактарым шылап кагды ^d.
5Чылдагаан чок черге мени көөр хөңнү чок улус ^e
бажым дүгүнден-даа хөй ^f.
Мени хей черге чок кылыр дээн дайзыннарым күштели берди,
үптеп-хунааваан-даа чүвемни эгидер ужурга таварыштым.
6Бурганым, угаан чогумну билир сен,
бачыттарым Сеңээ ажык.

7Аг-шериглиг Дээрги-Бурган-Чаяакчы,
Сеңээ ынанган улустуң ады мен дээш баксыравазын;
Израильдиң Бурганы,
Сенче чүткээн улус мен дээш бак атка кирбезин.
8А мен Сен дээш бак атка кирип чор мен;
Сен дээш арнымны ыядыг шыва алды ^g.
9Ха-дуңмам аразынга өске кижи болу бердим;
хан төрел улузумга хары кижи болу бердим ^h.
10Сээң өргээңге дендии күштүг ынакшылым
сеткилимни оя чип чор ⁱ,
Сени бак көрген улустуң дорамчылалы
мээң кырымга дүштү ^j.
11Ыглап-сыктап, шээрлээним дээш
чемелел-ле дыңнаар-дыр мен.
12Качыгдал хевин кедип алгаш, кочу-шоотка кирер-дир мен.
13Хоорайның төп шөлүнде турар
улустуң аксы-дылындан дүшпес-тир мен.
Арагалап хөглээннер-даа аразында
мени кочулап ырлажыр-дыр.

14А мен дөмей-ле Сеңээ мөргүүр мен, Дээрги-Чаяакчы.
Ээ көрнүрүн күзээн үеңде, элбек энерелдииң көргүзүп,
ынаныштыг камгалалың-биле меңээ харыылап көр, Бурганым.
15Малгаш-балардан мени ушта тырт – дүжүп өлбээйн ^k.
Мени көөр хөңнү чок улустан,
ханы суглардан адырлып аайн ^l.
16Шапкын агым мени алгаш батпазын,
ханы ээрем мени киир тыртпазын,
тамының аксынче кирип, ис чок чиде бербээйн.

17Дээрги-Чаяакчы, мени дыңна, энерелиң ачылыг-дыр ^m,
эгээртинмес ээ-хайыраң менче ээлдир.
18Чалчаң менден хая көрүнме –
кызагдадып чоруур меңээ дүрген харыыла.
19Чоокшулап келгеш, мени камгала,
дайзыннарымга чөрүштүр амы-тынымны адырып хоста.

20Кайы хире дора көрдүргеним,
ыятканым, бак атка киргеним Сеңээ эки билдингир:
дайзыннарымның дөгерезин билир сен, Дээрги-Чаяакчы.
21Дора көрүүшкүн сузум базып, чилчиим үстү.
Кээргээчел сеткил дилээш, куруг үндүм;
аргалаптар кижи манааш, тыппайн бардым.
22Дайзыннарым оо-хоранны аъш-чемимге холуп,
суксаарымга, ажыг суксун берип турду ⁿ.

23Дайзыннарым найыр-дою боттарын дузактап алзын,
кезедир какпа болу берзин ^o.
24Карактарының шоозу өжүп, согурарзын,
ооргалары бүшкүйүп, кажан шагда суларазын ^p.
25Килеңиңни оларже тө чажывыдам –
киткээн оду оларны хөме таварып, хуюктазын.
26Аал-чурту-даа хоозуразын –
оларның чадырларынга чурттаар улус артпазын! ^q
27Чүге дээрге олар Сээң кезеткен кижиңни истеп-сүрүп,
Сээң балыглап каан кижиңни хилинчектээри дам барып тур.
28Сен оларны кем-буруулуг херек бүрүзү дээш кезедип көр,
Сээң агартыышкыныңны олар албазын ^r.
29Амыдыралдың номунда ^s бижиттинген аттарын балатсын,
чөптүг-шынныг улус-биле кады ынаар киир бижиттирбезин.

30А мен түрегдеп, качыгдап чор мен, камгалалың мени
кижи четпес бедикче көдүрзүн, Бурганым! ^t
31Бурганымның адын ырымга алдаржыдайн,
Ооң өндүр улуун мактаайн.
32Мыйыс-дуюглуг буганы өргүүрүнге көөрде ^u,
шак ол макталым Дээрги-Чаяакчыга аажок тааржыр.
33Ону көргеш, биче сеткилдиг улус өөрүп-байырлазын;
Бурганче чүткээн улус, чүрээңер соп, дирлип үнзүн.
34Дээрги-Чаяакчы ядыыларны дыңнап турар,
Бодунуң хоругдаткан улузун тооп көөр.

35Дээр-деңгер, чер, далай, ында чурттаан бүгү амытаннар
Ону алгап-мактазын! ^v
36Бурган Сионну камгалаар,
Иудеяның хоорай, суурларын катап тудар ^w,
улус ол черге чурттай берип, ээлеп алыр.
37Бурганның чалчаларының салгалы ол черге кээп, турумчуур;
Ооң адынга ынак улус орта чурттай бээр ^x.