Psa 71 | TyvTUV | STEP | Соломоннуу . О, Бурган, хаанывыска – шынныг шииткелдериңни, хаанның оглунга

1 О, Бурган, хаанывыска – шынныг шииткелдериңни,
хаанның оглунга – чөптүг чорууңну хайырлап көр ^b.
2 Ол Сээң чонуңну шынныы-биле,
ядыы улузуңну чөптүү-биле шиитсин ^c.
3 Чон дээш дагларга – чаагай чорук,
тейлерге – чөптүг чорук боттанзын.
4 Хаан чон аразында ядыы улусту шын шиитсин,
түреңги улусту камгалазын, дарлакчыны хай дизин ^d.
5 Салгалдан салгал дамчый,
хүн биле ай чырыдып-ла турар болза ^e,
улус Сенден коргуп чорзун.

6 Хаан, шөлче чагган чаъс дег,
черни суггарган чаъс дамдылары дег, дүжүп келзин ^f;
7 ооң чагырар үезинде, ай чырытпас апаргыже,
чөптүг-шынныг кижиниң амыдыралы чечектелзин ^g,
амыр-тайбың элбекшип, доктаазын.

8 Ол ынчан бир далайдан өске далай чедир,
Евфрат хемден чер-делегейниң
ужу-кыдыынга чедир чагырзын ^h;
9 ооң мурнунга ээн ховуларның чурттакчылары ^{▼▼71:9 Еврей сөзүглелде «Ээн ховунуң чурттакчылары» деп сөстерниң утказы эки билдинмес. Болгу дег өске уткалары мындыг: «Дайзыннар», «аң-мең».}
сөгүрүп, бараалгазын, дайзыннары довурак пактазын ^j.
10 Фарсис деп чер ^k биле ортулуктарның хааннары
албан-үндүдүн аңаа эккелзин,
Шева биле Севаның ^l хааннары белектерин сунзун.
11 Шупту хааннар аңаа мөгейзин ^m,
бүгү чоннар – бараан болзун.

12 Ону кыйгырган ядыы кижини,
болчур чүвези чок түреңги кижини хаан камгалаар ⁿ;
13 ядыы-түреңги кижиге ээ-хайыралыг болур,
эң түреңги улустуң амы-тынын камгалаар;
14 оларның амы-тынын дарлал биле күчүлелден адырар;
оларның төккен ханы дээш,
ооң сеткил-сагыжы муңгараар болгай ^o.

15 Хаан үр чурттазын, улус аңаа Шевадан алдынны эккеп берзин ^p,
хаан дээш үргүлчү мөргүзүн, ону хүннүң-не алгап-йөрээзин;
16 ооң чуртунга, даглар бажынга тараа элбек болзун,
дүжүт, Ливанга үнер дүжүт дег, эгээртинмес хөй болзун;
хоорайларынга чурттаар улус,
черден үнген оът-сиген дег, өзүп-көвүдезин ^q.
17 Ооң ады, хүн-не хүннеп турар болза,
кезээ мөңгеде артсын,
ат-алдары салгалдан салгал дамчып артсын ^r;
ооң ачызында бүгү чоннар ачы-буянны алзын ^s,
олар ону амыр-чыргалдыг кижи деп адазын.

18 Дээрги-Чаяакчыга – Израильдиң Бурганынга алдар!
Ол чааскаан кайгамчык чүүлдерни бодарадып турар ^t.
19 Ооң алдарлыг ады кезээ мөңгеде алгадып-йөрээтсин,
Ооң алдары бүгү чер-делегейни бүргезин ^u.
Аминь, ындыг-ла болзунам! ^v
20 Иессейниң оглу Давидтиң мөргүлдери мооң-биле төнген-дир.

‏ Psalms 71

Соломоннуу a.

Соломоннуу ^a.